Joxuwa 2 - Bhiblia Yo Sawuleka

Joxuwa e rumela tixoli Jeriko

¹ Se Joxuwa, mwana Nune, a to ruma vavamna vambidi ngu Sitime, kuya xola ngu txihunja, a txi khene: “Tsulani, mi txi ya xola ditiko da Jeriko.” Va to tsula koko, va txi ya wulela nyumbani ka digelegele dokari, di nga ti dhanwa ku i Rahabhi, va ti ya otela koneyo.

² Sekoko ku to rumelwa dipswi ka mfumeli wa Jeriko, daku kha vona: “Wona taku wusiku wuwa, ahawa ku bwakile vavamna vokari va ka Israyeli, ku ta xola ditiko.”

³ Konako mfumeli wa Jeriko a to ruma kuya gelwa Rahabhi a tito: Humisa vathuvo va nga ta kwako, ava va nga wulela nyumbani kwako, nguko va tela ku ta xola dotshe ditiko.

⁴ Aniko awule wamsikati a to teka vavamna vale vavambidi, e va sisa, se a txi khene: “Kha ditshuri, vavamnevo va tile hawa kwangu, aniko kha na tiziva ti to va ta ngu hani.

⁵ Se ku to maheka taku, aha ku nga lava kusekwa matimba, na ku di phumile, vavamna vale va ti humile; kha ni kuzivi emo va nga ya kone vavamna vale; va londoteni ngu kukuluveta, mi na va mana.”

⁶ Aniko ene, a ti ti va kwelisile hathala, a txi va sisile hagari ka tinyanda ta linyu, a nga ti ti veketete hathala.

⁷ Se vavamna vale, va to londeta tixoli ngu msana, ngu nzila ya Jordhani, kala mabeloni; se ku to sekwa ditimba, msana ka kuva va di humile avale vo londeta.

⁸ Se na va si se otela, Rahabhi a to kwela a txi va yela hathala.

⁹ Se a txi ya khene ka vavamna vale: “Na tiziva ti to Mkoma a mi ningile ditiko diya, ni ti to kuthisa kwanu ku txitimwi kwathu, niku votshe vaaki va ditiko va gumile mtamo masoni kwanu.

¹⁰ Nguko hi ti nga pfa taku Mkoma a phwisile mati a Linene lo Bhilivila masoni kwanu, mbimo yile mi nga huma ngu Egipta, ni ti mi nga maha ka vafumeli vambidi va Vaamori, ka Seyoni ni ka Oge, avale va nga ti ti mtxhatuko ka Jordhani, evo mi nga va lovisa.

¹¹ Ngako hi di ti pfite eto, timbilu tathu ti to tsivala, se kha ku nga ni wammweyo wo tsana, ngu mhaka ya kumaneka kwanu; nguko Mkoma, Txizimu txanu, Njizimu txitimwi nzumani ni hahatshi mafuni.

¹² Konkuwa koko, na mi kombela, ni xambanyeleni ngu Mkoma Txizimu, ngako ni nga mi mahela wumbilu, na nanu mi na mahela wumbilu nyumba ya tate wangu, se ni ningeni txikombiso txa ditshuri,

¹³ txa ku mi na hulukisa tate wangu ni mame wangu, kumweko ni tindiya tangu ni vanathu, ni sotshe si va ku naso, ni ti to mi na hulukisa wutomi wathu ka lifo.”

¹⁴ Sekoko vavamna vale va to mxamula va txi kha vona: “Wutomi wathu wu na dihela wutomi wanu kala kufani, ngako mi si landuli mhaka yathu; se ku na maheka koko taku, ngako Mkoma a txi hi ninga ditiko diya, hi na ku mahela wumbilu, ni kuthembeka.”

¹⁵ Sekoko Rahabhi a to va txhikisa ngu ngoti ngu ha difasitelani, nguko nyumba yakwe yi ti akilwe ngu txitimwi ka diguma da didhoropa, eho a nga ti zumba kona.

¹⁶ Se a to va gela ku khene: “Tsulani mmangoni, kasi ku avale va mi londetako va si thuki ve mi mana; se sisalani kona eyo masiku mararu, kala kuza va txi wuya avale va mi londetako, se msana keto, tsulani ngu nzila yanu.”

¹⁷ Se vavamna vale va to m'gela va txi kha vona: Kha hi na mbi kurumetwa ngu txixambanyo txako, atxi u nga hi kurumeta ku txi maha,

¹⁸ aniko ngako hi txi ta ditikoni muwa, se u si sungi ngoti yiya yo bhilivila ha difasitelani hale u nga hi txhikisa ngu kona; kambe u si tisi nyumbani tate wako ni mame wako, ni vananu, ni otshe maxaka a tate wako.

¹⁹ Ku na maheka koko taku, ni wihi a no huma ha txikeni ka nyumbani yako, mnoha wakwe wu na va txitimwi ka msungo wakwe, se athu kha hi na mbi va ni mnandu; aniko ni wihi a no va ni nawe nyumbani, mnoha wakwe wu nave txitimwi ka misungo wathu, ngako a txi dawa.

²⁰ Aniko ngako u txi landula mhaka yiya yathu, hi nava hi si kurumetwi ngu txixambanyo txako, atxi u nga hi kurumeta ku txi maha.

²¹ Se Rahabhi a to khene: “Ti na maheke nga toneto mi wombisako tona.” Sekoko a to va leka va txi tsula; se e sunga ngoti yo bhilivila aha ka difasitela.

²² Va to tsula koko, va txi ya hoka mmangoni, veya zumba kona masiku mararu, kala kuza valondeti vawe ve tshumela ve wuya; nguko valondeti va va xotile ka totshe tinzila, aniko kha va va mana.

²³ Ngu kumaha keto, vavamna vale va vambidi va to relela ngu mmangoni, ve txhatuka va txi ta ka Joxuwa, mwana Nune, va txi ta m'geletela totshe tile ti nga va humelela.

²⁴ Se va to kha vona ka Joxuwa: “Kha ditshuri Mkoma a ningete dotshe ditiko diya manzani kwathu, nguko hambi votshe vaaki va kona va gumile mtamo masoni kwathu.”