Marku 15 - Bhiblia Yo Sawuleka

Jesu masoni ka Pilato

¹ Ni mixo, vaphaxeli va hombe va to tshangana ve maha txikungo kumweko ni madhota ni vabhali ni dotshe Dibanza. Sekoko, va di sungile Jesu, va to mteka ve tsula veya mningela ka Pilato.

² Pilato a mu wotisile ku khene: “Ngawe Mfumeli wa Vajudha kani?” Jesu a mu xamute a txi khene: “U womba tona.”

³ Vaphaxeli va hombe va txi mu lumbeta timhaka to tala.

⁴ Pilato a to engeta e mu wotisa a txi khene: “Khu xamuli txilo kani? Hinga pfa timhaka ta tingi ati va ku mangalelako ngu tona!”

⁵ Aniko Jesu kha xamula txilo ahawa koza Pilato e xamala.

Jesu e konelwa kudawa

⁶ Kambe ngu mbimo ya M'buso Pilato a ti tolovela kuthukunyula txibotxhwa tximwetxo, atxi va nga txi mkombela.

⁷ Se a ti ti ho wammweyo, awu ditina dakwe a dhanwako ku i Bharabhasi, a nga ti seketwe kumweko ni vale va nga wusa m'bango, va txi daya m'thu hagari ka dona dizunga dile.

⁸ Se dibutho da vathu va to kwela veya banzani veya khata kukombela ka Pilato ti to e maha ati a tolovelako ku va mahela.

⁹ Pilato a wotisile a txi khene: “Mi lava ti to ni mi thukunyulela Mfumeli wa Vajudha kani?”

¹⁰ Nguko a ti tiziva ta ku vaphaxeli va hombe va mu ningete ngu livengo.

¹¹ Vaphaxeli va hombe va to kujetela dibutho ti to ve kombela kuthukunyulwa Bharabhasi.

¹² Pilato a to engeta kambe a txi womba kwawe, a txi khene: “Ni na maha txani kasi ngu wu mi m'dhanako ku i Mfumeli wa Vajudha kani?”

¹³ Vona va to kwangula va txi kha vona: “Mu bethele ha txihambanoni!”

¹⁴ Pilato a to khene kwawe: “Kasi ngubiha muni a nga kumaha kani?” Aniko vona va to tamarisa kukwangula va txi kha vona: “Mu bethele ha txihambanoni!”

¹⁵ Sekoko Pilato, ngu kulava kutsakisa dibutho, a to thukunyula Bharabhasi se, msana ka kuva a di rumete kukwapela Jesu, a to mningela kasiku eya bethelwa ha txihambanoni.

Masotxhwa ma txi poyilela Jesu

¹⁶ Masotxhwa ma to mteka me mu yisa digumani, nyumbani ka wukoma ahawa va nga ya tshanganisa wotshe mtxawa.

¹⁷ Msana keto, va to mu ambeka nguwo ya disilika do bhilivila, ve luka tshimbo ya mipa, ve yi gemeka ha msungo kwakwe.

¹⁸ Sekoko, va to khata ku mlosa, va txi kha vona: “Xewe, Mfumeli wa Vajudha!”

¹⁹ Se va txi mu peka ha msungo ngu msengele, ve mu thurela lure, na va txi khizama va txi mu khozela.

²⁰ Msana ka kuva va di mu tseketsete, va to mu thavisa nguwo yile yo bhilivila, ve mu ambeka syambalo sakwe. Sekoko va to mteka kasi kuya mu bethela ha txihambanoni.

Kubethelwa ka Jesu

²¹ Se ve mana m'thu wokari, Simoni wa Kirene, tate wa Alexandre ni Rufo, a nga txi pinda a txi wuya ngu thembweni; ve mu kurumeta kupakata txihambano txa Jesu.

²² Se va to mu yisa ka wukhalo wu wu dhanwako ku i Golgota, ati ti wombako ku “Wukhalo wa Txikwakwa.”

²³ Va to mninga vhinya yo patwa ni mira, kambe ene kha yi sela.

²⁴ Ngu msana va to mu bethela ha txihambanoni, ve abanela syambalo sakwe vona ngu txawe, va di thangile ngu kuxaxuva tixolo kasi kuwona atxi txi no lumba mmwani ni mmwani.

²⁵ I ti txikhati txa wuraru, mbimo yi va nga mu bethela ha txihambanoni.

²⁶ Ku ti ni m'bhalo wo komba mnandu wakwe, wu nga ti bhatwe ti taku: “Mfumeli wa Vajudha.”

