Levhi 19 - Bhiblia Yo Sawuleka

Yimwani milayo

¹ Mkoma a to womba kambe ka Mosi, txi khene:

² Womba ka wotshe msengeletano wa vanana va ka Israyeli, u txi khawe: Mahani vathu vo sawuleka, nguko ani, Mkoma, Txizimu txanu, ni wo sawuleka.

³ Mmweyo ni mmweyo a na thave tate wakwe ni mame wakwe, e vekisa Masabbata tangu. Ani ngani Mkoma, Txizimu txanu!

⁴ Mi nga tshumeleleni ka sithombe, kambe mi nga ti maheleni sizimu sa tisimbi: Ani ngani Mkoma, Txizimu txanu!

⁵ Ngako mi txi maha mningelo wa mhamba ya mpatano ka Mkoma, wu maheni ngu fanelo, kasi ku wu txi amukeleka.

⁶ Mi fanete kudya mhambeyo, ka ditshiku dile mi phaxako ngu dona, mwendo ka ditshiku da mangwanani ka kona, asi sisalako kala ka ditshiku da wuraru, si fanete si txi hiswa ha mndiloni.

⁷ Asi sidyiwako ka ditshiku da wuraru, soneso sa yila, asi si mahako ti to mhamba ya kona yi si tumelelwi.

⁸ Awule a yi dyako a na rwala mnandu, nguko a nyenyezisile wukhalo wo sawuleka wa Mkoma; se a na tovelwa hagari ka vathu va ka kwawe.

⁹ Ngako mi txi elula timbewu tithembweni kwanu, mi nga eluleni kala kotshe magwito ka thembwe, kambe mi nga yeni mi txi ya roletela vanyamtshodwe, msana ka kuva mi di gwitile kuelula siyalo.

¹⁰ U nga lavetele asi sisalako amu ka thembwe yako ya mivhinya, msana ka kuva ku di elutwe, hambi kuroletela mauvha ale ma nga tshomoka. U fanete u txi leka misalela ka sisiwana ni ka valuveli! Ani ngani Mkoma, Txizimu txako!

¹¹ Mi nga peni, mi nga dyeleleni, mi nga wombeni makuhu kasi kukanganyisa mkwanu.

¹² Mi nga xambanyeni makuhu ngu ditina dangu, nguko mi nga nyenyezisa ditina da Txizimu txanu. Ani ngani Mkoma!

¹³ U nga xuphe mkwanu kambe u nga mpele sakwe; muholo wa mthumo wu a thumako u nga zumbe nawo manzani kwako, kala ditshiku da mangwana.

¹⁴ U nga ruketele m'thu wu i ku diphanzeve, kambe u nga veke txitshingelelo masoni ka dibhofu. Xonipha Txizimu txako: Ani ngani Mkoma!

¹⁵ Mi nga hambaniseni mhaka kulamulani kwanu; u nga wone khohe ya wule i ku txisiwana, kambe u nga khatalele nyatithombe; u fanete kulamula mkwanu ngu kululama!

¹⁶ U nga phaye livengo hagari ka va ka kwanu; u nga mangalele mwakelani wako, eza e mana phango. Ani ngani Mkoma!

¹⁷ U nga vengele wa ka kwanu mbiluni kwako; mkawuke ngako ti txi laveka, u si wi txionhoni ngu mhaka yakwe.

¹⁸ U nga pandiseke, kambe u nga ve ni txiviti ngu vathu va ka kwanu, aniko randa mwakelani wako nga ti u ti randisako tona awe upune. Ani ngani Mkoma!

¹⁹ U na vekisa sileleto sangu; u nga leke txifuyo txako txi kandwa ngu txifuyo txa limwani lixaka; u nga phaye thembweni kwako mixowo yimbidi yo hambana ya timbewu, kambe u nga ambale nguwo yo lukwa ngu mixowo yimbidi yo hambana.

²⁰ Ngako wamwamna wokari a txi otela ni wamsikati wu i ku khumbi, i di txikaba txa mmwani wamwamna, wamsikatiyo kha na mbi tirulwa hambi kutxhatxhiswa, ngu wumbidi wawe va na tsayiswa, aniko kha va na mbi dawa, nguko wamsikati a ti sinzi kutxhatxhiswa.

²¹ Wamwamna eneyo a na tisa hamba masoni ka Mkoma, ha txikeni ka ditenda da msengeletano, kasi ku ta maha mningelo wa mhamba yo dihela txionho.

²² Ngu mningelo wa mhamba, mphaxeli a na maha mhamba yo dihela txionho txa wule wamwamna ngu hamba yile, masoni ka Mkoma, ngu txona txionho txile, se txionho txi na divalelwa.

²³ Ngako mi txi wulela ka ditiko di ni nga mi thembisa, mi txi phaya mindonga yi yi ningako mihando yo dyiwa, ya tixaka ta tingi to hambana; amuwa ka malembe mararu, mihando ya kona yi na va i di makhutu; ngu toneto mi nga yi dyeni.

²⁴ Kambe ka dilembe da wumune, yotshe mihando yi sawulekile, yi na va yi txi mahwa mningelo ka Mkoma, kasi ku m'bonga.

²⁵ Se ka dilembe da wutxhanu, mi na va mi txi dya mihando ya kona, kasiku mindonga yi txi veleka mihando yayingi, ani ngani Mkoma, Txizimu txanu.

²⁶ Kha mi na mbi dya nyama yi yi ku ni mnoha; kha mi na mbi wotisa ka nyamsoro, kambe kha mi na mbi xaxuva ka nyatixolo!

²⁷ Mi nga ti yoleni ngu kurendelekisa magwito ka misisi, kambe mi nga ti yoleni madhawani ka txiletu.

²⁸ Mi nga ti txhaveleni, hambi ku ti lova ha mmidi kwanu, ngu mhaka ya kufa: Ani ngani Mkoma!

²⁹ U nga nyenyezise mwanana wako wa dihorana, ngu ku mkujetela ti to e maha wugelegele, nguko ditiko di nga ti ningetetela amu ka wugelegele, di txi tala ngu wubhemba.

³⁰ Vekisani Masabbata yangu, mi va ni txithavo ka nyumba yangu yo sawuleka: Ani ngani Mkoma!

³¹ Mi nga yeni ka vanyamsoro, hambi ka vanyatixolo, mi nga thuke mi txi ya ka vona, nguko mi nga ti nyenyezisa: Ani ngani Mkoma, Txizimu txanu.

³² Khukha u txi ema, u komba txithawo ka wule a ku ni msungo wa wunvi, u txi xonipa m'thu wule i ku wa hombe. Thava Txizimu txako: Ani ngani Mkoma.

³³ Se ngako mluveli a txi ta zumba ka ditiko danu, mi nga mxupheni.

³⁴ Mluveli wule a zumbako ni nanu a na va a txi xayiswa ku nga mmweyo wa va ka kwanu, u na mranda nga ti u ti randisako tona awe upune, nguko nanu mi ti valuveli ditikoni ka Egipta: Ani ngani Mkoma, Txizimu txanu!

³⁵ Mi nga maheni wukanganyisi kulamulani kwanu, hambi ka mpimo wo nemela ni wa kulapha ka simaha!

³⁶ Mi nava ni sikalo sa sinene, ni marigwi amanene, efa ya yinene, ni hini ya yinene. Ani ngani Mkoma, Txizimu txanu, ni nga mi humisa ditikoni ka Egipta!

³⁷ Mi na vekisa sotshe sileleto sangu, ni kulondisa yotshe milayo yangu: Ani ngani Mkoma!