Levhi 1 - Bhiblia Yo Sawuleka

Sihari si si hiswako txiluveloni

¹ Se Mkoma a to dhana Mosi, a txi womba-womba nayo amu ka ditenda da msengeletano, a txi khene:

² Gela vanana va ka Israyeli ku khawe: Ngako mmwenyo wanu a txi ninga mningelo ka Mkoma, mi na ningela miningelo yanu ya sihari, sa tihomu ni tinvuta.

³ Ngako a txi lava kuningela i ti mphaxo wo hiswa ka Mkoma ngu txihari txa hombe, a fanete kusawula matune wa kwa mbi na txibawa, e di yisa ha txikeni ka ditenda da msengeletano, kasiku eya mana kuamukeleka masoni ka Mkoma.

⁴ Se a na sanzeka dianza dakwe ka msungo wa txihari txa mhamba yo hiswa, kasi ku mhamba yi amukelwa, se ene e mana kudivalelwa sionho sakwe.

⁵ Ngu msana a na wila mkolo wa dirole masoni ka Mkoma; se vanana va Aroni, i ku vaphaxeli, va na maha mningelo, ngu mnoha awu va no xwayela ngu wona ka otshe madhawa a txiluvelo, txi txi ku ha txikeni ka ditenda da msengeletano.

⁶ Sekoko a na sunduwula txihari txa mhamba yo hiswa, e txi wilela ngu sihango.

⁷ Se vanana va Aroni, i ku vaphaxeli, va na dhivela mndilo ha txiluveloni, ve veketela tikhuni txitimwi ka mndilo.

⁸ Kambe vanana va Aroni, i ku vaphaxeli, va na veketela sihango sa nyama, msungo ni mafura, ngu txitimwi ka tikhuni ta mndilo wu wu ku txitimwi ka txiluvelo.

⁹ Kambe va fanete kukuwula masembe ni maswondo a kona; se mphaxeli a na hisa sotshe siya ha txiluveloni; i mhamba yo hiswa, ya kubhumula ko tsakisa Mkoma.

¹⁰ Ngako m'thu a txi lava kumaha mningelo wa mhamba yo hiswa ngu txihari txatxidotho, nvuta mwendo phongo, njihari txa matune, txo mbi limala,

¹¹ se a na txi wila mkolo didhawa ka wuphemba ka txiluvelo, masoni ka Mkoma; se vanana va Aroni, i ku vaphaxeli, va na xwayela mnoha wa kona ka otshe madhawa a txiluvelo.

¹² Ngu msana, a na yi wilela ngu sihango, se mphaxeli e teka nyama ya kona kumweko ni msungo wa kona ni mafura, e si veka txitimwi ka tikhuni ti ti turako ngu mndilo ha txiluveloni.

¹³ Kambe ku na kuwulwa masembe ni maswondo, se ngu msana mphaxeli a na maha mningelo ngu sotsheso, ngu ku si hisa ha txiluveloni. I mhamba yo hiswa, mningelo wu fanelako kuhiswa, kasi kutsakisa Mkoma, ngu kubhumula ka wona.

¹⁴ Se ngako mningelo wakwe ka Mkoma i di wa sinyana so hiswa, kulaveka a txi wu maha ngu matuva, mwendo mavhondo a situvani.

¹⁵ Se mphaxeli a na ningela txinyana ha txiluveloni, e txi sukuruta mkolo ngu txyala txakwe, se a na hisa msungo wa kona ha txiluveloni; mnoha wa kona wu na kamelwa ha disetani ka txiluvelo;

¹⁶ se dikhelele da kona ni mitenga ya kona, a na di thavisa a txi di tshotsha txiluveloni, ngu didhawa da wutxani, aha ka dikhuma;

¹⁷ txinyana txiya, a na txi bhanda ngu hagari ka mabhapi, aniko asi txi tshaputi; se mphaxeli a na txi hisa txiluveloni, txitimwi ka tikhuni ti ti ku ha mndiloni; i mhamba yo hiswa, mningelo wo fanela kuhiswa, wa kubhumula ko tsakisa Mkoma.