Johani 3 - Bhiblia Yo Sawuleka

Jesu ni Nikodhemo

¹ Ku ti ni m'thu wa Mufarisi, ditina dakwe i nga ti Nikodemo; mfumeli wa Vajudha.

² A to ta ka Jesu ni wusiku, a txi ta khene kwakwe: “Rabbi, ha tiziva ti to u M'gondisi wu a humako ngu ka Txizimu, nguko kha nga ho m'thu wu a sikotako kumaha sidiwukiso si u si mahako, ngako Txizimu txi si nga ni nene.”

³ Jesu a to xamula a txi khene kwakwe: “Ngu ditshuri, ngu ditshuri, na kugela ku khani: Ngako m'thu asi velekwi da wumbidi, kha na kusikota kuwona Mfumo wa Txizimu.”

⁴ Nikodhemo a txi khene kwakwe: “M'thu, ngako a di kumbile, a nga velekiswa kutxani? Ina a nga tshumelela mndani ka mame wakwe, e tshumela e velekwa da wumbidi kani?”

⁵ Jesu a to xamula a txi khene kwakwe: “Ngu ditshuri, ngu ditshuri, na kugela ku khani: Ngako m'thu asi velekwi ngu mati ni Moya, kha na kusikota kuwulela Mfumoni ka Txizimu.

⁶ Asi si nga velekwa ngu mmidi i mmidi kambe asi si nga velekwa ngu Moya i moya.

⁷ U nga xamale ngu kuva ni di kugete ku khani: Mi fanete kuvelekwa da wumbidi.

⁸ Diphuho di futeta mu di randako kona, se u pfa txiwudi txa dona, aniko khu ti zivi ti to di ta ngu hani ni ti to di ya hani. Ngu toneto, ti mahekako ni ka votshe va va nga velekwa ngu Moya wa Txizimu.”

⁹ Nikodhemo a to mxamula a txi khene: “Ti nga mahisa kutxani toneto kani?”

¹⁰ Jesu a to mu xamula a txi khene: “Awe u m'gondisi wa Israyeli, se khu ti zivi timhaka tiya kani?

¹¹ Ngu ditshuri, ngu ditshuri, na kugela ku khani: Hi womba ti hi ti zivako, hi fakaza ati hi nga ti wona, aniko kha mi amukeli wufakazi wathu.

¹² Eko ni mi gelako timhaka ta ha mafuni, mi si tumeli, mi na tumelisa kutxani, ngako ni txi mi gela ta nzumani kani?

¹³ Kha ku na m'thu wu a nga kwela nzumani, hahanze ka wule a nga txhika ngu nzumani, i ku Mwanana wa M'thu.

¹⁴ Nga kule Mosi a nga hayeka mnyoka txiwulani, kufana ni toneto nene Mwanana wa M'thu a na hayekwa,

¹⁵ kasiku awule a kholwako kwakwe a na mana wutomi wo mbi guma.”

¹⁶ Nguko Txizimu txi kombile lirando ka vathu, ahawa txi nga za txi ningela Mwanana wa txona wa Mmweyo ekha, kufela ku, votshe va va no kholwa kwakwe, va si lovi, aniko va na mana wutomi wo mbi guma.

¹⁷ Nguko Txizimu kha txa rumela Mwanana wa txona ku ta abanisa ditiko, aniko txi mrumete ti to ditiko di ta mana kuhanyiswa ngu ngene.

¹⁸ Awule a kholwako kwakwe, kha na mbi abaniswa, aniko awule asi kholwiko, se a abanisilwe, nguko kha tumela ditinani ka Mwanana wa Mmweyo ekha wa Txizimu.

¹⁹ Txigelo txa kuabaniswa ngu txiya: Kuwonekela kutile ha mafuni, aniko vathu va randile ngutu txidema kupinda kuwonekela, nguko mithumo yawe i ti yo biha.

²⁰ Nguko wuhi ni wuhi a mahako kubiha a nyenyana ni kuwonekela, kambe kha ti kuwonekelani, kufela ku mithumo yakwe yi si landulwi.

²¹ Aniko awule a mahako ti i ku ta tinene, a tshuketela ha kuwonekelani, ti taku mithumo yakwe yi txi woneka ha kubasani, nguko a yi maha ngu tifanelo ta mlayo wa Txizimu.

Jesu ni Johani Mubhabhatisi

²² Msana ka toneto, Jesu a to ya ditikoni ka Judheya, a di ni vagondiswa vakwe, se a txi ya zumba navo e bhabhatisa vathu.

²³ Johani nene a ti bhabhatisa Enoni, hafuhi ni Salimi, nguko ku ti ni mati amangi koneyo, ni vathu vavangi va txi ya koneyo veya bhabhatiswa.

²⁴ Johani a ti sinzi kukhotelwa mkorani.

²⁵ Se ku to humelela kukanetisana ngu mhaka ya ku ti basisa hagari ka vagondiswa va Johani ni ujudha wokari.

²⁶ Va to tsula ka Johani va txi ya mu gela ku kha vona: “M'gondisi, awu u nga ti nayo mtxhatuko kheya ka Jordhani, awu u nga fakaza ngu ngene, wa bhabhatisa nene, se votshe va ya kwakwe.”

²⁷ Johani a to xamula a txi khene: “M'thu kha sikoti kumana txilo ni txa tximwetxo, ngako a sa ningwa ngu nzuma.

²⁸ Anu mipune mi tifakazi ta ti ni nga womba ni txi khani: ‘Hi nga ani Mesiya, ni to rumelwa kuthangela masoni kwakwe.’

²⁹ Nyamne wa msikati ngu mteki, se pheleketi ya mteki yo mu bangalata ni ku mu engisa, yi tsaka ngu kutsaka ka hombe, ngako yi txi pfa dipswi da mteki: Aliya ngu lona litsako langu, lona li hetisekile.

³⁰ Ene a fanete kukula, ani ni txi va hahatshi.”

Awule a tako ngu nzumani

³¹ Awu a tako ngu txitimwi, a txitimwi ka votshelele; awu a tako ngu ha mafuni, mbwa mafu, se a womba-womba ngu ta mafuni. Awu a tako ngu nzumani,

³² a fakaza ngu ti a nga ti wona ni ti a nga tiengisa, aniko kha ku na m'thu wu a amukelako wufakazi wakwe.

³³ Awu a amukelako wufakazi wakwe wa tsanisa ti to Txizimu txi thembekile.

³⁴ Awu a nga rumwa ngu Txizimu a womba-womba mapswi a Txizimu, nguko ngu txona txi nga mninga Moya i si nga ngu mpimo.

³⁵ Tate wa randa Mwanana, a vekile sotshe manzani kwakwe.

³⁶ Awu a kholwako ka Mwanana, a ni wutomi wo mbi guma. Awu asi engisiko Mwanana, kha na mbi wona wutomi, aniko kuhenya ka Txizimu ku txitimwi kwakwe.