Joxuwa 21 - Bhiblia Yo Sawuleka

Madhoropa a va ka Levhi

¹ Sekoko vathangeli va vatate va va ka Levhi, va to tshuketa hafuhi ka mphaxeli Eleyazari, ni ka Joxuwa, mwana Nune, ni vathangeli va timwaya ta vanana va ka Israyeli,

² va txi ya womba kwawe, didhoropani ka Silo, ditikoni ka Kanana, va txi kha vona: “Mkoma a leletete ngu txisofu txa Mosi ti to hi txi ningwa madhoropa, kasi ku hi zumba kona, ni tibala to dyisela ka tona sifuyo sathu.”

³ Konako vanana va ka Israyeli, hagari ka tithomba tawe, va to teka madhoropa okari ni tibala ta kona, va txi ninga va ka Levhi, madingano ni kuleleta ka Mkoma.

⁴ Ku to huma dikato da txyavelo txa vanana va ka Kohate, i ku Valevhi va lihunzu la mphaxeli Aroni, va mani txyavelo txa digumi da madhoropa ni mararu, a kuhuma amu ka lihunzu la ka Judha, ni la ka Simiyoni, ni la ka Bhenjamini,

⁵ vamwanyani vanana va ka Kohate, va mani dikato da txyavelo txa digumi da madhoropa a kuhuma amu ka lihunzu la va ka Efrayime, ni la Dhani, ni ka hafu ya lihunzu la ka Manasi.

⁶ Vanana va ka Gerisoni va mani dikato da txyavelo txa madhoropa a digumi ni mararu a kuhuma amu ka lihunzu la ka Isakari, ni la ka Aseri, ni la ka Naftali ni ka hafu ya lihunzu la Manasi, kona Bhasani.

⁷ Vanana va ka Merari, ngu mtengo wa timwaya tawe, va mani txyavelo txa digumi da madhoropa ni mambidi a kuhuma ka lihunzu la ka Rubheni ni la ka Gadhi, ni la ka Zebhuloni.

⁸ Vanana va ka Israyeli va ningete ka Valevhi, madingano ni ditiko dawe, ona madhoropa awe ni tibala ta wudyiselo wa sifuyo, nga ti Mkoma a nga va leletisa tona, ngu txisofu txa Mosi.

⁹ Ka lihunzu la vanana va ka Judha, ni ka lihunzu la vanana va ka Simiyoni, ku sawutwe madhoropa awa matina a kona ma no wombwa konkuwa.

¹⁰ Kasi ku me lumba vanana va ka Aroni, va timwaya ta ka Kohate, avale i ku vanana va tinyumba ta ka Levhi, madhoropa a kona ma ningetwe kwawe, nguko txyavelo txo khata txi lumbile vona.

¹¹ Va va ningile Kiriyati-Arbhe, didhoropa da tate wa Anaki i ku Hebroni, mmangoni ka Judha, ni tibala ta wudyiselo, ngu madhawani ka kona.

¹² Aniko tithembwe ta dona didhoropedo, ni miti ya kona, si ningetwe ka Kalebhi, mwana Jefoni, si txi maha thomba yakwe.

¹³ Vanana va mphaxeli Aroni, va ningilwe didhoropa da Hebroni, di txi maha didhoropa da wuthavelo, ka wule a dayako m'thu, ni tibala ta kona ta wudyiselo, ni Libhina ni wudyiselo wa kona,

¹⁴ ni Jeteri ni wudyiselo wa kona, ni Esitemowa ni wudyiselo wa kona,

¹⁵ ni Holomi ni wudyiselo wa kona, ni Dhebhiri ni wudyiselo wa kona,

¹⁶ ni Ayini ni wudyiselo wa kona, ni Juta ni wudyiselo wa kona, ni Bheti-Semesi ni wudyiselo wa kona; i mtxhanu wa madhoropa ni mune ma nga huma ka tihunzu ta timbidi;

¹⁷ ni ka lihunzu la Bhenjamini, kuhumile Gibheyoni ni wudyiselo wa kona, ni Gebha ni wudyiselo wa kona,

¹⁸ ni Anatote ni wudyiselo wa kona, ni Almoni ni wudyiselo wa kona: I mune wa madhoropa.

¹⁹ Otshe madhoropa a vaphaxeli, i ku vanana va Aroni, digumi da madhoropa ni mararu, ni tibala ta wudyiselo wa kona.

²⁰ Timwaya ta vanana va ka Kohate i ku Valevhi vale va nga sala hagari ka vanana va Kohate, madhoropa ale va nga ningwa ngu dikato, ma humile amu ka lihunzu la ka Efrayime.

²¹ Va va ningile Sikemi, didhoropa da wuthavelo ka vale va dayako m'thu, ni wudyiselo wa kona, mmangoni ka Efrayime, ni Gazeri ni wudyiselo wa kona,

²² Kibhisayime ni wudyiselo wa kona, ni Bheti-Heroni ni wudyiselo wa kona: I mune wa madhoropa.

