Jona 3 - Bhiblia Yo Sawuleka

Jona a di Ninivha

¹ Se dipswi da Mkoma di to ta ka Jona ka wumbidi, di txi kha dona:

² Khukha, u tsula ka Didhoropa da Hombe da Ninivha, u txi ya txhumayela mapswi ale ani ni nga kugela.

³ Se a to khukha Jona e tsula Ninivha, madingano ni dipswi da Mkoma, nguko Ninivha i ti ti Didhoropa da Hombe, do dingana ku di tshanganisa ngu kutsimbila masiku mararu.

⁴ Se Jona a to khata kuwulela didhoropani, ngu kutsimbila mpimo wa ditshiku, a txi txhumayela a txi khene: Msana ka mune wa magumi a masiku, Ninivha a na hoxotwa.

⁵ Se vathu va Ninivha va to kholwa ka Txizimu, se ve nuwela mhaka ya kutitona. Se va to ambala masaka, kukhukhela ka wa hombe kala ka wam'dotho.

⁶ Nguko dipwsi diya di hokile ka mfumeli wa Ninivha, se a to khukha ha txituluni kwakwe ka wukoma, a txi thavisa syambalo sakwe, e fenengela masaka, e khalahatsha hadikhumani.

⁷ Se a to nuwela Ninivha, ngu kuruma ka mfumeli ni ka vahombe vakwe, a txi khene: “Vathu, sihari, tihomu, ni tinvuta, si nga dukete txilo ni txa tximwetxo, hambi ku siyisa kudyiswani, ni kuselani ka mati.”

⁸ Aniko vathu ni sihari si nave si di fenengetilwe ngu masaka, se si dila ngutu ka Txizimu, si txi hunduluka, tximwetxo ni tximwetxo ka nzila ya txona yo biha, ni kulwa kule ku kuho manzani ka sona.

⁹ I mani a ti zivako taku mwendo Txizimu txi nga tshumela txi tilaya, se txi hambana ni txiviti txa kuhenya ka txona, kasiku hi si lovi kani?

¹⁰ Se Txizimu txi to wona mithumo yawe, nga ti va nga hundulukisa tona ngu nzilani kwawe ko biha, se Txizimu txi tilayile ka wubihi wule txi nga ti ti wu wombile taku txi na wu maha, aniko kha txa wumaha.