Levhi 10 - Bhiblia Yo Sawuleka

Kudawa ka Nadhabhi ni Abhiyu

¹ Nadhabhi ni Abhiyu, vanana va Aroni, mmwani ni mmwani a to teka txikadyana txakwe, e veka kona makala a mndilo, se ngu txitimwi ka ona e veka dibaselo, a txi ya ningela masoni ka Mkoma, ve leka mthetho wu Txizimu txi nga ti va ningile.

² Sekoko ku to huma mndilo ngu masoni ka Mkoma, wu txi va hisa konaho, va txi fa masoni ka Mkoma.

³ Se Mosi a to womba ka Aroni a txi khene: Ngu tona tiya Mkoma a nga womba, a txi khene: Ka vale va tshuketako hafuhi kwangu ni na va komba ti to ani ni sawulekile ni ka vathu votshe ni na komba mtamo wangu! Aroni a to malala a so dwe.

⁴ Se Mosi a to dhana Misayeli ni Elisafani, vanana va Uziyeli, tatanyani wa Aroni, a txi khene kwawe: Ngonani, thavisani maxaka anu masoni ka wukhalo wo sawuleka, mi va yisa hahanze ka wugovelo.

⁵ Vona va to tshuketa hafuhi, ve ndinda sirumbi ngu mabhaji awe, ve si yisa hahanze ka wugovelo, nga tonti Mosi a nga va rumisa tona.

⁶ Se Mosi a to womba ka Aroni ni ka vanana vakwe, i ku Eleyazari ni Itamari, a txi khene: Anu mi nga vhununguleni misungo yanu hambi kuvharhula syambalo sanu, mi txi komba ku va dila, nguko mi nga fa, ngu kuva mi di vhutukisile dikhulo da Txizimu hagari ka msengeletano wotshe, kambe maxaka anu vanana va ka Israyeli, ngu vona va no dila ngu mhaka ya wuhya wuwa Mkoma a nga wu maha.

⁷ Kambe mi nga humeni ha txikeni ka ditenda da msengeletano, kuva mi si fi, nguko mtona wo tota wa Mkoma wu ha msungo kwanu. Se vona va mahile nga tona ti Mosi a nga va leletisa tona.

Milayo ya vaphaxeli

⁸ Se Mkoma a to womba ka Aroni a txi khene:

⁹ Ngako awe ni vanana vako mi txi lava kuwulela ditendani ka msengeletano, mi nga seleni vhinya, hambi ni simwani so sela si si levisako, nguko mi nga fa. Awuwa mlayo mbwo kala kupinduka, ka sotshe situkulwana sanu.

¹⁰ Ngu toneto, mi na sikota kuhambanisa atxi i ku txo sawuleka ni txo mbi sawuleka, ni txi i ku txo yila ni txo mbi yila,

¹¹ mi txi sikota kugondisa va ka Israyeli ti to ve vekisa milayo yi Mkoma a nga va ninga, ngu txisofu txa Mosi.

¹² Se Mosi a gete Aroni ni vanana va va nga sala, Eleyazari ni Itamari a txi khene: Tekani si si nga sala, sakudya, ka mningelo wo hiselwa Mkoma, mi na si dya si sa tshumbelwa, hafuhi ka txiluvelo, nguko nzimaha so sawuleka.

¹³ Mi fanete ku si dyela ha wukhaloni ko sawuleka. Nguko njiavelo txi txi lumbako awe, ni vanana vako, ka miningelo yo hiswa ayi yi mahelwako Mkoma. Ngu yi mithetho ni nga yi amukela.

¹⁴ Khana yi yi nga ndiwitelwa ni mnenge wu wu nga sala, u na ya si dyela ha wukhaloni ko sawuleka, awe ni vanana vako vavafana ni vamahorana, nguko njiavelo txi txi kulumbako ka miningelo yo mahelwa Txizimu.

¹⁵ Va ka Israyeli va na tisa khana ni mnenge wa txihari, asi si nga mahwa mningelo wa mhamba ya mpatano, kumweko ni mafura, kuve si mahwa mningelo wo ndiwitela, masoni ka Mkoma, etxo njiavelo txi txi lumbako awe ni vanana vako, kala kupinduka, madingano ni ti Mkoma a nga rumisa tona.

¹⁶ Konako, Mosi a to wotisa ti va nga maha ngu mabhongwe wa mhamba yo divalela txionho, aniko ene mabhongweyo na a ti hisilwe. Mosi a to henya ngutu e henyela Eleyazari ni Itamari, vanana va Aroni, avale va nga ti sate va txi hanya, a txi khene:

¹⁷ Ngu kutxani mi nga mbi dya nyama ya mabhongwe, ya mningelo wa mhamba yo kuwula txionho ha wukhaloni ko sawuleka, kani? Nguko njilo txo sawuleka ngutu ka Mkoma, a mi ningile kasi ku mi rwala sotshe sionho sa msengeletano, mi maha m'diho wa sionho, masoni ka Mkoma.

¹⁸ Nguko mnoha wa txihari txa mhamba, kha wa yiswa ha wukhaloni ko sawuleka. Ngu toneto, anu nga mi di dyete ha wukhaloni ko sawuleka, nga ti ni nga mi gelisa tona.

¹⁹ Sekoko Aroni a to khene ka Mosi: Ka ditshiku diya vanana vangu va nga maha mningelo wa mhamba ka Mkoma ngu sionho, ni mningelo wo hiswa, se yi di ni humelete mhaka yo nga yiya, ina nga ti txi tsakisa Mkoma, ngako nyamsi ni di dyite nyama ya mhamba kani?

²⁰ Se Mosi ngako a di engisile ti to xamulo ya Aroni njayinene, a to tsaka.