Jeremiya 50 - Bhiblia Yo Sawuleka

Kuhonyolwa ka Bhabhilona

¹ Dipswi di a ngadi womba Mkoma xungetano ngu Bhabhilona, madingano ngu ditiko da Vakaldheya, ngu txisofu txa mprofeti Jeremiya.

² Zivisani hagari ka matiko; pfalisani, mi txi gwimba m'jeke, pfalisani mi nga feketeleni; wombani mi txi khanu: Ku tekilwe Bhabhilona, a phazamisilwe Bheli, a gumutwe Merodhaki, si wisilwe tingana sifananiso sawe, sizimu sawe si wisilwe.

³ Nguko a wuketwe ngu ditiko dimwedo da Wuphemba, di no maha ti taku ditiko dakwe di maha txiwula, kha ku na mbi maneka wo zumba ka dona: Vathu va tutumile kumweko ni sifuyo sawe, va tsute.

Kuwuya ka Israyeli

⁴ Ka masiku onayo ni ka yona yile mbimo, kuwomba Mkoma, vanana va ka Israyeli va nata, kumweko ni vanana va ka Judha; va na wuya va txi dila, va na lava Mkoma, Txizimu txawe.

⁵ Va na wotisa va di nzilani ka Siyoni, tikhohe tawe ti na rendekela koneyo, va nata ti pananisa ni Mkoma, ka Txitumelelano txo mbi gwita, txi na kwa mbi dhuka txi divalwa.

⁶ Vathu vangu ndinvuta to mwalala, vadyisi va tona ngu vona va nga ti mwalata, va ti lekile ti txi pengela kuya mimangoni, ti si alakanyi kutshumelela dizumboni ka tona.

⁷ Votshe va va nga txi ti mana va dayete; se valala vawe va txi kha vona: Ni mnandu wumwewo kha hi na mbi wu mana; nguko va onhete Mkoma, amu kuzumbako kona wululamo; ina, Mkoma, i kuthemba ya tate wawe.

⁸ Thavani hagari ka Bhabhilona, kambe humani ditikoni ka Vakaldheya, mahani nga tihamba masoni ka mtxhambi.

⁹ Wonani ti taku ni na wusa msengeletano hagari ka matiko a hombe a Wuphemba, kasi va na peka Bhabhilona, va na ti longisela dona; kukhukhela konaho, tingove tawe ti na fana ni ta ndena ya mtamo, kha ti na mbi hosa.

¹⁰ Se Kaldheya a na maha khumbi: Votshe vale va no honyolela somaha va na khura, kuwomba Mkoma.

Kuwa ka Bhabhilona

¹¹ Hambi mi nga tsaka, mi txi ndakandaka ngu kupfa kutshamba anu vapi va thomba yangu, mi txi simbelana ku nga mo va marole a kuena, mi txi emba ku nga mahantxhi a mtamo.

¹² A na humbwa a txi wa mwamwanu, a na wiswa tingana wu a nga mi veleka: Wonani ti taku ene a na va dimwedo da matiko o gwitisa, ku va txiwula, ditiko da kuoma ni txiwunda.

¹³ Ngu mhaka ya kuhenya ka Mkoma, kha ku na mbi zumba m'thu, ku na maha txiwula, ni mmhi a no pinda ngu Bhabhilona a na xamala ni kuveta mloti, a txi wona tiphango ta kona.

¹⁴ Ti longiseleni kurandela Bhabhilona, anu motshenu mi nga xoma malaho; khhwinzani mi nga tsetseni tingove, nguko a onhete Mkoma.

¹⁵ Mu wukeleni ngu diguwa, mi txi mu horolokela; ene se a ti ningete; sitsaniso sakwe si wite, maguma akwe ma khundumusetwe; nguko yimbi yiya nja Mkoma; mlwiseni, nga ti a nga maha, mahisani toneto kwakwe.

¹⁶ Thavisani kona Bhabhilona ava va phayako, ni vale va ñolako disikela ngu mbimo yo funyela: Ngu mhaka ya ditxhari do hinda, mmweyo ni mmweyo a na wukela va ka kwawe, kambe mmweyo ni mmweyo a na tshumelela ditikoni kwawe.

Kuwuya ka Israyeli

¹⁷ Nvuta yo mwalala ngene Israyeli; tingonyamo ti mtutumisile. Mfumeli wa Asiriya ngene a nga khata ku m'vhandamulela; se ngu magwito Nebhukodhonosori, mfumeli wa Bhabhilona, a to mfunya marambu.

¹⁸ Ngu toneto, a khene kha Mkoma wa Mabutho a Tiyimbi, Txizimu txa Israyeli: Wonani ti to ni na tsayisa mfumeli wa Bhabhilona ni ditiko dakwe, nga tile ni nga mahisa tona ka Asiriya.

¹⁹ Israyeli ni na mmaha e tshumelela dizumboni kwakwe, a na dyisela Karmeli ni Bhasani; moya wakwe wu na khuriswa kona Efrayime ni Gileyadhi.

