Levhi 2 - Bhiblia Yo Sawuleka

Miningleo ya timbewu

¹ Se ngako m'thu a txi ningela mningelo wa sakudya ka Mkoma, a na phaxa ngu mpupu wa wunene, e thela mtona ni dibaselo txitimwi ka wona.

² A na wu teka e wu yisa ka vaphaxeli, vanana va Aroni, aha mmweyo wawe a no wela dianza di txi tala ngu mpupu wonewo, wu ku ni mtona ni dibaselo, a txi si hisa ha txiluveloni, si txi va i di txialakanyiso. I mhamba yo hiswa, mningelo wu fanelako kuhiswa kasi kudhumisa Mkoma, ni ku mtsakisa ngu kubhumula ka wona.

³ Asi si salako ka mningelo wa sakudya, nza Aroni ni vanana vakwe, asiya nzilo sa kusawuleka ngutu, si nga sala ka mhamba yo mahelwa Mkoma.

⁴ Se ngako wu txi mahwa mningelo wa sakudya so bhikwa, ku na mahwa sibhubhutela ngu mpupu wa wunene, wo mbi tshumbelwa, wo vhuvwa ni mtona, ni sibhubhutela so mbi tshumbelwa, si di thetwe mtona.

⁵ Se ngako u txi lava kumaha mningelo ngu sakudya, so katingwa mu ka dipani, maha mhamba ngu mpupu wa wunene ngutu, awu wu nga vhuvwa ni mtona, wu si nga ni mtshumbelo.

⁶ U na bhandisela ngu sikhwemu, u txi si thela mtona; mningelo wa sakudya.

⁷ Kambe ngako mningelo wako i ti mningelo wa sakudya sa dibhotani, si fanete ku va i di sa mpupu wa wunene, ni mtona.

⁸ Sekoko u na teka mningelo wako, awu wu nga lulamiselwa kuva wa Mkoma, u txi wu ningela ka mphaxeli, kasiku ene, e wu veka hafuhi ka txiluvelo.

⁹ Se mphaxeli a na hungula ka wona didhawa di i ku da txialakanyiso, kasi ku e wu hisa aha ka txiluvelo. I mhamba yo hiswa, mningelo wu fanelako kuhiswa kasi kudhumisa Mkoma, ni ku mtsakisa ngu kubhumula ka wona.

¹⁰ Asi si nga sala aha ka mningelo si na va sa Aroni ni vanana vakwe, i ku didhawa do sawuleka ngutu, ka si si lumbako Mkoma.

¹¹ Mningelo wuhi ni wuhi wa sakudya, awu wu mahelwako Mkoma, wu nga ve wa simbwanda so tshumbelwa; kambe mi nga theleni mtshumbelo hambi wulombe, ka mningelo wuwa wo hiselwa Mkoma.

¹² Eso ma sikota kumaha ngu sona mningelo ka Mkoma, i ku txialakanyiso txa mihando yo khata; aniko, mi nga si hiseni txitimwi ka txiluvelo, ku nga mningelo wo bhumula wo tsakisa Mkoma.

¹³ Se u fanete u txi lunga ngu mnyu, yotshe miningelo ya sa sakudya; kambe ku nga pwateke mnyu ka sakudya sa sako sa mningelo, wa txitumelelano txa Txizimu txako; Lunga ngu mnyu yotshe miningelo yako ya sakudya.

¹⁴ Se ngako u txi ningela mningelo wa sakudya sa kuelula ko khata masoni ka Mkoma, u na ningela mningelo wa sakudya sa mi'buru ya kuelula ko khata, so kaxulelwa ha mndiloni, eko, sa tinyingi ta mi'buru yo pfuna.

¹⁵ Se ngu txitimwi ka mningelo u na thela mtona, u sanzeka dibaselo; mningelo wa sakudya.

¹⁶ Ngu kumaha keto, mphaxeli a na hisa txialakanyiso ngu tindoho takwe to sinzwa, ni mtona, ni dotshe dibaselo da kona; ewo mningelo, wo hiswa ka Mkoma.