Levhi 3 - Bhiblia Yo Sawuleka

Miningelo ya kuthutha

¹ Se ngako mningelo wakwe i di wa mhamb ya mpatano, ngu homu, wa sikota kuningela ka Mkoma matune mwendo mkati, aniko kulaveka i di so mbi na txibawa.

² A na sanzeka dianza dakwe ha msungo ka txihari txi a no maha mhamba ngu txona, a na txi wila mkolo a di ha txikeni ka ditenda da msengeletano. Se vaphaxeli, i ku vanana va Aroni, va na xwayela ngu mnoha wa txona madhawani ka txiluvelo.

³ Ka yona mhamba yiya ya kudikha, mphaxeli a na hisela Mkoma otshe mafura ma ku mndani ka mrumbu wa txihari.

⁴ Sekoko totshe titsho tatimbidi, ni mafu ale ma nga namarela ka titsho ni ka masembe, ni sile si nga pambiyeta txivindi, u na ma thavisa kumweko ni titsho.

⁵ Se vanana va Aroni, va na si hisa sothseso ha txiluveloni, kumweko ni mningelo wo hiswa, wu wu no hiswa txitimwi ka tikhuni. Awu mningelo wu na hiswa kasi kudhumisa Mkoma, yi txi maha mhamba ya ku mtshakisa.

⁶ Se ngako mningelo wa kuthutha ka Mkoma ngu txihari txa txidotho, ngu mhamba ya mpatano, wa sikota kumaha ngu txihari txa matune mwendo txa mkati, aniko txo mbi limala.

⁷ Ngako u txi ningela ngu txinvutana ka mningelo wako, tsula u ya txi ningela masoni ka Mkoma.

⁸ Se u na sanzeka dianza dako ha msungo, ka txihari txi u txi ningelako, u txi txi wila mkolo, hafuhi ka ditenda da msengeletano; se vanana va Aroni va na xwayela ngu mnoha wa txihari kotshe madhawani ka txiluvelo.

⁹ Sekoko ka wona mphaxowo wa kuthutha, asiya si fanelako kuhiswa si maha mhamba ka Mkoma, ngu mafura, mkila wo wilwa ta tinene ngu ha tshina, ni otshe mafura, ni mafura otshe ma ku mndani ka mrumbu wa txihari,

¹⁰ titsho tatimbidi ni mafura ya ma ti pomelako, ni diwomba da txivindi, ni mafura ya ma txi pomelako, ma thaviswako kambe, kumweko ni titsho.

¹¹ Se mphaxeli a na si hisa sotshe ha txiluveloni; nzakudya sa mningelo wo hiswa ka Mkoma.

¹² Aniko, ngako mningelo i di wa phongo, wu na ningelwa masoni ka Mkoma.

¹³ Se a na sanzeka dianza ha msungo ka yona, e yi wila mkolo masoni ka ditenda da msengeletano. Vaphaxeli i ku vanana va Aroni, va na xwayela ngu mnoha otshe madhawa a txiluvelo.

¹⁴ Msana keto, a na maha mningelo ngu yona, yi maha mhamba yo hiselwa Mkoma, i ku mafura awa ma pomelako masembe, ni otshe mafura awa ma pambiyetako,

¹⁵ a na thavisa titsho tatimbidi ni mafura ya ma nga ti pomela, ni diwomba da txivindi, kumweko ni mafura ma nga txi pomela, ni titsho ta kona.

¹⁶ Otshe mafura ma nava a Mkoma; mphaxeli a fanete ku mahisa ha txiluveloni. Nzakudya si si ningelwako kumweko ni mhamba, ti to si na hiswa, kasi kutsakisa Mkoma, ngu kubhumula ka sona.

¹⁷ Njileleto txa kwa mbi gwita ka tiveleko tanu, kotshe mu mi no zumba kona: Mi nga dyeni mafura ni ka kudotho, hambi ni mnoha.