Jona 2 - Bhiblia Yo Sawuleka

Mkombelo wa Jona

¹ Se Jona, a to kombela ka Mkoma, Txizimu txakwe, a di mndani ka txihaka.

² A txi khene: Kupandisekani kwangu ni dite ka Mkoma, se ene a to ni xamula; ni di mndani ka txihaka ni kwangute, se awe u engisile dipswi dangu.

³ Nguko awe u ni rinzile amu ka diziva, hagari ka tinene, se mati o khulunga ma to ni ranganyeta; otshe mavimbi ako ni kubhwabhwamela kwako, si pindile ngu txitimwi kwangu.

⁴ Se ani nokha ni ti khani: Ni rinzilwe kule ni khohe yako; hambi keto, ni na engeta ni wona dithepele dako do sawuleka.

⁵ Mati ma to ni randela, meza me manela m'hefemulo wangu, kuhokoma ku ni khumbunyetile do gwita, se mwasi wa matini wu ni tombetete ha msungo kwangu.

⁶ Ani ni relete kala kuya hoka makhatoni ka mimango, matimba a tisimbi a ha mafuni ma tutumile, me ta ni tsivela do gwita; aniko awe u txhatxhisile wutomi wangu kutimelani, Awe Mkoma, Txizimu txangu!

⁷ Mbimo yile moya wangu wu nga ti ti tsivala mndani kwangu, ani ni ku alakanyile Mkoma; se mkombelo wangu wu to wulela kwako, dithepeleni kwako ko sawuleka.

⁸ Avale va ti ningetetelako ka ti ti si vhuniko txilo, va leka wumbilu wa Mkoma vapune.

⁹ Aniko ani ni na kuninga miphaxo ngu dipswi do bonga, a ti ni nga xambanya ni na ti maha; kuhanyiswa kuta ngu ka Mkoma!

¹⁰ Sekoko Mkoma a to womba-womba ka txihaka, se txona txi to kosa Jona ha mafuni.