Marku 6 - Bhiblia Yo Sawuleka

Jesu ngako asi amukelwi Nazareta

¹ Jesu a to khukha konaho e tshumelela ditikoni kwawe, se vagondiswa vakwe ve mu londisa.

² Ngako di di hokile ditshiku da Sabbata, a to khata kugondisa disinagogani, se vathu votala, va nga mu engisa, va to xamala va txi kha vona: “Timhaka tiya a ti mana hani? Mbuzivi muni wona wuwa a nga ningwa ni sixamaliso si si mahwako ngu manza akwe, kani?

³ Ina hi nga ene wuwa m'vati, mwanana wa Mariya, mwanawe Jakobe, ni Josi, ni Judha, ni Simoni, kani? Ina tindiyakwe kha ti nga ho hagari kwathu kani?” Se ve khuveka ngu ngene.

⁴ Kambe Jesu a ti khene kwawe: “Mprofeti kha kanyiswi, ngako i si nga ditikoni kwawe ni maxakani kwawe, ni nyumbani kwawe.”

⁵ Konaho kha sikota kumaha txidiwukiso ni txa tximwetxo, hahanze ka valwali vokari, a nga va sanzeka manza, a txi va hanyisa.

⁶ A to xamala ngu kuwona ti to vona kha va na likholo. Se a to tsimbilatsimbila a txi gondisa ka miti ya hafuhi.

Kurumwa ka Vapostoli va digumi ni vambidi

⁷ Ene a to dhana vapostoli va digumi ni vambidi, a txi khata ku va ruma, ngu vambidivambidi, a txi va ninga mtamo wa kuxula mimoya ya nzambwa.

⁸ A txi va leleta ti to va si longi txilo txa nzila, hahanze ka ndonga dwe, hambi mbuva, hambi msava, hambi male ya kusungelelwa txiwununi.

⁹ Aniko va na ambale masandazi mikondoni kwawe, kambe va si teki mabhaji mambidi.

¹⁰ A txi va gela ku khene: “Ka nyumba yihi ni yihi mi no wulela, zumbani koneho, kala kuza mi huma.

¹¹ Ngako ka wukhalo wokari, va si mi amukeli, mwendo va si mi engisi, mbimo yi mi humako, huphutani lithulu la mikondo yanu ngu wufakazi wa ku va sola.”

¹² Se va di khukhile ve tsula, va to txhumayela ti to vathu va na hunduluke,

¹³ se va txi tovela madhimoni o tala, va txi tota mafura valwali votala, va txi va hanyisa.

Kufa ka Johani Mubhabhatisi

¹⁴ Ku ti ngako mfumeli Herodha a di pfite timhaka ta Jesu, nguko ditina dakwe di ti ni nduma ngutu, a to khene: “I Johani Mubhabhatisi a nga wuka ngu ka vakufa, ngu konaho mitamo yi thuma ngu ngene.”

¹⁵ Vamwani va txi kha vona: “I Elija.” Vamwani va txi kha vona: “I mprofeti wa kufana ni vamwani vaprofeti.”

¹⁶ Kambe Herodha, ngako a txi tiengisa a to khene: “I Johani wu ni nga mu wila msungo, a nga wuka ngu ka vakufa.”

¹⁷ Nguko ene Herodha a ti rumile vathu veya ñola Johani ve mu sekela mkorani, ngu mhaka ya Herodhiya, msikati wa Filipi, mwanawe, nguko a ti mu tekile.

¹⁸ Se ka yoneyo mbimo, Johani a ti khene ka Herodha: “Kha ta lulama kuteka msikati wa mwananu.”

¹⁹ Herodhiya a to wukela Johani, e lava ni ku m'daya, aniko asi sikoti.

²⁰ Nguko Herodha a ti thava Johani, ngu kuziva ti to ene i m'thu wo lulama ni wo sawuleka, kambe a ti ti mu vhikela. Mbimo yi a nga txi mu engisa, a ti thelwa mphume, aniko a ti mu engisa ngu kutsaka.

²¹ Kambe di to hoka ditshiku da dinene, ahawa Herodha a nga mahela tinganakana takwe ni tinduna ta yimbi, ni va hombe va Galileya, m'buso wa kualakanya ditshiku da kuvelekwa kwakwe.

²² Mwanana wa muhorana wa Herodhiya, a to wulela, a txi sinya e tsakisa Herodha ni va va nga ti khate nayo ha sakudyani. Se mfumeli a txi khene ka wule wa muhorana: “Ni kombele sotshe si u si lavako, ni na kuninga.”

²³ A to xambanya a txi khene: “Atxi u no kombela txona, ni na kuninga, hambi i di ku kubhandela mfumo wangu ngu hagari.”

²⁴ Se awu wa txihoranana a to huma, a txi ya khene ka mame wakwe: “Ni na kombela txani kani?” Ene a to xamula a txi khene: “Kombela msungo wa Johani Mubhabhatisi.”

²⁵ Konako a to tshumela ngu kukuluveta, a txi ta ka mfumeli, a txi ta kombela a txi khene: “Ni randa ku u txi ni ninga konakuwa, mbiyani muwa, msungo wa Johani Mubhabhatisi.”

²⁶ Mfumeli a to karateka ngutu, kambe e tandeka ku mu lambela ngu mhaka ya kuxambanya kwakwe, ni mhaka ya va a nga ti zumbile navo ha sakudyani.

²⁷ Se kunukunuko, a to ruma nduna e yi leleta ku yi na nehe msungo wa Johani.