²⁷ Kumweko nayo si bethetwe sigevenga simbidi, tximwetxo ngu didhawa da txinene, tximwani ngu didhawa da txibhabha kwakwe.

²⁸ [Ngu hawa ku nga tatiseka ati ti nga bhalwa taku: “A batwe kumweko ni sindaka-milayo.”]

²⁹ Ava va nga txi pinda va ti ti mu ruketela, va txi zinginika misungo yawe, va txi kha vona: “Ha! Awe u khundumusako Dithepele, u txi di aketa ngu masiku mararu.

³⁰ Ti hanyise upune, u txhika ngu ha txihambanoni!”

³¹ Vaphaxeli va hombe ni vabhali, va ti ti mu xowokisela ni vona, va txi kha vona: “A hanyisile vamwani, se ene kha sikoti ku ti hanyisa apune!

³² Ene i ku Mesiya, Mfumeli wa Israyeli, a na txhike konakuwa ngu ha txihambanoni, kasiku hi na ti wona, hi txi kholwa.” Hambi ni vale va nga ti bethetwe nayo, va to mu ruketela ni vona.

Kufa ka Jesu

³³ Se ku di hokile txikhati txa wutxhanu ni tximwetxo, ku to phuma txidema ka dotshe ditiko kala ka txikhati txa wutxhanu ni mune.

³⁴ Sekoko ngu txikhati txa wutxhanu ni mune, Jesu a to huwelela ngu dipswi da hombe, a txi khene: “Eloyi, Eloyi, lama sabaktani,” ati ti wombako ku: “Txizimu txangu, Txizimu txangu, u ni lekete txani?”

³⁵ Vamwanyani ka vale va nga ti ti ho konaho, mbimo yi va nga mu engisa, va to womba va txi kha vona: “Engisani, ene a dhana Elija.”

³⁶ Mmweyo wa vona a to tutuma eya beta txiponja amu ka vhinagre, e txi zomeka ahawa ka litshava, e mninga kasiku e sela, na a txi khene: “Lekani, hi na nga wona mwendo Elija a nata a ta mu txhikisa.”

³⁷ Aniko Jesu a to peka huwa ngu dipswi da hombe, a txi ningela muhefemulo wakwe.

³⁸ Se nguwo ya Dithepele yi to vharuka ngu hagari, kukhukhela txitimwi kala hahatshi.

³⁹ Se nduna ya dizana, yile yi nga ti emile masoni kwakwe, ngako yi di woni ti a nga fisa tona, yi to diwuka yi txi kha yona: “Ngu ditshuri awuwa m'thu i ti Mwanana wa Txizimu!”

⁴⁰ Va ti ti ho kambe vavasikati va nga txi wonetela va di kule; hagari ka vona a ti ti ho Mariya wa Magdhala ni Mariya, mame wa Jakobe wam'dotho, ni Joseti ni Salome.

⁴¹ Avava ngu vale va nga txi mu londisela ni ku mu thumela, mbimo yi ene a nga ti Galileya; ku ti ni vamwanyani vavasikati vavangi, va nga ti kwete kumweko nayo veya Jerusalema.

Kukelelwa ka Jesu

⁴² Mbimo yi ditambo di nga txi ya kuswani, ka ditshiku da kulongisela, ati ti wombako ditshiku di di gametwako ngu Sabbata,

⁴³ Josefa wa Arimateya, i nga ti didhota da nduma ka Dibanza, awuwa nene a nga txi rinzela Mfumo wa Txizimu, a to tsanisa mbilu e tsula ka Pilato eya kombela txirumbi txa Jesu

⁴⁴ Pilato a to xamala ngu kuengisa ti to Jesu se a fite.

⁴⁵ Konaho a to rumela kudhana nduna yile ya dizana, e yi wotisa ti taku a fite kale kani. Se ngako a di zivisilwe ngu nduna ya dizana, Pilato a to rumela ti to txirumbi txi na ningelwe ka Josefa.

⁴⁶ Sekoko, Josefa, msana ka kuva a di xavile dilasoro, a to thavisa mmidi wa Jesu ha txihambanoni, e wu phutela ngu dona, e wu veka diyivani, di nga ti ketwe ha dirigwini; se e wumbuluta txiwindi, a txi khubhunyeta ngu txona diyiva.

⁴⁷ Mariya wa Magdhala ni Mariya, mame wa Joseti, va to wonisisa ahawa va nga mu kelela kona.