Johani 12 - Bhiblia Yo Sawuleka

Jesu ngako a txi totwa mafura, a di Bhetaniya

¹ Ngako ku di ngadi sate mtxhanu wa masiku ni dimwedo kasi ku nava Pasika, Jesu a to hoka Bhetaniya, ahawa a nga ti zumba kona Lazaro, awu a nga wuswa kufani ngu Jesu.

² Va to mmahela txilalelo koneyo. Marta a ti ti va thumela, se Lazaro i ti mmweyo wa vale va nga ti nayo ha sakudyani.

³ Sekoko Mariya a to teka mafura o bhumula, a nardhu, o mbi patelwa ni txilo, o dhula ngutu, e tota mikondo ya Jesu, se e mu bahulela mikondo ngu misisi yakwe. Nyumba yi txi tala ngu kubhumula ka mafura.

⁴ Sekoko Judha Iskariyoti, mmweyo wa vagondiswa vakwe, awu a no mningela, a txi khene:

⁵ “Ngu kutxani mafura awa ma nga mbi xaviswa ngu mazana mararu a madhenari, me ningwa sikulungu, kani?”

⁶ Ene a wombisile eto, i si nga ngu kuthela kota ngu sikulungu, aniko nguko i nga ti dikhamba da kupa asi si nga txi vekwa msavani, nguko i ti ene, i nga ti mñoli wa wona.

⁷ Jesu a to xamula a txi khene: “Mu lekeni, ene a ma xayisela ditshiku da kutshotshwa kwangu.

⁸ Nguko sikulungu si ni nanu otshe masiku, aniko ani kha mi nga ni nani otshe masiku.”

Txikungo txa kudaya Lazaro

⁹ Se Vajudha vavangi, ngako va di engisile ti to Jesu waho konaho, va to ya, na i si nga kuyela kuya wona Jesu dwe, aniko i ti kuyela kuya wona Lazaro nene, awu ene a nga ti mwusile ka vafi.

¹⁰ Se vaphaxeli va hombe va to maha txikungo txa kudaya nene Lazaro.

¹¹ Nguko Vajudha vavangi va ti va tshuralela ngu mhaka yakwe, ve kholwa ka Jesu.

Jesu a txi wulela ngu wudhumo Jerusalema

¹² Mangwanani ka kona, dibutho da hombe di nga ti tile M'busoni, ngako va di engisile ti taku Jesu wata Jerusalema,

¹³ va to teka mahanga a mitxhese, ve mu hingeta, na va txi kwangula, va txi kha vona: “Hozana! A na dhumiswe awu a tako ngu ditina da Mkoma, Mfumeli wa Israyeli!”

¹⁴ Ku ti ngako Jesu a di mani tximbongolana, a to txi gadha, madingano ni ti ti nga bhalwa, va txi kha vona:

¹⁵ “U nga thave, dihorana da Siyoni. Ndiyo wata Mkoma wako, a di gadhile mwanana wa mbongola.”

¹⁶ Kukhatani, vagondiswa vakwe kha va ti engisisa kha kwati timhaka tiya. Hahanze ka mbimo yile Jesu a nga pfaliswa, ngu kona va nga khumbula mibhalo yi yi nga ti bhaletwe Ene, ni kuziva ti to ngu toneto va nga mmahela tona.

¹⁷ Votshe va va nga ti nayo va ti mu fakazela ti to ene a dhani Lazaro ngu dithowoni e mu wusa kufani.

¹⁸ Ngu toneto, dibutho di humile di txi mu hingeta, nguko va ti engisile ti to a mahile txidiwukiso txonetxo.

¹⁹ Vafarisi koko va to gelana, va txi kha vona: “Hi nga wonani! Athu kha hi na mbi kota txilo. Ma ti wona ti to ditiko dotshe di londetela ene.”

Vagriki vokari va lava kuwona Jesu

²⁰ Hagari ka vale va nga ti tile M'busoni, ku ta khozela, ku ti ti ho Vagriki.

²¹ Vona va to ya ka Filipi, i nga ti wa Bhetsayidha ka Galileya, va txi ya kombela va txi kha vona: “Mkoma, hi lava kuwona Jesu.”

²² Se Filipi a to ya gela Andreya, senikoko Andreya ni Filipi veya gela Jesu.

²³ Se ene a to va xamula a txi khene: “Txi hokile txikhati txa kupfaliswa ka Mwanana wa M'thu.

²⁴ Ngu ditshuri, ngu ditshuri, na mi gela: Ngako nyengi ya fulaho, yi yi wako mafuni, yi si fi, yi na zumba yokha. Aniko, ngako yi txi fa, yi ninga mihando yayingi.

²⁵ Awule a dhundako wutomi wakwe a na mwalalelwa ngu wona, ani wule a vengelako wutomi wakwe ditikoni muwa, a na wu veketa kala kuhanyani ka wutomi wo mbi guma.

