Levhi 24 - Bhiblia Yo Sawuleka

Milayo madingano ni Dilambu

¹ Se Mkoma a to womba ka Mosi a txi khene:

² Gela vanana va ka Israyeli tito, ve kutisela mtona wa wunene, wa miolivha, wo rukutwa wa txipande txa malambu, kasiku wu txi thelwa amu ka malambu, me tura yotshe mbimo.

³ Aroni a na si txhatxhameta masoni ka Mkoma yotshe mbimo, kukhukhela ni minova kala mangwanani ka kona ni mixo, ngu hahanze ka txibhiya txa ditenda da msengeletano; mlayo wuwa wu fanete ku va ho yotshe mbimo, ka tiveleko tanu.

⁴ Aroni a fanete kuveka malambu ka txipande txa nzalama ya yinene, atxi txi ku ngu masoni ka Mkoma, yotshe mbimo.

Dipawu do sawuleka

⁵ Se u na teka mpupu wa wunene, u bhika ngu wona digumi da sibhubhutela ni simbidi; txibhubhutela tximwetxo ni tximwetxo, txi na va txa mipimo yimbidi ya wugumi.

⁶ U txi si folisa ngu titxhatxha timbidi, mtxhanu ni tximwetxo ka litxhatxha limwelo ni limwani, txitimwi ka meza yo sawuleka, masoni ka Mkoma.

⁷ Ngu txitimwi ka litxhatxha ni litxhatxha, u na veka dibaselo do sawuleka, di na va da mapawu a mningelo wo hiswa, masoni ka Mkoma, ma txi maha txialakanyiso txa kwa mbi gwita.

⁸ Ka ditshiku ni ditshiku da Sabbata, si fanete kutxhatxhametelwa masoni ka Mkoma, yotshe mbimo, ngu vanana va ka Israyeli, Njitumelelano txa kwa mbi na magwito.

⁹ Si na lumba Aroni ni vanana vakwe, va na dyela ha wukhaloni ko sawuleka; nguko nzilo so sawuleka, ngutu ka sile si mahelwako Mkoma, si lumba vona; mlayo wuwa mbwa kwa mbi na magwito.

Txionho ni txitsayiso

¹⁰ Se ku to humelela mwanana wa dijaha, mame wakwe i nga ti Muisrayeli, ni tate wakwe i ti ti Muegipta, a to ya ti pata ni va ka Israyeli; se a to wusa pfilu-pfilu wugoveloni, ni Muisrayeli wokari.

¹¹ Awule i nga ti Muisrayeli ngu didhawa da mame dwe, a to womba mapswi a tshofu e ruketela Mkoma. Se ditina da mame wakwe i ti ti Xelomite, mwana Dhebhiri wa lihunzu la ka Dhani.

¹² Va to m'zumbisa a di ñotwe, kala kuza Mkoma e va gela ti va felako ku ti maha ngu ngene.

¹³ Se Mkoma a to gela Mosi a txi khene:

¹⁴ Humisa hahanze ka wugovelo m'thu wule a nga womba-womba mapswi o ruketela, votshe vale va nga mu engisa, va na sanzeke manza awe ha msungo kwakwe, se wotshe msengeletano wu na m'balisela ngu marigwi.

¹⁵ U na womba ka vanana va ka Israyeli u txi khawe: Ni wuhi m'thu a ruketelako Txizimu txakwe, a na rwala kunemela ka txionho txakwe.

¹⁶ Awule a ruketelako ditina da Mkoma, ngu ditshuri a na fa, wotshe msengeletano ngu ditshuri wu na m'balisela ngu marigwi. Hambi i di mluveli mwendo Muisrayeli, ngako a txi ruketela ditina da Mkoma, a na dawa.

¹⁷ Se awule a dayako m'thu, ngu ditshuri a na fa.

¹⁸ Ni wule a dayako txifuyo txa vane, a fanete kudihela ngu tximwani txo hanya; wutomi wu dihelwa ngu wutomi.

¹⁹ Ni wule a vangelako txilonda mwakelani wakwe, hammidi kwakwe, a fanete nene e mahelwa ti a nga ti maha ka mkwawe:

²⁰ Kufunywa ka txihango kudihelwa ngu kufunywa ka txihango, diso ngu diso, dikwasa ngu dikwasa; ati ene a nga ti maha ka mmwani, ti na mahwa kwakwe nene.

²¹ Awule a dayako txifuyo a na diha ngu tximwani txifuyo; awule a dayako m'thu a na diha ngu kudawa nene.

²² Hambi i di txisumbulwa mwendo mluveli, awule a nga ta aka ditikoni kwanu, anu motshe mi vamwevo, masoni ka mlayo: Ani ngani Mkoma, Txizimu txanu.

²³ Mosi a manekile a txi tsanisa timhaka tiya ka vanana va ka Israyeli. Se va manekile va txi mteka m'thu wule a nga ruketela va txi m'yisa hahanze ka wugovelo, veya m'balisela ngu marigwi a txi fa. Ngu toneto, vanana va ka Israyeli va to maha nga ti Mkoma a nga leletisa tona Mosi.