Levhi 6 - Bhiblia Yo Sawuleka

¹ Mkoma a to womba kambe ka Mosi, a txi khene:

² Ngako m'thu wokari a txi onha, a txi wukela Mkoma, e kanganyisa ngu kwa mbi tshumeta ka mwakelani wakwe, asile a ku naso, mwendo ku mpela, mwendo ku mlambela, e ti tsimba ngutu ka mwakelani wakwe;

³ mwendo a di rote txile txi ngadi mwalate, se a txi mlambela ngu kuxambanya makuhu, mwendo kumha ni txihi ka sotshe sile si onhisako m'thu,

⁴ ti na maheka koko taku, ngako a di onhile e maneka a di ni mnandu, e tshumeta sile a nga pa, mwendo sile a nga lamba naso, ngu kutitsimba, mwendo sile a nga ti ti ningilwe ku si xayisa, mwendo sile so mwalala a nga si rola,

⁵ mwendo ngu sotshe sile a nga xambanya ngu makuhu; se a na si tshumeta sotshe, e sanzekela ngu mpimwanyana wa wutxhanu; ngu ditshiku da mningelo wa kudivalelwa ka mnandu wakwe, a na si ningela ka nyamne wa sona.

⁶ Se a na tisa ka Mkoma, hamba ya kwa mbi na txibawa ya mtxhambi, kasi ku va mningelo wakwe wa kudivalelwa mnandu; madingano ni ti u no ti wonisa tona, u si tisa ka mphaxeli.

⁷ Kambe mphaxeli a na maha mningelo wa kudivalelwa ngu wona masoni ka Mkoma, se a na divalelwa ka totshe tile a nga maha ti txi mmanisa mnandu.

Miningelo yo hiswa

⁸ Mkoma a to womba kambe ka Mosi, a txi khene:

⁹ Laya Aroni ni vanana vakwe u txi khawe: Mlayo wa mningelo wo hiswa ngu wuwa: Mningelo wu na hiswa ha txiluveloni wotshe wusiku kala ni mixo, se wu na turiswa ngu mndilo ha txiluveloni.

¹⁰ Se mphaxeli a na ambala syambalo sakwe sa linyu, a txi ambala dibhuluku da linyu, se a na thavisa dikhuma, msana ka kuva mndilo wu di tshokomisile mningelo wo hiswa ha txiluveloni, a txi di veka didhawa ka txiluvelo.

¹¹ Msana keto, a na ambula syambalo sakwe, a txi ambala simwani syambalo, se a na tsula ni dikhuma hahanze ka wugovelo, ka wukhalo wo basa.

¹² Mndilo koko wu na tura txitimwi ka txiluvelo, kha wu na mbi timeka; kambe mphaxeli a na engetela tikhuni ka wona mixo ni mixo, e veka kha kwati mningelo wo hiswa txitimwi ka txiluvelo, se ngu txitimwi ka kona a na hisa mafura, a miningelo ya mpatano.

¹³ Mndilo wu na tura yotshe mbimo ha txiluvelo; kha wu na mbi timeka.

Miningelo ya timbewu

¹⁴ Mlayo wa mningelo wa sakudya ngu wuwa: Wu na ningelwa ngu mmweyo wa vanana va Aroni ka Mkoma, masoni ka txiluvelo.

¹⁵ Se a na tata dianza ngu mpupu wa wunene wa mningelo, ni mtona wa kona, ni dotshe dibaselo di di ku txitimwi ka mningelo wa sakudya; sekoko e wu hisa ha txiluveloni; ewo mbwo bhumula, ngu ku va i di wa txialakanyiso ka Mkoma.

¹⁶ Se wule wu salako va na dya, Aroni ni vanana vakwe; sa kwa mbi tshumbela si na dyelwa wukhaloni ko sawuleka; si txi dyelwa mtendelani ka ditenda da msengeletano.

¹⁷ So tshumbelwa kha si na mbi bhikwa; thomba yawe ngu yi ni nga va ninga ka miningelo yangu yo hiswa; nzo sawuleka ngutu, kufana ni mningelo wa kudivalelwa ka txionho, ni kufana ni kudivalelwa ka mnandu.

¹⁸ Votshe vavamna hagari ka vanana va Aroni, va na dya sa mningelo wa sakudya; txi na va txileleto txa kwa mbi gwita ka tihunzu tanu, hagari ka miningelo yo hiswa ka Mkoma; ni wihi a no si gwesa a na sawuleka.

Mningelo mbimo ya kutotwa ka vaphaxeli

¹⁹ Mkoma a to womba kambe ka Mosi a txi khene:

²⁰ Awuwa mningelo wa Aroni ni vanana vakwe, va no ningela ka Mkoma, ka ditshiku dile wene a no totwa ku va mphaxeli: Mpimo wa wugumi wa efa wa mpupu wa wunene, ngu mningelo wa sakudya; hafu yimweyo ni mixo, yimwani hafu ni minova.

²¹ Si na kanyangelwa ni mtona; amu ka dipani; se sitxuwu so bhikwa sa mningelo, u na maha ngu sona miningelo wo bhumula ka Mkoma.

²² Vavamna va i ku ngamu ya vaphaxeli, ngu vona dwe va ku ni fanelo yo dya ni vona yona nyama yiya, nguko i nyama yo sawuleka.

²³ Ngu kumaha keto, wotshe mningelo wa mphaxeli wu na hiswa; kha wu na mbi dyiwa.

Mningelo wo thavisa txionho

²⁴ Mkoma a to womba kambe ka Mosi, a txi khene:

²⁵ Gela Aroni ni vanana vakwe, u txi khawe: Mlayo wa kudivalelwa ka txionho ngu wuwa: Ka wukhalo wule ku dawako mningelo wo hiswa, ku na dawa mningelo wa kudivalelwa ka txionho, masoni ka Mkoma; se wu sawulekile ngutu.

²⁶ Mphaxeli wule a no wu mingela ngu mhaka ya txionho, a na dya; wu na dyelwa ha wukhaloni ko sawuleka, ha mtendelani ka ditenda da msengeletano.

²⁷ Ni txihi txile txi no gwesa nyama yile, txi na sawuleka; ngako mnoha wa kona wu txi xwayela txyambalo txa m'thu wokari, u na kuwula txile txi nga txabwaketelwa, ka wukhalo wo sawuleka.

²⁸ Se khadi yile yo wumbwa yi na bhikelwa ka yona nyama; aniko ngako yi txi bhikelwa ka khadi ya koporo, yi na guvwa, ni kukuwulwa amu ka mati.

²⁹ Nyama yiya, yi na dyiwa ngu votshe vavamna vale i ku vaphaxeli; yi na va yi di sawulekile ngutu.

³⁰ Kambe kha ku na mbi dyiwa ni sa mphaxo ni wawumwewo wa kudivalelwa ka txionho, awule mnoha wa kona wu tiswako ditendani ka msengeletano, kasi ku ta sawulekisa nyumbani; wu nga dyiwe, wu na hiswe ha mndiloni.