Luka 1 - Bhiblia Yo Sawuleka

Txiwuletiso

¹ Vathu vavangi va duketile kuxawutela ngu mibhalo mahungu awa ma nga humelela hagari kwathu;

² avava va nga hi xawutela tona ngu vale, kukhukhela makhatoni, va nga ti wona ngu maso awe, na kambe i di vatxhumayeli va Dipswi.

³ Anani ni ti woni ti di ni fanelo ku kubhalela, ngu nzila yi yi lavekako, awe wa hombe Teyofilo, msana ka kusetxha totshe kha kwati, kukhukhela makhatoni ka tona,

⁴ kasiku u txi ziva ditshuri do tsana ka tigondo ti u nga ti amukela.

M'biko wa kuvelekwa ka Johani Mubhabhatisi

⁵ Ka masiku a Herodha, mfumeli wa Judheya, ku ti ni mphaxeli, awu a nga ti dhanwa ku i Zakariya, wa mtxawa wa Abhiya. Msikati wakwe i ti wa lixaka la ka Aroni, ditina dakwe a ti dhanwa ku i Izabheli.

⁶ I ti vathu vo lulama ngu wumbidi wawe masoni ka Txizimu, va txi veketa va si solwi ngu m'thu, sotshe sirumo ni milayo ya Mkoma.

⁷ Va ti si nga ni vanana, nguko Izabheli i ti txifule, kambe ngu wumbidi wawe va ti kumbile.

⁸ Sekoko Zakariya, ngako a di ha mthumoni kwakwe ka wuphaxeli masoni ka Txizimu, madingano ni kuruma ka mlayo wa mtxawa wakwe,

⁹ a to hokelwa ngu txikhati txakwe txa kuwulela wukhaloni ko sawuleka ka Dithepele da Mkoma, kasi kuya hisa dibaselo.

¹⁰ Dotshe dibutho di ti ti khongela, di di hahanze ngu mbimo ya dibaselo.

¹¹ Sekoko Ngelozi ya Mkoma yi to ti wonekisa kwakwe, yi di emile ngu didhawa da txinene ka txiluvelo txa dibaselo.

¹² Ngako a txi yi wona, Zakariya a to wika msana, a txi telwa ngu dizowa.

¹³ Aniko ngelozi yi m'gete, yi txi kha yona: “U nga thave, Zakariya, mkombelo wako wu engisilwe. Izabheli msikati wako, a na kuvelekela mwanana wa m'zambi, awu u no m'raya ditina da Johani.

¹⁴ U na va ni kutsaka, ni kunengela, se vavangi va na tsakela kuvelekwa kwakwe.

¹⁵ Ene a na va i di wa hombe masoni ka Mkoma, kha na mbi sela vhinya mwendo wusuke wo levisa, a na tala ngu Moya wo Sawuleka a di ngadi mndani ka mame wakwe;

¹⁶ Se a na wuyisa vanana vavangi va Israyeli ka Mkoma, Txizimu txawe.

¹⁷ A na thangela masoni ka Mkoma ngu moya ni mtamo wo fana ni wa Elija; a na wuyisa timbilu ta vaveleki ti ta manana ni ta vanana vawe; a na wuyisa vaeyisi ka wuzivi wa valulami, kasiku e lulamisela Mkoma ngamu yi yi hanelako ene.”

¹⁸ Zakariya a xamute ka ngelozi a txi khene: “Ni na ti zivisa kutxani toneto, eko ni nga kumba, msikati wangu nene i ku txikosana kani?”

¹⁹ Ngelozi yi xamute yi txi kha yona: “Ani ngani Gabriyele, wule a emako masoni ka Txizimu, ni rumetwe ku ta womba-womba ni nawe ni ku ta ku xawutela mahungu awa amanene.

²⁰ U na zumba u di txiduma, u si sikoti kuwombawomba kala ditshiku di ti no maheka ngu dona totshe tiya, nguko khwa tumela mapswi angu, aawa ma no tatiseka ngu mbimo yi yi lavekako.”

²¹ Se dibutho di ti verela Zakariya, di txi xamala kuswela kwakwe wukhaloni mule ko Sawuleka.

²² Mbimo yi a nga huma, a to tandeka kuwombawomba navo, se vona ve tiziva ti to a woni txiwoniso Dithepeleni. A ti ko maha ngu kuxungametela, e zumba i di txiduma.

²³ Ma di pindile masiku a mthumo wakwe, a to wuya m'tini.

