Masalmo 107 - Bhiblia Yo Sawuleka

DIBHUKU DA WUTXHANU ( Masalmo 107--150 ) Kubonga Txizimu ngu mhaka ya wunene wa txona

¹ Bongani Mkoma, nguko ene mnene, nguko wunene wakwe mbwa yotshe mbimo.

² Va na wombe toneto kwakwe avale ene a nga va tirula, avale a nga va hulukisa mtamoni ka mlala,

³ a va wuyisile ngu matikoni, ka wutxani ni ka mswa-ditambo, ka Wuphemba ni ka Wulambwe.

⁴ Va to timela, ve pengapenga txiwulani, va si mani nzila ya ku va yisa ka didhoropa do zumba ka dona;

⁵ va pfite nzala ni ditora; mahika awe me khata kurereka.

⁶ Aniko kupandisekani kwawe, va to dila ka Mkoma se ene a to va hulukisa kuxanisekani kwawe.

⁷ A to va tsimbitisa ngu nzila yo lulama, e va yisa ka ditiko di va fanelako kuaka ka dona.

⁸ Bongani Mkoma, ngu mhaka ya wunene wakwe ni sidiwukiso sakwe a mahelako vathu!

⁹ Nguko ene wa tima ditora ka vale va di pfako, wa khurisa avale va pfako nzala.

¹⁰ Vamwani va ti ti hanya mu txidemani ni mtsudini ka lifo, na va di sungilwe ngu sixaniso ni titxhini,

¹¹ ngu kuva va di eyisile sileleto sa Txizimu ni kunyenya mithetho ya Nyatxitimwi.

¹² Txizimu txi va rwekile sikarato so nemela, ve humbwa ve wa, ku si maneki ni wammweyo wa ku va vhuna.

¹³ Sekoko, va to dila ka Mkoma kupandisekani kwawe, se ene a to va xanguta kuxanisekani kwawe.

¹⁴ A va humisile txidemani ni mtsudini ka lifo, kambe a bhenute makhodha awe.

¹⁵ Bongani Mkoma, ngu mhaka ya lirando lakwe ni sidiwukiso sakwe a mahelako vathu!

¹⁶ Ene a bhandisete matimba a tisimbi e komolela minaneko ya sikete.

¹⁷ Vamwani va mahile sipumbu ngu mhaka ya sionho sawe, ve xaniseka ngu mhaka ya minandu yawe

¹⁸ sotshe sakudya si ti va xamukisa, se va ti hafuhi ni kufa.

¹⁹ Sekoko va to dila ka Mkoma kupandisekani kwawe, se ene a to va xanguta kuxanisekani kwawe.

²⁰ Ngu dipswi da txona Txizimu txi va hanyisile txi txi va hulukisa ka lifo!

²¹ Bongani Mkoma ngu mhaka ya lirando lakwe ni sidiwukiso sakwe a mahelako vathu!

²² Phaxani timhamba ta kubonga mi txi huwelela mithumo yakwe ngu litsako.

²³ Avale va tsimbilako mu lineneni ngu sitimela sa mati, kasi kumaha wukwewu mu matini ka hombe,

²⁴ evo va woni mithumo ya Mkoma ni sidiwukiso sakwe hagari ka linene.

²⁵ Ngu kurumwa ngu Mkoma, diphuho da futeta ngu mtamo, adi di kukumukisako mavimbi a linene;

²⁶ sitimela sa mati sa rinzwa si txi ya txitimwi, si relela si txi ya hahatshi ka kueta. Se vathu ve rereka ngu kuthava phango;

²⁷ va to pfa lizungu ve dhedhereka nga vo leva, ni wotshe wutxhari wawe wu si va vhuni txilo.

²⁸ Sekoko va to dila ka Mkoma kupandisekani kwawe, se ene a to va xanguta kuxanisekani kwawe.

²⁹ A malatile txihuhuri, ku txi tenga, ni mavimbi a linene me renga.

³⁰ Mbimo yi va nga wona kurenga ka mavimbi va to tsaka se Txizimu txi va hokisile txithoni mu va navelako kona.

³¹ Bongani Mkoma, ngu mhaka ya lirando lakwe ni sidiwukiso sakwe a mahelako vathu!

³² Mu pfaliseni hagari ka msengeletano wa vathu, m'dhumiseni hagari ka dibanza da madhota.

³³ Mkoma wa txitxa minambo yi maha txiwula ni milonga yi maha txigwangwa;

³⁴ wa hindula mafu o nona ma txi maha o savala, ngu mhaka ya wubihi wa vaaki va kona;

³⁵ wa hindula siwula si maha maziva a mati ni mafu a txigwangwa me maha milonga,

³⁶ kasi kuveka konemo avale va ku ni nzala ti to ve aka kona madhoropa awe.

³⁷ Ve phaya tithembwe ta sakudya ni ta mivhinya ve elula mihando yo tala.

³⁸ Se Mkoma a to va katekisa a txi va andisa ngutu asi hunguli mtengo wa sihari sawe sa sifuyo.

³⁹ Vona va hungutwe ve maha vavadotho ngu mhaka ya sixaniso, makhombo ni sikarato.

⁴⁰ Aniko Txizimu txi nyenya vaxanisi txi va pengapengisa txiwulani ko mbi na tinzila.

⁴¹ Txa humisa txisiwana mu kuxuphekani ka txona txi andisa ngamu ya txona nga mtxhambi wa tinvuta.

⁴² Vathu vavanene, ngako va txi wona tiya, va tsaka, aniko avale i ku vo biha, va malala.

⁴³ Awule i ku wo ziva, a na yi wonisisa mhaka yiya, e pimisa lirando la Mkoma.