²⁸ Se nduna yiya yi to tsula yi ya wila msungo wa Johani mkorani, yi txi neha msungo wakwe mbiyani, yi txi wu ningela ka txihoranana; se txona txi wu ningela ka mame wa txona.

²⁹ Se vagondiswa va Johani, ngako va di ti zivile, va to ya teka txirumbi txakwe, veya txi tshotsha diyivani.

Jesu e dyisa vathu vavangi

³⁰ Se vapostoli va to ya tshangana masoni ka Jesu, va txi mu xawutela totshe ti va nga thuma ni ti va nga gondisa.

³¹ Se ene a nje khene kwawe: “Ngonani kheno anu mokha, he tsuleni txiwulani, mi na ya humula kudotho.” Nguko i ti vathu vavangi, ava va nga txi tsulela ni va va nga txi ta, ahawa ka kuza vagondiswa va txi pwata ni mbimo ya kudya sakudya.

³² Va to khukha ve tsula ngu ngalava ka wukhalo wa txiwula, vona vokha.

³³ Se ngako vavangi va txi va wona ni kukhukha, va to tekela ku kuziva amu va nga txi ya kona; ve huma ngu ka otshe madhoropa ve tsimbila ngu minenge, va txi ya ka wukhalo wule, ve va thangela kuhoka.

³⁴ Ngako a di humile ngu ngalavani, Jesu a to wona dibutho da vathu vavangi, a txi va pfela wusiwana, nguko va ti fana ni tinvuta to mbi na m'dyisi. Se e khata ku va gondisa timhaka to tala.

³⁵ Ngako ditambo di txi ya kuswani, vagondiswa vakwe va to tshuketela kwakwe va txi kha vona: “Wukhalo wuwa njiwula, ditambo ni dona di ya kuswani.

³⁶ Va tshumete veya tithembweni ni mitini, ayi ya hafuhi, veya ti xavela sakudya.”

³⁷ Jesu a to va xamula a txi khene: “Va heni anu sakudya.” Vona va ti kha vona kwakwe: “Ina hi nga tsula hi txi ya xava mapawu a mazana mambidi a madhenari, hi ta va ninga va txi dya kani?”

³⁸ Ene a to wotisa a txi khene kwawe: “Mi na ni mapawu mangahi kani? Tsulani mi ya wona.” Ku ti ngako va di ma woni, va to kha vona kwakwe: “Mtxhanu wa mapawu ni sihaka simbidi.”

³⁹ A to ruma kuva txi khalahatshisa vathu votshe amu ka mwasi wo hanya.

⁴⁰ Vona va to khalahatshela ngu mitxawa ya dizana, ni ya mtxhanu wa magumi.

⁴¹ Jesu, ngako a di tekile mapawu a mtxhanu ni sihaka sa simbidi, a to gula maso e wona nzumani e si katekisa e bhandela mapawu e ninga vagondiswa vakwe, ti to vona va txi ma avela ka vathu. Ni sihaka sa simbidi kambe asi avete ka votshe.

⁴² Votshe va to dya va txi khura.

⁴³ Se va to rolela ve tata digumi da sirundu ni simbidi ngu wururu wa mapawu ni wa sihaka.

⁴⁴ Ava va nga dya mapawu i ti 5.000 a vavamna.

Jesu e tsimbila txitimwi ka mati

⁴⁵ Se Jesu kunukunuko a to kurumeta vagondiswa vakwe ti to ve wulela ngalavani ve thangela veya ka phuho ya mtxhatuko, ka kugwatama ni Bhetsayidha, na ene a di ngadi e tshumeta dibutho.

⁴⁶ Msana ka kuva a di va tshumetile, a to tsula eya khongela mmangoni.

⁴⁷ Ngako di di swite, ngalava yi ti hagari ka digova, se ene a ti sate ekha mabambe.

⁴⁸ Se e va wona va txi karateka ngutu ngu kutxungela, nguko moya wu ti va lambela. Ku ti ngako ku txi lava kumaha mbimo ya kuwonelela ka wumune ka wusiku, a to ta kwawe, na a txi tsimbila txitimwi ka digova a txi nga wo va pinda eya masoni.

⁴⁹ Kambe ngako va txi mu wona a txi tsimbila txitimwi ka digova va to pimisa ku njigono, se ve peka huwa.

⁵⁰ Nguko votshe, mbimo yi va nga mu wona, va to dhuka; kambe ene a to kuluveta e womba-womba navo, a txi khene kwawe: “Tsanani misana. Ngani!”

⁵¹ Se a to wulela ngalavani kwawe, konako moya wu renga, se ve xamala ka kupindisa.

⁵² Nguko va sanzi ku ti pfisisa ta txixamaliso txa mapawu, timbilu tawe i ti to banga.

Jesu a txi hanyisa valwali Genezareta

⁵³ Ku ti ngako va di txhatukile linene, va to konama ditiko da Genezareta, se ve hoka wubambe.

⁵⁴ Ngako va di humile ngalavani vathu va kona va to kuluveta ve m'ziva.

⁵⁵ Va to tsimbila ka dotshe ditiko dile ve khata kurwalela valwali ngu mataho awe ve va yisa hayi ni hayi va engisako ti to Jesu waho.

⁵⁶ Kambe kotshe hawa a wulelako kona, mikhokholani ni madhoropani mwendo mu tithembweni, va ti ti veka va va lwalako, mitendelani, se ve mkombela ti to e va tumelela kugwesa, hambi i di wuziva wa nguwo yakwe. Se votshe va va nga txi mu gwesa, va ti hanyiswa.