Malakiya 4 - Bhiblia Yo Sawuleka

Ditshiku da Mkoma

¹ Nguko wonani taku ditshiku dile, dita di txi tura nga m'dhikila; votshe va va ti kulisako ni votshe va va mahako wubihi, va na nga mwasi, se ditshiku di di nota di na va tshokomisa, kuwomba Mkoma wa Mabutho a Tiyimbi, taku kha di na mbi va siyela mkoloti, mwendo didhavi.

² Aniko kwanu anu mi thavako ditina dangu, ku na huma ditambo da wululamo, se wuhulukisi wu na va hahatshi ka tibhapi ta dona; kambe mi na huma mi txi ndaka-ndaka ku nga marole hahanze ka txibala.

³ Se mi na kandetela vabihi, nguko va na maha dikhuma hahatshi ka mikondo yanu, ka ditshiku dile ni no maha eto, kuwomba Mkoma wa Mabutho a Tiyimbi.

⁴ Alakanyani Mlayo wa Mosi, txithumi txangu, awu ni nga wu rumela kwakwe kona Horebhi ka votshe va ka Israyeli, awu i ku sileleto ni wulamuli.

⁵ Wonani taku ani ni na mi rumela Mprofeti Elija, na ku si se hoka ditshiku da hombe do thisa da Mkoma.

⁶ Se a na hundulusa timbilu ta vatate ka vanana vawe, ni timbilu ta vanana ka vatate vawe; kasi ku ni si ti ni ta peka ditiko ngu txiruko.