²⁴ Msana ka masiku awa, msikati wakwe Izabheli a to mama txirumbu, se e zumba a txi ti sisa mtxhanu wa mitxima;

²⁵ A txi khene: “Ati ngu tiya Mkoma a nga ni mahela tona ka masiku awa ene a nga ni wona kasi ku ni thavisa tingana, hagari ka vathu.”

M'biko wa kuvelekwa ka Jesu

²⁶ Se ka mtxima wa wutxhanu ni wumwewo wa txirumbu txa Izabheli, yi rumetwe ngelozi Gabrieli ngu Txizimu ka didhoropa da Galileya, adiya di dhanwako ku i Nazareta;

²⁷ Yi txi ya ka mbiri, yi nga ti thembisilwe ngu dizambi di di nga ti dhanwa ku i Josefa, wa kuhumela ka lixaka la Dhavhidha. Ditina da mbiri yileya i ti Mariya.

²⁸ Se, ngako ngelozi yi di wulete ahawa ene a nga ti kona, yi to kha yona: “Xewe, awe wo kateka, Mkoma ana ni nawe.”

²⁹ Ka mapswi awa, ene a to bhibhika khana, e khata kupimisa ti to maloselo awa nga txani?

³⁰ Se ngelozi yi wombile kwakwe yi txi kha yona: “Mariya, u nga thave, nguko u mani dithomo masoni ka Txizimu;

³¹ U na mana txirumbu, u txi veleka Mwanana wa m'zambi, awu u no m'raya ditina daku i Jesu;

³² Ene a na va i di wa hombe, kambe a na dhanwa ku i ‘Mwanana wa Nyatxitimwi.’ Mkoma Txizimu a na mninga txikhalo txa tate wakwe Dhavhidha;

³³ A na fuma yotshe mbimo ka nyumba ya Jakobe, se mfumo wakwe kha wu na mbi va ni magwito.”

³⁴ Mariya a nje khene ka ngelozi: “Ti na mahekisa kutxani tiya, eko ni si ziviko wamwamna kani?”

³⁵ Se ngelozi yi to mu angula tiya: “Moya wo Sawuleka wu na txhika txitimwi kwako, se mtamo wa Nyatxitimwi wu na kufenengeta ngu mtsudi wakwe. Ngu toneto, Msawuleki wu a no velekwa a na dhanwa ku Mwanana wa Txizimu.

³⁶ Hambi dixaka dako Izabheli ana ni txirumbu nene, kukumbani kwakwe, se awuwa i mtxima wa wutxhanu ni wumwewo, kwakwe va nga ti mu womba ku njifule;

³⁷ Nguko ka Txizimu ti walo to tandeka.”

³⁸ Konaho, Mariya a to khene: “Ngani wuwa txithumi txa Mkoma, ti na maheke kwangu nga ti u wombisako tona.” Se ngelozi yi khukha yi mu siya.

Mariya e endela Izabheli

³⁹ Ka ale masiku, Mariya a to teka dipfhumba a txi tsula ngu kukuluveta, a txi ya ka ditiko da situnga, didhoropani ka Judha.

⁴⁰ A to wulela m'tini ka Zakariya, eya losa Izabheli.

⁴¹ Neti Izabheli a txi engisa kuloswa ngu Mariya, mwanana a to sinyasinya mndani kwakwe, se Izabheli a to tala ngu Moya wo Sawuleka;

⁴² se a txi angula ngu dipswi da kuengiseka a txi khene: “U katekile hagari ka vavasikati, wu katekile ni wona m'hando wa mndani kwako.

⁴³ Se ti khukhela hani ti to teka ani ni ta dingulwa ngu Mame wa Mkoma wangu kani?

⁴⁴ Txikhati txi ni nga engisa dipswi dako u txi ni losa, mwanana a sinyile mndani kwangu ngu litsako.

⁴⁵ U katekile awe u nga tumela, nguko ti na maheka kwako ati ti nga wombwa ngu Mkoma.”

Ndando ya Mariya

⁴⁶ Sekoko Mariya a to khene: “Dihika dangu da dhumisa Mkoma,

⁴⁷ ni moya wangu wu tsakela Txizimu, Muhanyisi wangu,

⁴⁸ Nguko a woni kutiveka hahatshi ka txithumi txakwe; ngu toneto kukhukhela konkuwa, ni na dhanwa ku ni wo kateka ngu totshe tixaka ta vathu.

⁴⁹ Nguko Nyamitamo a mahile kwangu timhaka ta hombe; ditina dakwe di sawulekile.

⁵⁰ Ni wumbilu wakwe wu tshanganile ka liveleko ni liveleko la vale va mthavako.

⁵¹ A thumile ta hombe ngu diwoko dakwe, a hangalasile ava va nga txi ti kukumukisa ka mialakanyo ya timbilu tawe.

