Luka 19 - Bhiblia Yo Sawuleka

Jesu ngako a txi endela Zakewu

¹ Jesu a to wulela didhoropani ka Jeriko, se a txi di tshawunyeta.

² Konaho, mmweyo wa mwamna, a nga txi dhanwa ku i Zakewu, mthangeli wa vakhupisi, awu kambe i nga ti nyatithombe,

³ a to humelela a txi lava kuwona Jesu, kasi ku m'ziva ti to i m'thu wo txani. Aniko asi sikoti ku mu wona, ngu mhaka ya kutsivelwa ngu vathu, nguko ene i ti wo koma.

⁴ Se a to tutuma eya masoni kwawe, eya kwela ka mkuwu wokari, kasi ku a txi sikota ku mu wona, nguko Jesu a ti ti fanela kupinda ngu kona hale.

⁵ Mbimo yi Jesu a nga hoka ka wukhalo wule, a to gula maso a txi mu wona, se a txi khene kwakwe: “Zakewu, kuluveta u txhika, nguko nyamsi ni fanela kuya zumba m'tini kwako.”

⁶ Se ene a to txhika ngu txikuluveta, a txi mu amukela ngu kutsaka.

⁷ Mbimo yi va nga wona tiya, votshe va to khata kungungurukela, va txi kha vona: “A endela nyumbani ka muonhi.”

⁸ Zakewu ene, a di emile, a ti khene ka Mkoma: “Mkoma, ni lava kuninga sisiwana hafu ya yotshe thomba yangu, se ngako a diho awu ni nga mu dyelela, ni na mu tshumetela sile ni nga mu pela, si di engetetwe ka mune.”

⁹ Jesu a xamute a txi khene: “Nyamsi kuhanyiswa kuwulete nyumbani muwa, nguko awuwa nene i mwanana wa Abrahamu.

¹⁰ Nguko kunene Mwanana wa M'thu a tete ku ta lava ni kuhanyisa ava va nga ti mwalate.”

Txidinganiso txa tipondo ta digumi

¹¹ Ku ti ngako vona va txi engisa timhaketo, Jesu a to engeta e va gela txidinganiso, nguko a ti hafuhi ni Jerusalema, se vona va ti pimisa ti to Mfumo wa Txizimu wu na kuluveta kuhumelela.

¹² A txi khene: “M'thu wa nganakana a to endela ditikoni ka kule, kuya fumiswa wukoma, e tshumela e wuya.

¹³ Ku ti ngako a di dhani sithumi sakwe sa digumi, a to si ninga digumi da tipondo, a txi khene kwawe: ‘Ti bhinduliseni kala kuza ni wuya.’

¹⁴ Aniko vathu va ditiko dakwe va ti mu vengela, ve ruma mitumi msana kwakwe, kuya womba tito: ‘Kha hi ti lavi kufumwa ngu m'thu wuwa.’ ”

¹⁵ “Ngako a di wile ngu kuya fumiswa wukoma, a to rumela kudhanwa sithumi sakwe, asi a nga ti si ningile male, kasi kuziva ti to nji txani mmwani ni mmwani a nga bhindula ngu yona.

¹⁶ A to ta wo thanga, a txi khene: ‘Mkoma, pondo yako yi bhindute digumi da tipondo.’

¹⁷ Se ene a txi khene kwakwe: ‘Ngu tona, txithumi txa txinene, akuwa u nga thembeka ngu txilo txa txidotho, u na fuma digumi da madhoropa.’

¹⁸ Wa wumbidi a tile a txi ta khene: ‘Mkoma, pondo yako yi bhindute mtxhanu wa tipondo.’

¹⁹ Se ene a txi khene kwakwe: ‘Nawe fuma mtxhanu wa madhoropa.’

²⁰ Mmwani a tile a txi ta khene: ‘Mkoma, pondo yako i ngadi yona yiya, ni nga yi sungelela mu ka difadhuko;

²¹ Nguko ni thavile, nguko u ku m'thu wo karata: U teka txi u nga mba txi veka, u elula txi u nga mba txi phaya.’

²² Aniko ene a ti khene kwakwe: ‘Txithumi txo biha, ni ku abanisa ngu kuwomba kwako. U ti zivile ti to ni m'thu wa tshofu, ni teka txi ni nga mbi txi veka, ni elula txi ni nga mbi txi phaya.

²³ Idito, njani u nga mba veka male yangu kubhindulisani kani? Kuwuyani kwangu ni ndi nata yi teka kumweko ni yi yi nga bhindulwa.’

