Levhi 9 - Bhiblia Yo Sawuleka

Aroni e ningela miphaxo

¹ Ngu ditshiku da wutxhanu ni mararu, msana ka m'buso, Mosi a to dhana Aroni ni vanana vakwe kumweko ni madhota a ka Israyeli;

² A to khene ka Aroni: Teka dirole, kasi kumaha ngu dona mhamba yo kuwula txionho, ni hamba yo maha mningelo wo hiswa, sihari siya ngu si so mbi na sibawa, u na si ningela ka Mkoma.

³ Ngu msana, womba ka va ka Israyeli u txi khawe: Tekani mabhongwe, e mahwa mhamba yo thavisa txionho, ni dirole, ni txihambana, sa dilembe dimwedo, so mbi na sibawa, kasi kumaha mningelo wo hiswa,

⁴ kumweko ni homu ya matune ni hamba, sihari siya mi na si ningela ka Mkoma, ngu mhamba ya mpatano, ni wumwani mningelo wa mpupu, wo vhuwa ni mtona, nguko nyamsi, Mkoma a lava ku ti wonekelisa kwanu.

⁵ Sekoko vona va to teka sotshe si Mosi a nga si leletela, ve si tisa ha txikeni ka ditenda da msengeletano wotshe wa ka Israyeli, wu nga tshuketa hafuhi ka Mkoma, wu txi ema kona.

⁶ Se Mosi a to khene: Ni na mi txhamusela mithetho yi Mkoma a nga ni ninga. Ngako mi txi yi vekisa, mi na sikota kuwona mtamo wakwe wo sawuleka.

⁷ Se Mosi a to khene ka Aroni: Tshuketa ha txiluveloni, u maha mphaxo wako wa txionho, ni mningelo wa mhamba yo hiswa, u maha mhamba ya kudihela txionho, ngu didhawa dako ni didhawa da vathu, ngu toneto kambe, maha mningelo wa mhamba ya vathu votshe, u va mahela mhamba yo divalelwa txionho, nga tonti a nga womba Mkoma Txizimu.

⁸ Sekoko Aroni a to tshuketa hafuhi ka txiluvelo, e wila thamo ya dirole da mhamba yo thavisa txionho, ngu ditina dakwe.

⁹ Vanana va Aroni va to mninga mnoha, aha Aroni a nga beta litiho e li nakanisa, a txi tota mnoha aha ka titshoka ya txiluvelo, se a to thela mnoha hafuhi ka txiluvelo, awu wu nga sala.

¹⁰ A to hisa mafura a dirole ha txiluveloni, titsho ni diwomba da txivindi, nga tonti Mkoma a nga gelisa tona Mosi.

¹¹ Kambe nyama ya kona ni didhowo, a to si vinza ha mndiloni, hahanze ka wugovelo.

¹² Aroni a to wila thamo ya txihari txa mhamba yo hiswa. Se vanana vakwe va to mningeta mnoha, aha Aroni a nga xwayela ngu wona txiluvelo ka otshe madhawa.

¹³ Ngu msana ka kona, va to mninga nyama ya mhamba yo hiswa na yi di wiletwe ngu sihango, kumweko ni msungo, se ene e si hisa sotshe ha txiluveloni.

¹⁴ Msana ka kuva a di kuwute masembe ni maswondo, a to si hisa ni sona ha txiluveloni, kumweko ni mhamba yo hiswa.

¹⁵ Ngu msana kambe, Aroni a to tisa mningelo wa vathu votshe. A to wila thamo ya mabhongwe, wu vathu va nga ningela kasi thavisa txionho, e maha mhamba yakwe, nga tonti a nga maha kukhatani.

¹⁶ A mahile kambe mningelo wo hiswa, e maha totshe nga ti ti nga emiselwa ngu mthetho.

¹⁷ A ningete kambe mningelo wa mpupu, awu a nga wela dianza do tala, ti to e wu hisa ha txiluveloni, kumweko ni mningelo wa mhamba yo hiswa, ni mixo.

¹⁸ Sekoko, a to wila thamo ya didhuna ni ya hamba, si txi va i di mhamba ya mpatano, yo mahwa ngu vathu; vanana va Aroni va to mninga mnoha awu a nga xwayela ngu wona aha ka txiluvelo, ka madhawa otshe.

¹⁹ Ngu mhaka ya mafura a didhuna ni a hamba, dibhesa, mafura awa ma pomelako titsho, ni diwomba da txivindi,

²⁰ va to si veka ni sona txitimwi ka khana ya sihari, se Aroni a to si hisa sotshe ha txiluveloni.

²¹ Ngu khana ni txiphanga txa txinene, Aroni a to si maha mningelo wo ndiwitela, masoni ka Mkoma, nga tonti Mosi a nga wombisa tona kukhatani.

²² Msana keto, Aroni a to guleta manza txitimwi ka vathu, e va katekisa; se a to relela a di gwitile kumaha mningelo wo divalela sionho, ni mningelo wo hiswa, ni mningelo wa kudikha.

²³ Sekoko Mosi, a to wulela ditendani ka msengeletano kumweko ni Aroni, mbimo yi va nga huma, va to katekisa vathu. Se Mkoma a to kombisa mtamo wakwe wo xamalisa ka vathu votshe.

²⁴ Ngu masoni ka Mkoma, ku to huma mndilo wu wu nga hisa mningelo wo hiswa, ni mafura awa ma nga ti ngu txitimwi ka txiluvelo. Mbimo yi vathu va nga ti wona totshe tiya, va to kwangula ngu kutsaka va txi ti wisa hahatshi, ngu tikhohe tawe.