Levhi 20 - Bhiblia Yo Sawuleka

Sitsayiso sa sionho so hambanela

¹ Mkoma a wombile kambe ka Mosi, a txi khene:

² Kambe u na khawe ka vanana va ka Israyeli : Ni wuhi ka vanana va ka Israyeli, mwendo mluveli wule a nga aka amu ditikoni ka va ka Israyeli, a no ningela mwanana wakwe, e maha mhamba ka Moloke, a na dawa; vathu va mu ditikoni va na m'balisela ngu marigwi.

³ Ni na mronokela ngu maso angu, ni txi mwukela eyo m'thu, ni na mtutumisa hagari ka vathu va ka kwawe, nguko a ningete mwanana wakwe ka Moloke, e nyenyezisa wukhalo wangu wo sawuleka, ni ku bihisa ditina dangu do sawuleka.

⁴ Se ngako vathu va ditiko va txi vhala maso awe, ka m'thu wule a nga onha ngu kuningela mwanana wakwe ka Moloke, va si m'dayi,

⁵ ani ni na tshemberisa khohe yangu ni txi muwukela eyo m'thu, ni yotshe nyumba yakwe, kumweko ni vale va nga patana nayo, va txi mahetela kubiha, ve khozela Moloke.

⁶ Ngako m'thu wokari a txi tutumela ka vanyamsoro ni ka vanyatixolo, e ti ningetetela ka vona, asi khatali ngu wukhongeli, ni na mronolela ngu maso angu, ni mfuvisa hagari ka va ka kwawe.

⁷ Ti maheni vavanene ni ku ti maha vasawuleki, nguko ani ngani Mkoma Txizimu txanu.

⁸ Vekisani milayo yangu mi txi yi xayisa. Ani ngani Mkoma ni mi mahako vathu vangu vavanene.

⁹ Awule a vengelako tate wakwe mwendo mame wakwe, ngu ditshuri a na tsayiswa ngu kufa. Nguko a nyenya tate wakwe mwendo mame wakwe, se a fanete kudawa; mnoha wakwe wu na wela txitimwi kwakwe.

¹⁰ Nene wamwamna wule a mahako wugango ni msikati wa vane, a txi maha wugango ni msikati wa mwakelani wakwe, wamwamna ni wamsikati, avale va nga maha wugango, ngu ditshuri vona ngu wumbidi wawe va na dawa.

¹¹ Ngako wamwamna wokari a txi otela ni msikati wa tate wakwe, a zivile ngu wumbwiri wa tate wakwe; ngu ditshuri ngu wumbidi wawe va fanete kutsayiswa ngu kudawa; mnoha wawe wu na wa txitimwi kwawe.

¹² Kufana ni toneto, ngako m'thu wa wamwamna a txi otela ni maane wakwe, ngu ditshuri vona ngu wumbidi wawe va na tsayiswa ngu kufa; nguko va mahetete tingana ta hombe, va fanete kudawa; mnoha wawe wu na va txitiwmi kwawe.

¹³ Ngako wamwamna wokari a txi otela ni mwamna kulowe, ngu wumbidi wawe va mahile to biha; ngu ditshuri va na dawa. Mnoha wawe wu na wela txitimwi kwawe.

¹⁴ Ngako wamwamna wokari a txi tekana ni wamsikati ni mame wa kona, a mahile to yila. Ene ni vale vavasikati, va na rinzwa ha mndilo va txi hiswa, ngu wuraru wawe, kasiku txionho txo, txi guma hagari kwanu.

¹⁵ Ngako wamwamna wokari a txi otela ni txihari, ngu ditshuri a fanete kudawa, ni txona txiharitxo txi na dawa.

¹⁶ Nene wamsikati, ngako a txi ti ningela ka txihari, a txi otela natxo dayani eyo wamsikati kumweko ni txihari, ngu ditshuri va na dawa; mnoha wawe wu na wele txitimwi kwawe.

¹⁷ Se ngako wamwamna wokari a txi teka ndiyakwe, i ku mwanana wa tate wakwe mwendo wa mame wakwe, e wona wumbwiri wakwe, se nene e wona wakwe, eto ta yila; ngu kumaha keto, ngu wumbidi wawe, va na fuviswa masoni ka va ka kwawe; nguko a tumbute wumbwiri wa ndiyakwe; va na rwala wubihi wawe.

¹⁸ Ngako wamwamna wokari a txi otela ni wamsikati wule a ku ni mitxima yakwe, e ziva wumbwiri wakwe, a txi ziva ditshina da mnoha wa wamsikati, ni wamsikati a zivile ditshina da mnoha wakwe, ngu wumbidi wawe va na fuviswa hagari ka vathu va ka kwawe.

¹⁹ Kufana ni toneto, u nga sikote kumaha wugango ni ndiya ya tate wako, hambi ni mkoma mwendo mnanda wa mame wako, nguko ngu ziva wumbwiri wa maxaka ako o thisa, se ngu wumbidi wawe va na rwala mnandu wa wubihi wawe.

²⁰ Ngako wamwamna wokari a txi otela ni msikati wa tatanyani wakwe, e ziva wumbwiri wa tatanyani wakwe, ngu wumbidi wawe va na rwala mnandu wawe, se va na fa va si nga ni vanana.

²¹ Se ngako wamwamna wokari a txi teka msikati wa mwanawe, eto ta yila; nguko a vhunungute wumbwiri wa mwanawe; se va na fa va si nga ni vanana.

²² Vekisani koko sotshe sileleto sangu, ni milayo yangu, mi txi yi londeta, kasi ku ditiko di ni mi yisako ka dona kuya zumba kona, di si mi kosi.

²³ Mi nga londeteni mikhuwo ya vathu va ditiko edo ni no ya va tovela masoni kwanu, nguko va mahetete totshe to biha; ngu toneto va ni xamukisile.

²⁴ Ani ni mi gete ni txi khani: Anu mi na ya fumela ditiko dawe, ni na mi ninga dona di txi va i di thomba yanu, ditiko edo di khulungako masi ni wulombe. Ani ngani Mkoma, Txizimu txanu, ni nga mi thavisa hagari ka vamwani vathu.

²⁵ Anu mi fanete kuziva kuhambanisa sihari so yila ni sihari so mbi yila, sinyana so yila ni so mbi yila; mi si ti nyenyezisi ngu sihari ni sinyana ni si si tsimbilako ngu dibindi, ha mafuni, asi ni nga mi gondisa ku si ziva, ni txi mi gela asi i ku so yila.

²⁶ Mi fanete ku ti maha vo sawuleka kwangu, nguko ani Mkoma ni wo sawuleka, kambe ni mi hambanisile ni totshe tixaka ta vathu, kasiku mi va mi di vathu vangu.

²⁷ Ngako wamwamna mwendo wamsikati a txi ya ka vanyamsoro, mwendo ka vanyatixolo, ngu ditshuri a fanete kufa, a na baliselwa ngu marigwi, mnoha wakwe wu na wa txitimwi kwakwe.