Joxuwa 18 - Bhiblia Yo Sawuleka

Kuabaniselwa ka ditko dile do sala

¹ Se wotshe msengeletano wa vanana va ka Israyeli wu to tshangana kona Silo, aha va nga ya gwimba ditenda da msengeletano; nguko ditiko se va ti di khozisile masoni kwawe.

² Kambe hagari ka vanana va ka Israyeli, ku ti ti sate mtxhanu wa tihunzu ni timbidi ti nga ti sinzi kuamukela thomba ya tona.

³ Se Joxuwa a to Khene ka vanana va ka Israyeli: Mi na maha mihoni kala mbimo muni, eko mi lekako kuya khozisa ditiko dile, Mkoma, Txizimu txa vatate vanu, a nga mi ninga kani?

⁴ Sawulani vavamna vararu ka lihunzu ni lihunzu, kasi ku ni txi ta va ruma, va na ya dhawula ditiko, va txi di xola ni kubhaletela tipimo ta dona, ve ziva thomba ya kona, ve tshumela ve wuya kwangu.

⁵ Va na bhandelela ditiko ngu mtxhanu wa syavelo ni simbidi. Judha a na zumba ditikoni kwakwe, wulambwe; va lihunzu la ka Josefa va na zumba ditikoni kwawe, wuphemba.

⁶ Mi na bhaletela ditiko mi txi di abanisa ngu mtxhanu wa sibhande ni simbidi, mi txi tisa kwangu mibhalo ya kona, kasi ku ani ni xaxuva tixolo masoni ka Mkoma, Txizimu txathu.

⁷ Valevhi va na mbi va ni txyavelo txa thomba hagari kwanu; nguko wuphaxeli wa Mkoma ngu yona thomba yawe. Kasi Gadhi, ni Rubheni ni hafu ya lihunzu la ka Manasi, va amukete thomba yawe mtxhatuko ka Jordhani, wutxani, ayile Mosi, txithumi txa Mkoma, a nga va ninga.

⁸ Sekoko, vavamna vale va to khukha ve tsula; se Joxuwa a to leletela vale va nga txi tsula kuya abanisa ditiko, a txi khene: “Tsulani mi txi ya tsimbila-tsimbila ditikoni, mi txi bhaletela mazumbelo a dona, mi txi wuya kwangu, se ani ni na mi xaxuvela tixolo kona hawa, masoni ka Mkoma, kona hawa Silo.”

⁹ Va to tsula koko, vavamna vale, veya tsimbila-tsimbila ve bhaletela otshe madhoropa, ve ma abanisela ngu mtxawa wa mtxhanu wa syavelo ni simbidi, amu ka dibhuku; ngu msana va to wuya ka Joxuwa, kona wugoveloni ka Silo.

¹⁰ Sekoko Joxuwa a to va xaxuvela tixolo kona Silo, masoni ka Mkoma, se a txi abanisela ditiko ka vanana va ka Israyeli, madingano ni timwaya tawe.

Matiko a lihunzu la va ka Bhenjamini

¹¹ Ka wukhalo wo khata ku to maneka txyavelo txa lihunzu la vanana va ka Bhenjamini, madingano ni timwaya tawe: Ditiko da txyavelo txakwe di maneka hagari ka vanana va ka Judha, ni vanana va ka Josefa.

¹² Muhingano wa didhawa da wuphemba wu ti ti khukhela Jordhani ngu wuphemba, wu txi ya ngu txitimwi ka mmango, wu txi komba kuya mswa-ditambo, wu txi ya gwitela txiwulani ka Bheti-Avheni.

¹³ Ngu koneyo, muhingano wu pinda ngu Luza, nyamsi i ku Bheteli, ngu diphambo da wulambwe, wu txi relela ngu Azoti-Adhari, ngu mmango wu wu ku ngu wulambwe ka Bheti-Horoni wa hahatshi.

¹⁴ Muhingano wu txi jika wu txi ya mswa-ditambo, ngu didhawa da wulambwe ka mmango wu wu ku ngu masoni ka Bheti-Horoni ka wulambwe, wu txi gwitela masoni ka Kiriyati-Bhahali, nyamsi i ku Kiriyati-Yarime, didhoropa da vanana va ka Judha, ngu didhawa da mswa-ditambo.

¹⁵ Ka didhawa da wulambwe muhingano wu khukhela Kiriyati-Jearime, wu txiya diphambo da mswa-ditambo, hafuhi ka txisima txa mati txa Neftowa.

¹⁶ Wu txi relela kala magwito ka mmango wule wu ku ngu masoni ka mkova wa Bheni-Hinome, ngu wuphemba ka mkova wa va ka Refayime, wu txi relela mkovani ka Bheni-Hinome, wu txiya didhawa da wulambwe ka mmango wa Jebhusi, se wu txi relela wu txi ya txisimani ka Rogele.

¹⁷ Se ngu msana, wu txi tenderuka ngu wuphemba, wu txi ya hoka Eni-Xemexe, wu txi tsimbila ngu didhawa da Gelitote, ku ku ngu masoni ka mmango wa Adhumime, sekoko wu txi relela kala ka dirigwi da Bhowani, mwana Rubheni.

¹⁸ Ngu msana, wu txi pinda ngu mkovani ka Bheti-Arabha, wu txi komba kuya wuphemba, wu txi relela ngu Arabha;

¹⁹ ngu msana muhingano wu txi pinda wu txi ya wuphemba ka mkova wa Bheti-Hobla, se wu txi ya hoka magwito, ngu wuphemba ka Linene la Mnyu, magwito ka Jordhani, ngu wulambwe.

²⁰ Jordhani a ti ti maha muhingano ngu didhawa da wutxani. Ayiya i thomba ya vanana va ka Bhenjamini, madingano ni mazumbelo a mihingano yawe ni mtengo wa tinyumba tawe.

²¹ Madhoropa a lihunzu la vanana va ka Bhenjamini, ngu mtengo wa timwaya tawe, ngu awa: Jeriko, Bheti-Hogila ni Ameki-Zixa,

²² Bheti-Arabha, Zemarime ni Bheteli,

²³ Ayini, Para ni Ofira,

²⁴ Kafari-Amona, Ofini ni Gebha; digumi da madhoropa ni mambidi ni miti ya kona.

²⁵ Gibheyoni, Rama, ni Bheherote,

²⁶ Misipa, Kafira ni Mosa,

²⁷ Rekemi, Irpeheri ni Tarala,

²⁸ Sela, Elefi ni Gebhusi, (e ku Jerusalema), i Gibheya ni Kiriyati: Digumi da madhoropa ni mune, ni miti ya kona; ayiya i thomba ya vanana va ka Bhenjamini, madingano ni mtengo wa timwaya ta kona.