Malakiya 1 - Bhiblia Yo Sawuleka

Lirando la Txizimu ka Israyeli

¹ Dipswi da Mkoma do lamula Israyeli, di nga wombwa ngu Malakiya.

² Ani ni mi randile, kuwomba Mkoma: Aniko anu mi khanu: U komba ngu txani ti to u hi randile kani? Ina Esawu hi nga mwanawe wa Jakobe kani? Kuwomba Mkoma; hambi keto ni randile Jakobe,

³ ni nyenya Esawu; mimango yakwe ni yi mahile marumbi, aniko ni ningete thomba yakwe ka maxolwa a txiwulani.

⁴ Hambi ku ngako Edhomi a txo womba a txi khene: Hi mahilwe sisiwana, ngu mhaka yeto, hi na tshumela hi aka marumbini, a womba tiya Mkoma wa Mabutho a Tiyimbi: Vona va na aka, aniko ani ni na hoxota, se va na va dhana ku Ditiko da Wubihi, ni Vathu vale Mkoma a nga va henyela ngu ha ku si gwitiko.

⁵ Maso anu ma na ti wona, se mi na khanu: Mkoma a na kuliswe, kukhukhela mihinganoni ka Israyeli.

Txizimu txa sola vaphaxeli

⁶ Mwanana wa mfana a na thava tate wakwe, ni txithumi txi na thava nyamne wa txona; se, ngako ani ni di tate, txi hayi txithavo kwangu kani? Ngako ani ni di Mkoma, ku hani kuthavwa kwangu kani? Kuwomba Mkoma wa Mabutho a Tiyimbi kwanu, anu vaphaxeli, mi txhipisako ditina dangu, mi txi khanu: Hi di txhipisisa kutxani ditina dako kani?

⁷ Mi ningela sakudya sa nzabwa ka txiluvelo txangu, se mi txi khanu: Hi ku nyenyezisile ngu txani kani? Ka ti mi wombako mi txi khanu: Meza ya Mkoma ya eyiseka.

⁸ Nguko mi txi tisa txihari txi i ku dibhofu, kasi ku ta phaxa ngu txona, kha ta biha! Ni ku ngako mi txi ningela txo limala, mwendo txo lwala, kha ta biha! Se u txi txi ningela ka mthangeli wako, a na kutsakela kani? Ni ku mwendo a na kuamukela kani? Kuwomba Mkoma wa Mabutho a Tiyimbi.

⁹ Konkuwa koko, kombelani ka Txizimu, se txona txi na hi pfela wusiwana; atiya ti tile ngu manzani kwanu, ene a na mi tumela kani? Kuwomba Mkoma wa Mabutho a Tiyimbi.

¹⁰ I mani akuho kambe hagari kwanu, waku a nga seka matimba, kasi ku mi si dhiveli walo mndilo txiluveloni kwangu kani? Ani kha ni tsakiswi ngu nganu, kuwomba Mkoma wa Mabutho a Tiyimbi, kambe kha ni na mbi amukela mphaxo wa manzani kwanu.

¹¹ Se kukhukhela wutxani, kala mswa-ditambo, ditina dangu di na va da hombe hagari ka matiko, aniko ka otshe makhalo, ku na ningelwa dibaselo ni mphaxo wo sawuleka ditinani kwangu; nguko ditina dangu di na va da hombe hagari ka matiko, kuwomba Mkoma wa Mabutho a Tiyimbi.

¹² Aniko anu ma di nyenyezisa, ngako mi txi khanu: Meza ya Mkoma yi nyenyezile, ni siya sa yona, sakudya sa kona, sa eyiseka.

¹³ Se mi khanu: Wonani kunemela ka tona! Se mi ti ningete kutxhipiswani, kuwomba Mkoma wa Mabutho a Tiyimbi; anu mi ningela so piwa, so limala, ni so lwala; se mi mahisa eto miningelo; si amukelwa soneso sa kuta ngu manzani kwanu kani? Kuwomba Mkoma.

¹⁴ Sekoko a na rukwe mkanganyisi wule waku, a di ni txihari ka mtxhambi wakwe, wa thembisa, kambe e ningela ka Mkoma tximaha txo soleka; nguko ani ngani Mfumeli wa hombe, kuwomba Mkoma wa Mabutho a Tiyimbi, ditina dangu di na maha do thisa hagari ka matiko.