²³ Ka lihunzu la ka Dhani, kuhumile didhoropa da Eliteke, ni wudyiselo wa kona, Gibhetoni ni wudyiselo wa kona,

²⁴ Ajaloni ni wudyiselo wa kona ni Gati-Rimoni ni wudyiselo wa kona: I munwe wa madhoropa.

²⁵ Ka hafu ya lihunzu la ka Manasi, kuhumile Tahanake ni wudyiselo wa kona, ni Gati-Kimoni ni wudyiselo wa kona: Madhoropa mambidi.

²⁶ Otshe madhoropa a vanana va ka Kohate va nga sala, i ti digumi da madhoropa ni makhalo a kona a wudyiselo.

²⁷ Vanana va ka Gerisoni, ni vona i ku va lixaka la Valevhi, va ningilwe didhoropa da Golani wa Bhasani, da kuhuma ka hafu ya lihunzu la ka Manasi, ni wudyiselo wa kona, kasi kumaha didhoropa da wuthavelo ka vale va dayako m'thu, ni Bhexetira ni wudyiselo wa kona: Madhoropa mambidi.

²⁸ Ka lihunzu la ka Isakari, kuhumile Kixiyoni ni wudyiselo wa kona, ni Dhebherati ni wudyiselo wa kona,

²⁹ ni Jarmuti ni wudyiselo wa kona, ni Eganima ni wudyiselo wa kona: Mune wa madhoropa.

³⁰ Ka lihunzu la ka Aseri, kuhumile Misali ni wudyiselo wa kona, ni Abhidhoni ni wudyiselo wa kona,

³¹ Helikate ni wudyiselo wa kona, ni Rohobhi ni wudyiselo wa kona: Mune wa madhoropa.

³² Ka lihunzu la ka Naftali, kuhumile Kadhesi wa Galileya ni wudyiselo wa kona, kasi kumaha didhoropa da wuthavelo ka vale va dayako m'thu; Hamati-Dhora ni wudyiselo wa kona, ni Karitani ni wudyiselo wa kona: Madhoropa mararu.

³³ Otshe madhoropa a ka Gerisoni, madingano ni timwaya tawe, digumi da madhoropa ni mararu, ni wudyiselo a kona.

³⁴ Timwaya ta vanana va ka Merari, i ku Valevhi va misalela, ti amukete, ka lihunzu la ka Zebhuloni, Jokenohamu ni wudyiselo wa kona, Karita ni wudyiselo wa kona,

³⁵ ni Dhimina ni wudyiselo wa kona, ni Naharali ni wudyiselo wa kona: Mune wa madhoropa.

³⁶ Ngu ka lihunzu la ka Rubheni, va amukete Bhezari ni wudyiselo wa kona, ni Jahazi ni wudyiselo wa kona.

³⁷ Kedhemoti ni wudyiselo wa kona, ni Mefahati ni wudyiselo wa kona: Mune wa madhoropa.

³⁸ Ka lihunzu la ka Gadhi, Ramoti ni Gileyadhi, didhoropa da wuthavelo ka vale va dayako m'thu, kumweko ni wudyiselo wa kona, Mahanayimu ni wudyiselo wa kona.

³⁹ Hesibhoni ni wudyiselo wa kona, ni Jazeri ni wudyiselo wa kona: Mune wa madhoropa.

⁴⁰ Mtengo wa madhoropa ale ma nga abaniselwa ngu dikato ka vanana va ka Merari, madingano ni timwaya tawe, avava i ku misalela ya timwaya ta Valevhi: Txyavelo txawe digumi da madhoropa ni mambidi.

⁴¹ Otshe madhoropa a Valevhi, ma ku hagari ka thomba ya vanana va ka Israyeli, i mune wa magumi a madhoropa ni mtxhanu ni mararu, ni wudyiselo wa kona.

⁴² Madhoropa awa, dimwani ni dimwani ka ona, di ti ni wudyiselo wa dona, ka otshe madhawa. I ti toneto ka otshe madhoropa.

Vathu va ka Israyeli va txi teka ditiko

⁴³ Ti di ngeto, Mkoma a ningete ka vanana va ka Israyeli ditiko dotshe dile a nga thembisa ngu kuxambanya, ti to a na di ningela ka vatate vawe. Va to di amukela ve zumba ka dona.

⁴⁴ Mkoma a va ningile kuhumula ka otshe madhawa, madingano ni ti a nga xambanya tona ka vatate vawe; kha ka maneka ni wammweyo wa valala vawe, a nga tsana a txi ema masoni kwawe. Mkoma a to ningela votshe valala manzani kwawe.

⁴⁵ Kha ku nga ho dipswi ni da dimwedo, di nga wa hahatshi ka otshe mapswi amanene, aawa Mkoma a nga ma womba ka va ka Israyeli; totshe ti mahekile.