Masalmo 102 - Bhiblia Yo Sawuleka

Mkombelo wa m'thu wo xaniseka

Mkombelo wa m'thu wo xaniseka, awule tshakunutako kutitsetsa kwakwe a di kupandisekako, masoni ka Mkoma Txizimu

¹ Mkoma, engisa mkombelo wangu, yi na hoke kwako huwa yangu!

² U nga ni sisele khohe yako, mbimo yi ni ku kupandisekani; siza u txi engisa kuvilela kwangu! Kuluveta u txi ni xamula, ngako ni txi kudhana!

³ Nguko masiku a kuhanya kwangu ma mwalala nga wutshi; mmidi wangu wa tura nga makala a mndilo.

⁴ Mbilu yangu yi wunile nga mwasi wo gangwa, ni txi divala ni kudya sakudya!

⁵ Marambu angu ma namarete aha ka didhowo dangu, ngu mhaka yo zumba ni txi dila ngutu.

⁶ Ni fana ni ditshukulu di ku mu txiwulani; ni txikhovha txi txi ku marumbini.

⁷ Ni na ni txitshwave, ni tipfa ni di nokha, ni fana ni txinyana txi txi ku txiroroni ka nyumba.

⁸ Valala vangu va ni poyilela otshe masiku, va ni ruketela va txi womba kubiha ngu ditina dangu.

⁹ Kha ni nga ni sakudya, sakudya sangu ngu dikhuma; sa kusela sangu si patana ni mirongo yangu,

¹⁰ ngu mhaka ya kuhenya kwako ni kutsukula kwako; u ni guletile, ngu msana u txi ni tshotsha.

¹¹ Masiku a kuhanya kwangu, ma fana ni mtsudi wu tutumako, se ani ni fana ni mwasi wu wunako.

¹² Aniko awe, Mkoma, u mfumeli yotshe mbimo; ditina dako di na alakanywa ka liveleko ni liveleko!

¹³ Wuka, Mkoma, telwa ngu wumbilu ngu Siyoni; se i mbimo ya ku m'divalela! Txi hokile txikhati txa kona!

¹⁴ Sithumi sako sa ma randa marigwi akwe, si na ni wusiwana ngu marumbi akwe.

¹⁵ Sekoko yotshe mifumo yi na thava ditina da Mkoma votshe vafumeli va ha mafuni va dhumisa wuhombe wakwe,

¹⁶ ngako Mkoma a txi aketa Siyoni a txi ti wonekisa ni wudhumo wakwe;

¹⁷ ene a na engisa mkombelo wa txikulungu kha na mbi tsukula mikombelo ya txona.

¹⁸ Atiya ti na bhalelwe liveleko li litako, kasiku ve dhumisa Mkoma avale va ku ngadi va txi na velekwa.

¹⁹ Mkoma a wona a di txitimwi ka txiluvelo txakwe txo sawuleka; a di txitimwi nzumani ene wa wona mafu,

²⁰ kasiku engisa kuvilela ka tikhumbi ni kuhulukisa avale va nga abaniselwa kufa.

²¹ Kona Siyoni di na huwelelwa ditina da Mkoma ni Jerusalema ku na pfala kudhumiswa kwakwe,

²² mbimo yi vathu va yotshe mifumo va no tshangana, kasiku ve khozela Mkoma.

²³ Ene a ni hungute mitamo hagari ka nzila, a komisile masiku a kuhanya kwangu.

²⁴ Ani ni kombete ni txi khani: “Txizimu txangu, u nga ni teke ni di hagari ka masiku a kuhanya!” Malembe ako, Mkoma, kha ma na magwito!

²⁵ U mahile mafu kukhukhela makhatoni; ngawe upune u nga va nga tinzuma.

²⁶ Sotshe si na pinda, aniko awe u na simama u tsana. Sotshe ha mafuni sa sakala kufana ni nguwo; sotshe u na si txhipisa kufana ni syambalo, se si na mwalala!

²⁷ Aniko awe ngawe yotshe mbimo; malembe ako kha ma na magwito.

²⁸ Vanana va vathu vako va na hanya ha mafuni, ni liveleko lako li na tsaniswa masoni kwako.