²⁴ Se a txi khene ka va va nga ti koneho: ‘Mu tekeleni pondoyo, mi yi ningela ka wu a ku ni digumi da tipondo.’

²⁵ Se vona va txi kha vona kwakwe: ‘Ene ana ni digumi da tipondo.’

²⁶ Jesu a txi khene: ‘Na mi gela ti taku wuhi ni wuhi a ku naso, a na ningwa simwani, aniko awu a ku si nga naso, a na tekelwa hambi sona si a ku naso.

²⁷ Se valala vangu, ava va nga mbi ti lava ku ni va fuma, va tiseni hawa, mi va daya masoni kwangu.’ ”

Jesu e wulela ngu wudhumo Jerusalema

²⁸ Ngako a di wombile timhaka tiya Jesu a to thangela masoni ka vagondiswa vakwe, veya Jerusalema.

²⁹ Mbimo yi va nga txi lava kuhoka Bhetfage ni Bhetaniya, hafuhi ka mmango wa Miolivha, Jesu a to rumela vambidi ka vagondiswa vakwe, a txi va gela ku khene:

³⁰ “Tsulani ka m'ti wule wu ku masoni: Mbimo yi mi no wulela, mi na ya mana tximbongolana txi di sungilwe, atxi txi sinziko kugadhwa ngu m'thu. Txi thukunyuleni mi wuya natxo hawa.

³¹ Ngako m'thu wokari a txi mi wotisa tito: ‘Mi txi thukunyulela txani kani?’ Mi na khanu: ‘Mkoma, ngene a txi lavako.’ ”

³² Avale va nga rumwa va to tsula veya mana kota nga ti ene a nga va gelisa tona.

³³ Mbimo yi va nga txi thukunyula tximbongolana, vanyamne va to wotisa ku kha vona: “Mi thukunyulela txani tximbongolanetxo kani?”

³⁴ Vona va to angula va txi kha vona: “Mkoma ngene a txi lavako.”

³⁵ Se va to tsula ni tximbongolana ka Jesu, ve kapeka tinguwo tawe txitimwi ka txiona, ve gadhisa Jesu.

³⁶ Mbimo yi Jesu a nga txi ya masoni, vathu va to atetela tinguwo tawe ha nzila.

³⁷ Se ngako a txi relela kuya dithekani ka mmango wa Miolivha, otshe mabutho a vagondiswa, ma ti ti dhumisa Txizimu ngu kutsaka, ngu dipswi do pfala, ngu mhaka ya sixamaliso si va nga si wona. Va txi kha vona:

³⁸ “A na dhumiswe Mfumeli wu a tako, ngu ditina da Mkoma. Kudikha ku na tale nzumani, ni kupfaliswa ka Nyatxitimwi!”

³⁹ Vafarisi, va nga ti hagari ka dibutho, va to gela Jesu va txi kha vona: “M'gondisi, hinga kawuka vagondiswa vako.”

⁴⁰ Kambe Jesu a va angute a txi khene: “Na mi gela ku khani: Ngako vona va txi malala, marigwi ma na kwangula.”

Jesu e dila ngu kutsetsa Jerusalema

⁴¹ Ngako a di hafuhi, a to wona didhoropa e di dilela.

⁴² A txi khene: Yowe! Idiku na nawe u ti zivile nyamsi timhaka ti ti ku tiselako kudikha! Kambe konkuwa ti sisalekile masoni kwako.

⁴³ Nguko ma nata masiku txitimwi kwako, aawa valala vako va nota kubhiyela ngu ona, ve kuranganyeta, ve ku tsivela ngu otshe madhawa.

⁴⁴ “Va na kudikha hahatshi, awe ni vanana vako, va ku kwako. Kambe kha va na mbi siya kwako dirigwi txitimwi ka dirigwi, nguko khwa ziva mbimo yi u nga endelwa ngu yona.”

Jesu a txi basisa Dithepele

⁴⁵ Ngako a di wulete Dithepeleni, a to khata kutovela hahanze votshe va va nga ti xavisela kona, a txi khene kwawe:

⁴⁶ Kubhatwe tito: “Nyumba yangu yi na va i di nyumba ya mikombelo; kasi anu mi yi maha m'bhala wa makhamba.” Se a ti ti gondisa Dithepeleni otshe masiku.

⁴⁷ Kambe vaphaxeli va hombe ni vabhali ni madhota a ditiko, va ti lava ku m'daya.

⁴⁸ Aniko ve tandeka kumana nzila yo ti maha eto, nguko votshe vathu va ti namarete ka mapswi akwe, va txi mu engisa.