Masalmo 105 - Bhiblia Yo Sawuleka

Txizimu ni vathu va txona

¹ Bongani Mkoma, huwelelani wuhombe wakwe; nuwelani hagari ka vathu atile ene a nga ti maha.

² Embelelani tindando ta kum'dhumisa; womba-wombani ngu mithumo yakwe ya kuxamalisa!

³ Ti guleteni ngu ngene, nguko Njxizimu txo sawuleka. Tsakani motshenu anu mi lavako Mkoma!

⁴ Tutumelani ka Mkoma ni ka mtamo wakwe; lavani khohe yakwe yotshe mbimo.

⁵ Alakanyani mithumo yakwe ya kuxamalisa, sidiwukiso sakwe ni kulamula ka txisofu txakwe,

⁶ Anu vanana va Abrahamu, txithumi txakwe, ni nanu vanana va Jakobe, msawulwa wakwe.

⁷ Kambe ene ngene Mkoma, Txizimu txathu; wulamuli wakwe wu ka otshe mafu!

⁸ Mkoma wa alakanya yotshe mbimo txitumelelano txi a nga tximaha, txitumelelano txi a nga xambanya ku txi veketa ka tiveleko ta magumi a mazana.

⁹ Txitumelelano txi a nga txi maha ni Abrahamu, txixambanyo txi a nga txi maha ka Isaake.

¹⁰ A txi tsanisile txi maha mlayo ka Jakobe, txi maha txitumelelano txo mbi guma ka Israyeli,

¹¹ mbimo yi a nga womba a txi khene: “Ni na kuninga ditiko da Kanana, di maha thomba yi yi kulumbako.”

¹² Mbimo yi Vaisrayeli i nga ti vavadotho, i nga ti valuveli ditikoni ka Kanana;

¹³ mbimo yi va nga ti tsimbilatsimbila ka ditiko ni ditiko va txi penga ngu ka mfumo ni mfumo,

¹⁴ Txizimu kha txa tumela ti to ni wammweyo e va xupha. Ngu mhaka yawe txi kawukile vafumeli, txi txi kha txona:

¹⁵ “Mi nga gweseni ava ni nga va sawula, mi nga xupheni vaprofeti vangu.”

¹⁶ Txizimu txi vangile nzala txitimwi ka otshe mafu txi lovisile tithembwe totshe ta fulaho.

¹⁷ Aniko txona txi rumete m'thu masoni kwawe: Josefa a nga xaviswa nga khumbi,

¹⁸ va txi msunga ngu titxhini mikondoni ni dikhodha da simbi thamoni kwakwe,

¹⁹ kala kuza ti maheka atiya Josefa a nga ti ti wombile, se dipswi da Mkoma di kombisile ti to Josefa a womba ditshuri.

²⁰ Mfumeli a rumile ti to ve m'humisa; mkhozisi wa vathu a to mtxhatxha;

²¹ a to muemisela ku e va mthangeli wa nyumba yakwe eva i di mxayisi wa totshe tithomba takwe,

²² a txi va ni mtamo wo gondisa tinduna ta mfumeli ni kugondisa wuzivi ka madhota.

²³ Sekoko Jakobe a to tsula ditikoni ka Egipta a ti ya hanya koneyo kota mluveli.

²⁴ Txizimu txi andisile ngutu vathu va txona, txi va ninga mtamo wo pinda valala vawe.

²⁵ Txi mahile ti to Vaegipta ve venga vathu va txona ve fumela ngu tshofu vathumi va txona.

²⁶ Se Txizimu txi to ruma txithumi txa txona Mosi ka Aroni, awu txi nga msawula.

²⁷ Ve komba ka Vaegipta sidiwukiso si txi nga va gela ve maha sixamaliso ditikoni ka Kamu.

²⁸ Txizimu txi rumete txidema txi fenengeta Vaegipta, aniko vona kha va khatala ngu txiziviso txiya.

²⁹ Txizimu txi hindute mati a minambo me maha mnoha, se txi daya sotshe sihaka;

³⁰ txi tatile ditiko ngu makhele, awa ma nga hoka mndani ka tinyumba ta mfumeli.

³¹ Txizimu txi rumile ku txi humelela mtungu wa tiphuka ni tithwala ka dotshe ditiko da Egipta.

³² Ha wukhaloni ka mati Txizimu txi to nisa maralala ni midhikila ya mndilo ha ditikoni kotshe.

³³ Txi fuvisile tithembwe tawe ta mivhinya ni mixanvu txi komolela mindonga ya tithembweni kwawe.

³⁴ Txizimu txi rumile, ku so humelela humbi; ni txigoñwani txo mbi balwa.

³⁵ Si dyela wotshe mwasi wa tithembweni kwawe ni yotshe mihando ya mafu awe.

³⁶ Txi tsayisile ngu lifo vanana va matiwula vanana vo khata, ka totshe timwaya ta Vaegipta.

³⁷ Txizimu txi humisile vathu va txona, va di rwate silivhela ni nzalama ku ti si nga ho wo lwala hagari kwawe.

³⁸ Vaegipta va to tsaka ngu ku va wona ve huma, nguko va ti ti va thava ngutu.

³⁹ Txizimu txi to nawuluta direfu txi fenengeta va ka Israyeli ni mitshikari txi wuyisa mndilo wa ku va woninga ni wusiku.

⁴⁰ Va to txi kombela, txi txi va ninga titshukwa; txi va khurisa ngu m'baba wa nzumani.

⁴¹ Txi to tula dirigwi, ku txi huma mati, ma txi khulunga txiwulani nga mnambo.

⁴² Txizimu txi to alakanya mapswi a txona o sawuleka, awa txi nga xambanya ka Abrahamu msawulwa wa txona.

⁴³ Se txi humisile vathu va txona va di tsakile vasawuleki va txona va txi peka mikulungwani.

⁴⁴ Txi va ningile ditiko di i nga ti da vamwani vathu ve dya mitxelo ya kudimwa ngu vamatiko,

⁴⁵ kasiku ve vekisa milayo ya txona ni kuxonipha sileleto sa txona. Dhumisani Mkoma!