Luka 21 - Bhiblia Yo Sawuleka

Mningelo wa noni ya txisiwana

¹ Ngako Jesu a txi guleta maso, a to wona vanyatithombe, va txi thela miningelo yawe amu ka txiya txa msengo wa Dithepele.

² A to wona ni wamsikati wa txisiwana, wa noni, a txi veka konamo simaleana simbidi.

³ Se a txi khene: “Kha ditshuri, ni khani kwanu: Noni yiya ya txisiwana yi ningete kupala votshe.

⁴ Nguko votshe va va nga humisa msengo wa Txizimu, va tekile kutalelwani kwawe; kambe awuwa, atxi a nga txi ningela, a txi tekile wusiwanani kwakwe, i di sotshe si a nga ti khene a na hanya ngu sona.”

Jesu a womba-womba ngu kukhundumuswa ka Dithepele

⁵ Ngako vamwani vokari va nga txi womba-womba ngu Dithepele, ti to di tshurisetwe ngu marigwi o tshura ni miningelo ya sithembiso, Jesu a to angula a txi khene:

⁶ “Mata masiku, aawa, ka sotshe si mi si wonako, ku no mbi sala dirigwi txitimwi ka dirigwi: Sotshe si na khundumuselwa.”

⁷ Vona va to mu wotisa va txi kha vona: “M'gondisi, ti na maheka ditshiku muni toneto kani? Njikombiso muni txi no woneka, kasi kuzivisa ti to eto ti lava kuhumelela kani?”

⁸ Ene a xamute a txi khene: “Ti woneleni, mi si tumeli kukanganyiswa, nguko vavangi va nata ngu ditina dangu, va txi kha vona: ‘Ani ngani’, mwendo kambe ku kha vona: ‘Mbimo se yi hafuhi!’ Mi nga va londeteleni.

⁹ Mbimo yi mi engisako va txi womba ngu tiyimbi ni mazunga, mi nga telweni ngu dizowa: Ti fanete kuthanga toneto ti txi humelela, kambe magwito a totshe kha ma na mbi woneka kunukunuko.”

¹⁰ Sekoko a to va gela ku khene: Lixaka li na wukela limwani lixaka, mfumo wu na wukela wumwani mfumo.

¹¹ Ku na humelela kuzinginikela ka hombe ka mafu, se ka makhalo amangi ku nava ni tinzala ni mitungu. Ku na humelela sidiwukiso so thisa, ni sikombiso sa hombe nzumani.

¹² Aniko ti sinzi kumaheka totshe tiya, va na mi ñola, va txi mi xanisa, va txi mi ningela masinagogani, va txi mi sekela mikorani; va na mi yisa ka vakoma ni vafumeli ngu mhaka ya ditina dangu;

¹³ Se eto ti na mi mahekela, kasi ku miva ni wufakazi.

¹⁴ Ti bhaleni timbiluni kwanu ti to mi nga karatekeni ngu tile mi fanelako ku ti vhikelisa tona,

¹⁵ nguko ani nipune ni na mi ninga mapswi a wuzivi, ayawa valala vanu va no mbi sikota ku ma xula, hambi ku ma kambula.

¹⁶ Mi na ningelwa hambi ngu vatate vanu, ngu vananu ni maxaka anu, ni vandoni vanu; va na daya vamwani kwanu.

¹⁷ Mi na vengelwa ngu votshe ngu mhaka ya ditina dangu.

¹⁸ Aniko kha ku na mbi lova hambi msisi wumwewo wa ha msungoni kwanu.

¹⁹ Ngu kutimisela kwanu, mi na hanyisa mimoya yanu.

Jesu a womba-womba ngu kukhundumuswa ka Jerusalema

²⁰ Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi.

²¹ Sekoko donedo ditshiku, ava va ku Judheya, va na thavele mimangoni; ava va ku didhoropani, va na hume. Se ava va ku tithembweni, va nga thuke ve wulela didhoropani;

²² nguko masikuyo masiku a kupharela, kasiku totshe ti ti nga bhalwa ti hetiseka.

²³ Va nava ni dikhombo va sirumbu ni va kumamisa ka oneyo masiku! Nguko ku nava ni kuxaniseka ka hombe ha mafuni, ni kuhenyelwa ku na wela ditiko diya.

²⁴ Va na wa ngu kudawa ngu ditxhari, va na payulwa ve yiswa ka otshe matiko; se Jerusalema a na kandetelwa ngu vamatiko, kala kuza mbimo ya vamatiko yi va yi di tatisekile.

Kuta ka Mwanana wa M'thu

²⁵ “Ku nava ku di ni sikombiso ha ditamboni, ha mtximani ni tinyeletini. Ha mafuni ku na vaho kuxaniseka ka matiko ngu kuthava diguwa da kudhuma ka mavimbi ni linene.

²⁶ Vathu va na tsivala ngu kuthava makhombo yawa ma no humelela ha ditikoni kotshe: Nguko mitamo ya nzumani yi na dekadekiswa.

²⁷ Konako se va na wona Mwanana wa M'thu a txi txhika a di marefuni, ni mtamo ni wudhumo wa hombe.

²⁸ Mbimo yi ti no khata kuhumelela tiya, gulani maso mi txi wona txitimwi, nguko ku hafuhi kuhanyiswa kwanu.”

Txhamuselo ya mxanvu

²⁹ Se a to womba txifananiso txiya: “Wonani mkuwu ni yimwani mindonga.

³⁰ Mbimo yi yi khatako kuthunga linyenvu, ma tiziva ti to ma hokile malanga.

³¹ Ngu toneto, mbimo yi mi no wona kuhumelela tiya, ti ziveni ti taku wu hokile Mfumo wa Txizimu.

³² Kha ditshuri na mi gela ku khani: Kha li na mbi pinda aliya liveleko, na ti sa humelela tiya.

³³ Nzuma ni mafu si na pinda, aniko mapswi angu kha ma na mbi pinda.”

Kulaveka ka kutiwonela

³⁴ “Kambe ti woneleni, kasiku timbilu tanu ti si thuki ti nemelwa ngu kwa mbi ti pimela, ni wudevi, ni kuvilela ngu sa wutomi wuwa, ti to ditshikudo di si mi ñoli ngu txidhukisa,

³⁵ nga mlawu, nguko di na wela votshe va va nga aka ha mafuni kotshe.

³⁶ Khutalani na mi txi khongela txotshe txikhati, kasiku mi va ni mtamo wa kuhuluka ka totshe ti ti no humelela, ni kuema mi di tsani masoni ka Mwanana wa M'thu.”

³⁷ Ni mitshikari, Jesu a ti zumba a txi gondisa Dithepeleni, kambe ni wusiku a ti huma eya zumba mmangoni, awu wu dhanwako ku mbwa Olivheti.

³⁸ Se votshe vathu va ti vindukela ve ta kwakwe, Dithepeleni, kasi ku ta mu engisa.