²⁶ Ngako m'thu a txi lava ku ni thumela, a na ni londise, se ahawa ani ni ku kona, nene wule a ni thumelako a na va a di konaho. Se ngako m'thu a txi ni thumela, Tate wangu a na mu dhumisa.”

Jesu a txi womba-womba ngu lifo lakwe

²⁷ “Se konkuwa, moya wangu wa pandiseka. Aniko, ni na womba txani? Ina ni na khani: Tata, ni hulukise ka txikhati txiya kani? Aniko ngu txona txiya txikhati ni nga tela txona.

²⁸ Tata dhumisa ditina dako.” Ti di mahile eto, kutota dipswi ngu nzumani, adi di nga womba ku khene: “Ani ni di dhumisile, kambe ni na engeta ni di dhumisa!”

²⁹ Dibutho da vathu va va nga ti konaho, va di pfite toneto, va to kha vona: “Txingwalangwanda.” Vamwanyani va txi kha vona: “I ngelozi, yi nga bwabwata nayo.”

³⁰ Jesu a to womba a txi khene: “Dipswi diya kha da humelela ngu mhaka yangu, aniko di humelete ngu mhaka yanu.

³¹ Se ngu yona yiya mbimo ya kulamulwa ka ditiko. Ngu kona a no tovelwa mfumi wa mafu awa.

³² Se nani, mbimo yi ni no va ni di guletilwe txitimwi ka mafu, ni na ndindela votshe vathu va txi ta kwangu.”

³³ Ene a wombisile tiya ngu kudinganisa ati a no fisa tona.

³⁴ Vathu va dibutho va to xamula va txi kha vona: “Hi ti engisile amu ka Mlayo ti to Mesiya a na vaho kala kupinduka. Se u wombisa kutxani awe ti to Mwanana wa M'thu a fanete kuguletwa, kani? Mwanana wa M'thu wuwa ngu mani kani?”

³⁵ Se Jesu a to va xamula a txi khene: “Liwoningo li ngadi ni nanu ngu mbimoanyana. Tsimbilani mi di ngadi ni liwoningo, kasiku txidema txi si mi mani, nguko awu a tsimbilako txidemani, kha kuzivi amu a yako kona.

³⁶ Ngako mi di ngadi ni liwoningo, kholwani ka liwoningo, mi na phinduka mi va vanana va liwoningo.” Msana ka kuwomba timhaka tiya, Jesu a to khukha kwawe, eya sisala.

Vathu va kwa mbi kholwa ka Jesu

³⁷ Hambiko a nga maha sidiwukiso so tala masoni kwawe, kha va kholwa kwakwe,

³⁸ kasi kutatiseka dipswi da mprofeti Isaya, a nga khene: “Mkoma i mani a nga kholwa ka mapswi athu, kani? Diwoko da Mkoma di wonekisilwe ka mani kani?”

³⁹ Ngu konaho, va tandekile kukholwa, nguko Isaya a tshumete a txi khene:

⁴⁰ “A phumisile maso awe e bangisa timbilu tawe, kasiku va si woni ngu maso, ni ku va si pimi ngu timbilu tawe, kufela ku va si hunduluki, nani ni si va hanyisi.”

⁴¹ Isaya a wombile mapswi awa, nguko a woni kuphatima kwakwe, se e womba-womba ngu ngene.

⁴² Hambi keto, vavangi hagari ka tinduna, va ti ti kholwa kwakwe; aniko, ngu mhaka ya kuthava Vafarisi, va si ti wombi ha kubasani, kasiku va si tovelwi disinagogani,

⁴³ nguko va randile kudhumiswa ngu vathu, kupinda kudhumiswa ngu Txizimu.

Dipswi da Jesu da lamula

⁴⁴ Se Jesu a to kwangula a txi khene: “Awu a kholwako kwangu, kha kholwi kwangu, aniko a kholwa ka wule a nga ni ruma;

⁴⁵ Se awule a ni wonako, a wona ni wu a nga ni ruma.

⁴⁶ Ani ni liwoningo, ni tile ha mafuni, kasiku wuhi ni wuhi a kholwako kwangu, asi thuki e zumba txidemani.

⁴⁷ Ngako m'thu a di engisile mapswi angu, asi ma veketi, hi nga ani ni mu abanisako, nguko kha na tela ku ta abanisa mafu, aniko ni tete ku ta hanyisa mafu.

⁴⁸ Awu a ni lambako ni ku ambi amukela mapswi angu, a nayo muabanisi wakwe: Dipswi di ni ngadi womba, ngu dona di no mu abanisa ngu ditshiku da magwito.

⁴⁹ Nguko kha na womba-womba ngu ta kukhukhela kwangu; aniko Tate wu a nga ni ruma, ngene a nga ni leleta ati ni fanelako ku ti womba ni ku ti zivisa.

⁵⁰ Kambe na tiziva ti to mlayo wakwe mbutomi wo mbi guma; se ati ni ti wombako, ni ti womba nga ti Tate a nga ni gelisa tona.”