Masalmo 104 - Bhiblia Yo Sawuleka

Ndando ya kudhumisa m'vangi

¹ Bonga ka Mkoma awe dihika dangu! Mkoma, Txizimu txangu! Wa thisa ngutu ngu wuhombe; u ambate wudhundo ni wulamuli.

² Ene wa ti fenengeta ngu liwoningo nga txyambalo a nawuluta tinzuma kufana ni m'jiyo.

³ U akile nyumba yako matini txitimwi ka tinzuma. Marefu u ma mahile txikotxikani txako u tsimbila u di txitimwi ka mabhapi a diphuho!

⁴ Maphuho u ma mahile sirumwa sako ani tinyangafula ngu tona i ku sirumwa sako.

⁵ U vekile mafu txitimwi ka makhato o tsana, kasiku me zumba ma di tsani.

⁶ U fenengetile mafu ngu Linene la kueta, ku txi nga u to ma fenengeta ngu didhamba, se mati ma fenengetile mimango,

⁷ aniko awe u ma kawukile, se ona me thava, se ma di engisile kudhinda ka dipswi dako, ma to kuluveta me phwa.

⁸ Ma kwete mimango, me relela mathekani, kala ka wukhalo wu u nga ma sikela,

⁹ kala mihinganoni mu u nga ma tsimba kupinda, kasiku linene li si khubhunyeti kambe mafu.

¹⁰ Awe wa ruma mati a milonga ma txi tata minambo, ayi yi khulungako ka mimango.

¹¹ Sihari sotshe sa txitinga si sela ona mati awa ni timhoti ta mimango ti tima ditora ka ona.

¹² Tikasani ka minambo, sinyana sa nzuma si aka sisaka sa sona; si emba si di madhavini ka mindonga!

¹³ U di nyumbani kwako, txitimwi, wa nakanisa mimango; wa nonisa mafu ngu kuwa ka mati.

¹⁴ Wa kulisa lihawu la sihari ni mindonga yi vathu va phayako, kasi kumana sakudya ka yona:

¹⁵ Vhinya yi yi va tsakisako timbilu, mafura awa ma va tshurisako tikhohe ni sakudya si si va ningako mtamo.

¹⁶ Mindonga ya Mkoma yi khuri, mindonga ya mikedhari ya Libhanoni a nga yi phaya.

¹⁷ Amuwa sinyana si akako kona sisaka ni txitimwi ka mikedhari kumaneka sisaka sa mikhoromati.

¹⁸ Mimango yo lapha mbuthavelo wa vamangulwi ani sinvunza si thavela tiphakoni ka marigwi.

¹⁹ U mahile mtxima kasi kupima tinguva ni ditambo da ziva txikhati txi di faneleko kuswa ngu txona.

²⁰ Wa wuyisa txidema, ku txi maha wusiku, se sihari sa txitinga si huma si tsimbilatsimbila.

²¹ Tingonyamo ta bhonga ti txi xota nyama, ti kombela ka Txizimu sakudya sa tona.

²² Kambe ngako di txi txa, koneko tona ta thava kasiku ti ya sisala maphalani ka tona.

²³ Sekoko nguyo mbimo, m'thu a humako eya mthumoni a txi ya thuma kala di txi swa.

²⁴ Mkoma, awe u mahile simaha sasingi u mahile sotshe ngu wuzivi wa hombe! Mafu ma tate ngu sivangwa sako!

²⁵ Ku na ni Linene la hombe, la kuanama ngutu, amu si tsimbilatsimbilako sihari so mbi balwa, sihari sa hombe ni sa sidotho.

²⁶ Konemo kutsimbila sitimela sa mati, konemo a sakanela kona Levhiyatani, mnyoka wa hombe wa linene u nga wu maha.

²⁷ Sotsheso sivangwa si rinzela awe kasiku u si ninga sakudya ngu mbimo yi yi fanelako.

²⁸ Ngawe u si ningako sakudya, asi sona si rolelako; wa nawuluta dianza dako, se sona si khura ngu si i ku sa sinene.

²⁹ Ngako u txi si sisela khohe yako, sa rereka, ngako u txi si thavisa moya, sa fa, si txi tshumela si maha luthule.

³⁰ Ngako u txi si rumela moya wako, sa tshumela si hanya. Ngu toneto, wa wuseta mafu me maha a maphya.

³¹ Wudhumo wa Mkoma kha wu nga ni magwito! Mkoma a na tsake ngu sile a nga si va nga!

³² Mafu ma dhudhumela, ngako Mkoma a txi ma wonetela; mimango ya tuvika wutshi, ngako ene a txi yi gwesa.

³³ Ni na embelela Mkoma, otshe masiku a kuhanya kwangu; ni na dhumisa Txizimu txangu, ni di ngadi ni txi hanya.

³⁴ Ndando yangu yi na tsakise Mkoma, nguko ani ni tsakela ene.

³⁵ Sigohi si na loviswe ha mafuni! Vabihi va na mwalale. Ni lava kudhumisa Mkoma ngu wotshe moya wangu! Dhumisani Mkoma.