Joxuwa 1 - Bhiblia Yo Sawuleka

Joxuwa a txi maneka ka wukhalo wa Mosi

¹ Se ku to maheka to msana ka kufa ka Mosi, txithumi txa Mkoma, Mkoma a wombile ka Joxuwa, mwana Nune, txithumi txa Mosi, a txi khene:

² “Mosi, txithumi txangu, a fite; konkuwa, khukha koko, txhatuka mnambo wa Jordhani, awe ni votshe vathu vava, mi txi ya ka ditiko di ni ningako vanana va ka Israyeli.

³ Wotshe wukhalo wu mikondo yanu yi no kanda, ani ni mi ningile, nga kule ni nga womba ka Mosi.

⁴ Kukhukhela txiwulani ni Libhanoni, kala ka mnambo wa hombe, i ku mnambo wa Ewufrate, dotshe ditiko da Vaheti, kala ka Linene la hombe, mswa-ditambo, dotshe di na mi lumba.

⁵ Ni wammweyo kha na mbi tsana masoni kwako, otshe masiku a kuhanya kwako; kufana ni kule ni nga va ni Mosi, ngu toneto, ni na va ni nawe; kha ni na mbi kuleka, hambi ku kusiya.

⁶ U fanete kuva ni mtamo, u txi tsanisa mbilu, nguko ngawe u no abanisela ditiko ka vathu vava, adi ni nga xambanya ka vatate vawe, ti to ni na va ninga.

⁷ Tsana, uva ni mtamo, u tsanisa mbilu, kasi ku u txi khutalela kuxayisa yotshe milayo yi Mosi, txithumi txangu, a nga kuleleta; u nga ti hambukise ka yona, u txi ya txinene mwendo txibhabha, kasi ku u na humelela ka yotshe mithumo yako.

⁸ Dibhuku diya da mlayo u nga thuke u txi hambana nado; aniko zumba u txi di alakanya wusiku ni mitshikari, kasi ku u txi khutalela kuxayisa totshe ti ti nga bhalwa ka dona, nguko di kumaha u humelela ka totshe tinzila tako, se u tsimbila kha kwati.

⁹ Ina kha na kugela ani kani? Tsana uva ni mtamo; u nga xamale, kambe u nga thave, nguko Mkoma, Txizimu txako, a ni nawe, ni hani mu uyako kona.”

Kutilulamisela kutxhatuka mnambo wa Jordhani

¹⁰ Sekoko Joxuwa a to leleta ka vathangeli va vathu, a txi khene:

¹¹ Pindani ngu hagari ka wugovelo, mi txi leleta vathu mi txi khanu: Ti longiseleni timbuva, nguko msana ka masiku mararu, mi na txhatuka mnambo wuwa wa Jordhani, kasi kuya teka ditiko di Mkoma, Txizimu txanu, a mi ningako, di txi maha danu.

¹² Se Joxuwa a to womba ka va ka Rubheni, ni va ka Gadhi, ni ka hafu ya lihunzu la ka Manasi, a txi khene:

¹³ Alakanyani dipswi di a nga mi leleta Mosi, txithumi txa Mkoma, a txi khene: “Mkoma, Txizimu txanu, wa mi ninga kuhumula, kambe wa mi ninga ditiko diya.”

¹⁴ Vasikati vanu, vanana vanu, ni sifuyo sanu, si na sale ka ditiko dile Mosi a nga mi ninga, ngu didhawa dile da Jordhani; aniko anu mi na txhatuka mi di xomile, masoni ka vananu, votshe va tindena ni va mtamo, mi na va vhuna,

¹⁵ kala kuza Mkoma a txi ninga kuhumula ka vananu, kufana ni nanu, se ni vona va na mane ditiko di Mkoma, Txizimu txanu, a va ningako; sekoko mi na tshumelela ka ditiko di di mi lumbako, a nga mi ninga Mosi, txithumi txa Mkoma, akheno mtxhatuko ka Jordhani, ngu didhawa da wutxani.

¹⁶ Sekoko va to xamula ka Joxuwa, va txi kha vona: Totshe ti u nga hi leleta, hi na maha, kambe ni hani u no hi ruma, hi na tsula.

¹⁷ Kufana ni ku hi nga engisa Mosi ka totshe, ngu toneto, hi na kuengisa nawe; aniko Mkoma, Txizimu txako, a nave ni nawe, nga kule a nga va ni Mosi.

¹⁸ Ni wihi m'thu wu a no kaneta sileleto sako, asi engisi mapswi ako ka totshe ti u no mruma, a na dawa; aniko tsana dwe, uva ni mtamo.