Jeremiya 6 - Bhiblia Yo Sawuleka

Mlala a txi randela Jerusalema

¹ Anu vanana va Bhenjamini, tutumani mi huma hagari ka Jerusalema, vetani mpundu Tekowa, emisani txikombiso txa mndilo Bheti-Hakeremi; nguko dikhombo dita ngu Wuphemba, ni kulovisa ka hombe.

² Ni na lovisa m'horana wa Siyoni, awu i ku wo tshura ngutu na i ti wa wugomba.

³ Vadyisi va na ya kwakwe ni sibala sawe, ve gwimba matenda awe ve mrandela; mmweyo ni mmweyo a na dyisa ka wukhalo wakwe

⁴ Khatani kulwa nayo! Wukani miya kona ni mitshikari. Yowe, ditambo diswite, ni mitsudi ya kuswa ka dona yi laphile.

⁵ Wukani, a hi m'ganyateleni ni wusiku, hi txi ya khundumusela tinyumba takwe ta wukoma.

⁶ Nguko Mkoma wa Mabutho a Tiyimbi a khene: Gangani tindonga mi maha libhingo la kubhiyela Jerusalema; nguko didhoropa di dinganako kutsayiswa; di taletwe ngu wutsindaveti.

⁷ Nga txisima txi txi humisako mati, kuhumisa tonato kubiha ka dona. Kuzoriyetana ni kuonhetela ka pfala ka dona, kulwa ni tivandwa siho masoni kwangu, ngu ha ku si gwitiko.

⁸ Hunduluka, awe Jerusalema, kasi ni si ku tshuraleli, ni txi kumaha dirumbi, ditiko di kuwalo muaki.

Kutsayiswa ngu mhaka ya txionho

⁹ Mkoma wa Mabutho a Tiyimbi a khene: Va na botetelwa vanyamtshodwe va ka Israyeli, ku ngako hetiselwa mapheho a mivhina. Tshumeta dianza dako txirunduni. Nga muoleli wa mauvha.

¹⁰ Ni na gela mani, ni maha wufakazi waku va na wu engisa kani? Tinzeve tawe maphanzeve, kha va sikoti kuengisa. Mhaka ya Mkoma njiruko kwawe kha va yi dhundi.

¹¹ Ngu konaho, ni taletwe ngu kuhenya ka Mkoma. Ni karate ngu ku ti ñola. Tshakunuta kuhenya txitimwi ka vanana amu tinzilani ka hombe, ni txitimwi ka tisengeletano ta majaha, mwamna ni msikati va na ñolwa kumweko, txikosana ni wule a nga talelwa ngu masiku.

¹² Nyumba yawe yi na ningelwa vamwani, kumweko ni tithembwe tawe ni vasikati vawe; nguko ni nawuluta dianza dangu txitimwi ka vaaki va ditiko, kuwomba Mkoma.

¹³ Nguko va ti ningetete mu ka kumbilukela, vanana ni vahombe, vaprofeti ni vaphaxeli, votshe va onga.

¹⁴ Kha va khatala kuthuma tivandwa ta vathu vangu va txi kha vona: Kuthuthile, kuthuthile! Na ku si nga ni kuthutha.

¹⁵ Ina va pfite tingana ngako va di mahile manyala kani? Kota, kha va pfa tingana. Kambe kha va zivi ku wa tingana. Ngu konaho, va na wa kumweko ni vamwani; va na wa ngu mbimo yi ni va tsayisako, kuwomba Mkoma.

Israyeli a txi leka nzila ya Txizimu

¹⁶ Mkoma a khene: Emani tinzilani, mi wonisisa; mi wotisela tinzila ta kale, mi txi khanu: Kasi nzila ya yinene ngu yihi kani? Sekoko, tsimbilani ngu yona. Mi na mana kuhumula ka mihefemulo yanu. Aniko vona va to xamula, va txi kha vona: Kha hi tumeli kutsimbila ngu yona.

¹⁷ Ni vekile vawoneleli hagari kwanu, ni txi khani: Pfanani kutuma ka mpundu. Aniko va xamute, va txi khani: Kha hi na mbi ku engisa.

¹⁸ Ngu konaho, anu vamatiko, engisani: Ni nawe msengeletano ziva ti ti nga humela!

¹⁹ Engisa awe mafu! Ni na tisa dikhombo txitimwi ka ditiko diya, i ku muhando wa maalakanyo awe; nguko kha va engisa mapswi angu, va eyisile mlayo wangu.

²⁰ Ma ni vhuna txani mafura a Sabha ni mipepo ya ditiko da kule kani? Miningelo yanu ya kuhiswa kha yi ni tsakisi, ni miphaxo yanu kha yi ni tsakisi.

²¹ Ngu konaho, Mkoma a khene: Ni na di vekela sikhunguvanyiso ditiko diya, vaveleki ni vanana va na khuveka kumweko, mwakelani ni mngana wakwe va na lova kumweko.

Valala vo ta ngu Wuphemba

²² Mkoma a khene: Wonisisani vathu vatako ngu Wuphemba, ditiko da hombe di na wuka ngu magwito ka mafu.

²³ Va ñola malaho ni matxhari; va ni timbiti, kha va na wumbilu; diguwa dawe ngu nga txiwuta txa linene, va gadhile mahantxhi na va di xomile kulwa ni nawe, awe m'horana wa Siyoni.

²⁴ Hi pfite nduma yawe, mawoko athu ma guma mtamo; hi tetwe ngu msanekera, ni kupanda nga ka wamsikati wu a lumwako.

²⁵ Mi nga yeni thembweni hambi kutsimbila tinzilani; nguko ditxhari da mlala diho konemo da dhukisela ka otshe madhawa.

²⁶ Awe m'horana wa vathu vangu, ti ambeke disaka, u pulukuta dikhumani; peka huwa yo nga yo dilela mwanana wammweyo ekha, xomulo ya txiviti. Nguko muhasamuli a na hi tela ngu txidhukisa.

²⁷ Ni kuvekile kuva txitezi txa wuwoneleli wa vathu vangu, uva dikhokhola, ti taku u ziva ni kuxola tsimbilelo yawe.

²⁸ Vona votshe vatiwuki ni va va ti tsimbako, va tsimbila-tsimbila ve lumbeta; va bangi kufana ni msuku ni txikete; votshe va bihile.

²⁹ Vatxhokoloteli va futetela ngu mtamo, mthovhu wu hisilwe ngu mndilo; mnyekisi a nyekisile walo, nguko vo biha kha va thaviswa.

³⁰ Vona va na wombwa ku i silivhela yo lekwa, nguko Mkoma a va lekile.