⁵² A va txhikisile hahatshi ka sikhalo sawe sa wukoma avale va mtamo, a txi guleta ava va kutiveka hahatshi.

⁵³ Avale va nzala a va khurisile ngu sa sinene, e hangalasa avale va kutithemba, na va si nga ni txilo manzani.

⁵⁴ A vhunetete Israyeli, i ku txithumi txakwe, na a txi alakanya wumbilu wakwe,

⁵⁵ a nga wu thembisa ka vakokwani vathu, ka Abrahamu ni liveleko lakwe kala kupinduka.”

⁵⁶ Mariya a zumbile ni Izabheli mitxima yiraru, ngu msana e tshumela e tsula m'tini kwakwe.

Kuvelekwa ka Johani Mubhabhatisi

⁵⁷ Ku ti ngako Izabheli a txi hokelwa ngu txikhati txa kuhefemula, a to veleka mwanana wa txizambzana.

⁵⁸ Vaakelani vakwe ni maxaka, ngako va di ti zivile ti to Mkoma a kombisile wumbilu wakwe kwakwe, va to tsaka nayo.

⁵⁹ Ka ditshiku da wutxhanu ni mararu, va tile va ta mu yisa wukwerani, va txi lava ku m'raya ditina da tate wakwe, Zakariya.

⁶⁰ Aniko mame wakwe a to angula a txi khene: “Lambi! Ene a na dhanwa ku i Johani.”

⁶¹ Vona va ti kha vona: “Kha ku nga ho ni mmweyo hagari ka maxaka ako, awu a ku ni ditinedo.”

⁶² Se vona, va txi maha ngu kuxungametela, va to wotisa ka tate wakwe ti to ene a lava ku a txi raywa ditina da mani.

⁶³ Ene a to kombela txileti a txi bhala ku khene: “Ditina dakwe i Johani.” Votshe va to xamala.

⁶⁴ Kunukunuko txi to tuleka txisofu txakwe, li txi txhatxheka lidimi lakwe, a txi khata kuwombawomba, a txi dhumisa Txizimu.

⁶⁵ Votshe vaakelani vakwe va to telwa ngu kuthava, se timhaka tiya ti txi hangalaka ni dotshe ditiko da mmango wa Judheya.

⁶⁶ Votshe va va nga txi tiengisa, va ti ti veketa hakhana kwawe, va txi kha vona: “A nava i di wo txani ene mwanana wuwa kani?” Kunene mtamo wa Mkoma wu ti ni nene.

Txiprofeto txa Zakariya

⁶⁷ Konako Zakariya, tate wakwe, a to tala ngu Moya wo Sawuleka, a txi profeta a txi khene:

⁶⁸ “A na dhumiswe Mkoma, Txizimu txa Israyeli, nguko a endete vathu vakwe, a txi va tirula.

⁶⁹ A hi wusete Muhanyisi wa mtamo ka nyumba ya Dhavhidha, txithumi txakwe.

⁷⁰ Nga ti a nga womba kale ngu txisofu txa vaprofeti vakwe vo sawuleka.

⁷¹ Kufela ku a txi hi hanyisa ka valala vathu ni ka manza a votshelele va va hi vengelako.

⁷² Kasiku e maha wumbilu ka vatate vathu, a txi khumbuka txitumelelano txakwe txo sawuleka.

⁷³ Ni txixambanyo txi, a nga maha ka tate wathu Abrahamu,

⁷⁴ txa ku hi ninga tito, hi di hulukile manzani ka valala vathu, hi txi mu thumela, hi si thavi txilo.

⁷⁵ Ngu kubasa ka mbilu ni kululama masoni kwakwe, ka otshe masiku a kuhanya kwathu.

⁷⁶ Se awe, mwananawe, u na dhanwa ku u mprofeti wa Nyatxitimwi; nguko u na thangela masoni ka Mkoma, kasi kululamisela tinzila takwe.

⁷⁷ Kasi kuzivisa kuhanyiswa ka vathu vakwe ni kudivalelwa ka sionho.

⁷⁸ Ngu wumbilu wa hombe wa Txizimu txathu, ha mana kuendelwa ngu wutxa wa kuta ngu txitimwi;

⁷⁹ ku ta woninga ava va manekako mtemani ni mtsudini ka lifo, ni ku hi tsimbilisa ngu nzila ya kudikha.”

⁸⁰ Se mwanana a ti ti kula, a txi mana mtamo moyani. Se a ti zumba txiwulani kala ditshiku da kutiwonekisa kwakwe ka Israyeli.