Joxuwa 5 - Bhiblia Yo Sawuleka

¹ Se ku to maheka taku, va di ti engisile votshe vafumeli va Vaamori, avale va nga ti akile mtxhatuko ka Jordhani, ngu mswa-ditambo, ni votshe vafumeli va Vakanana, avale va nga ti hafuhi ni linene lile Mkoma a nga ti omisile mati a Jordhani, masoni ka vanana va ka Israyeli, kala kuza hi pinda, timbilu tawe ti to txutxeka, ve wika misana ngu mhaka ya vanana va ka Israyeli.

Wukwera kona Giligali

² Ka yona yile mbimo, Mkoma a to khene ka Joxuwa: “Maha timesa ta marigwi, u txi sinyisa kambe wukwera vanana va ka Israyeli.”

³ Sekoko Joxuwa a to maha timesa ta marigwi, a txi sinyisa wukwera vanana va ka Israyeli, kona Gibheyati-Haraloti.

⁴ Mhaka yiya Joxuwa a nga va sinyisa ngu yona wukwera, ngu yiya: Votshe vathu vale va nga ti humile ngu Egipta, vavamna, votshe vavamna va yimbi, va ti ti fite txiwulani, hanzila, msana ka kuva va di humile ngu Egipta.

⁵ Nguko votshe vathu vale va nga huma, va ti ti sinyisilwe wukwera, aniko avale va nga velekwa ha nzila txiwulani, msana ka kuva va di humile Egipta, va ti sa sinyiswa wukwera.

⁶ Nguko vanana va ka Israyeli va tsimbite mune wa magumi a malenbe txiwulani, kala kuza va txi guma votshe vathu, i ku vavamna va yimbi, va nga huma ngu Egipta, va nga mbi engisa dipswi da Mkoma, kevo Mkoma a nga ti va xambanyete ti to kha na mbi va leka ve wona ditiko dile Mkoma a nga xambanya ka vatate vawe ku hi ninga, ditiko di di khulungako masi ni wulombe.

⁷ Aniko, ka wukhalo wawe, a vekile vanana vawe; i ku vale Joxuwa a nga va sinyisa wukwera, nguko va ti sa sinyiswa wukwera, va ti sa sinyiswa wikwera hanzila.

⁸ Se ku to maheka taku, ngako va di sinyisilwe wukwera votshe vavamna, va to zumba makhaloni kwawe amu wugoveloni, kala kuza si txi hola silonda.

⁹ Mkoma a wombile kambe ka Joxuwa a txi khene: “Nyamsi ni thavisile kwanu tingana ta Egipta.” Ngu toneto, wukhalo wule, wu dhanwa ku i Giligali, kala ka ditshiku da nyamsi.

¹⁰ Mbimo yile koko vanana va ka Israyeli va nga ti govile Giligali, va to maha txialakanyiso txa Pasika, ka ditshiku da digumi ni mune ka mtxima, ni minova, tibalani ka Jeriko.

¹¹ Se va to dya fulaho ya ditikonimo, ya dilembe di nga pinda, mangwanani ka kona, msana ka Pasika, va to dya mapawu o mbi tshumbelwa ni mafaka o yokwa, ka dona ditshiku edo.

¹² Se mangwanani ka kona, manna ma to leka kuwa, msana ka kule va nga dya fulaho ya mafuni, ya dilembe di di nga pinda, se vanana va ka Israyeli kha va amukela kambe manna; aniko ka dona dilembedo, va to dya mihando ya yiphya ya ditiko da Kanana.

Mthangeli wa dibutho da Yimbi ya Txizimu

¹³ Se ku to maheka taku, ngako Joxuwa a di hafuhi ni Jeriko, a to gula maso akwe a txi wona, a to wona wamwamna wokari, a di emile masoni kwakwe, na a di ni ditxhari manzani kwakwe, se Joxuwa a to tshuketa kwakwe, a txi m'gela tiya: “U mmweyo wathu mwendo u mmweyo wa valala vathu kani?”

¹⁴ Se ene a to khene: “Ahim-him! Aniko konkuwa nita kota mthangeli wa dibutho da Mkoma.” Sekoko Joxuwa a to khizama e namisa khohe yakwe hahatshi, a txi mkhozela, e m'gela tiya: “U lava kuwomba txani, awe Nyamne wangu, ka txithumi txako kani?”

¹⁵ Sekoko mthangeli wa dibutho da Mkoma, a to khene ka Joxuwa: “Thavisa tikathula mikondoni kwako, nguko wukhalo wu u ku ka wona, mbwo sawuleka.” Se Joxuwa a to maha toneto.