²⁰ Ka ona masikuyo ni ka yoneyo mbimo, kuwomba Mkoma, ku na xotwa wubihi wa Israyeli aniko kha wu na mbi manwa, hambi sionho sa Judha kambe kha si na mbi maneka, nguko ni na divalela ava ni no va siyeta.

Kukonwa ka Bhabhilona

²¹ Kwela u wukela ditiko da Meratayime, khukha u txi di wukela, u lwisa vazumbi va Pekodhe: Xasela ni kukhundumusela sotshe ngu msana kwawe, kuwomba Mkoma, mahisa tona ti ni nga ku rumisa tona.

²² Diguwa da kulwa diho ha mafuni, ni da kukhundumusela.

²³ Eto yi nga wiliswa tona ni kufaywa hamela yile yi nga xanisa ditiko dotshe! Eto a xamalisiswako tona ngu matiko Bhabhilona!

²⁴ Ni kuriyete mikuni, se u txikilwe, kambe awe Bhabhilona khwa tiziva: U manwi, kambe u ñotwe, nguko u wukete Mkoma.

²⁵ Mkoma a tute sizenda sakwe, a thavisile siya so kombisa kuhenya kwakwe; nguko Mkoma, Mkoma wa Mabutho a Tiyimbi a ni mthumo a lavako ku wu maha ditikoni ka Vakaldheya.

²⁶ Ngonani mi txi ta lwa nayo, anu va magwito ka ditiko, tulani sisangala sakwe, mtshanzuketeleni e maha tinyanda, mi txi mkhundumusela e guma, a nga salelwe ngu txilo.

²⁷ Dayani otshe marole a madhuna ngu ditxhari, ma tsuliseni wudayeloni: Dikhombo dawe! Nguko di hokile ditshiku dakwe, mbimo ya kutsayisa kwakwe.

²⁸ Ngu dona dipswi da vale va nga thava ve huma ditikoni ka Bhabhilona, ku va va txi ya zivisa Siyoni kuphota ka Mkoma, Txizimu txathu, kuphota ka mbimo yakwe.

²⁹ Bhabhilona mu rambeleni vamatiko votshe va va dombako malaho; vekani mazumbo anu madhawani kwakwe, ku nga huluke ni wammweyo; a na tshumetelwe madingano ni mthumo wakwe, nga tona tile a nga maha, mmaheleni toneto, nguko a wukete Mkoma ngu ku ti gwilikisa, a wukete wo Sawuleka wa Israyeli.

³⁰ Ngu toneto, mazambi akwe ma na wa tinzilani kwakwe; ni votshe vavamna va yimbi va na tutumiswa ka dona ditshiku dile, kuwomba Mkoma.

³¹ Wona ti taku ani na kuwukela awe nyakutikulise, kuwomba Mkoma, Txizimu txa Mabutho a Tiyimbi, nguko di hokile ditshiku dako, i ku mbimo yi ni no kuendela ngu yona.

³² Awule wa kutikulisa, a na ti guta a txi wa, kha ku na mbi va ni wammweyo wa ku mu wusa; ni na dhivela mndilo ka madhoropa akwe, awu wu no hisetela otshe makhalo akwe.

³³ Mkoma wa Mabutho a Tiyimbi a khene: Vanana va Israyeli ni vanana va Judha va khozisilwe kumweko; kambe votshe vale va nga va yisa wukhumbini, va va ñolisisile, kha va lava ku va txhatxha.

³⁴ Aniko Mtiruli wawe mbwa mtamo, Mkoma wa Mabutho a Tiyimbi i ditina dakwe; ngu ditshuri a na emela mhaka yawe, ku va a txi na ninga kuhumula ha mafuni, ni kumalata vazumbi va Bhabhilona.

³⁵ Di nata ditxhari txitimwi ka Vakaldheya, kuwomba Mkoma, ni txitimwi ka Bhabhilona, ni txitimwi ka vathangeli vawe, ni txitimwi ka titxhari tawe.

³⁶ Di nata ditxhari txitimwi ka va makuhu, kha va na mbi pfa txilo: Ditxhari di nata txitimwi ka tindena tawe, ti na tsivala.

³⁷ Di nata ditxhari txitimwi ka mahantxhi awe, ni txitimwi ka sikotxikani sawe, ni txitimwi ka votshe vathu va va nga patanelana, va ku hagari ka dona; se vona va na nga vavasikati: Ditxhari di nata txitimwi ka tithomba tawe, ti na honyolwa.

³⁸ Ku hisa ku na omisa mati akwe; nguko ditiko da sifananiso so mahwa, kambe sa va henyisa.

³⁹ Ngu kota yeto, ku na zumba sibanda sa txiwulani, ni sihari sa tshofu sa sitondoloni: Ti na zumba konemo ni tona timbuwu; kha ku na mbi akwa kambe, hambi kumaneka vo zumba, ka lihunzu ni lihunzu.

⁴⁰ Nga mbimo yile Txizimu txi nga lovisa Sodhoma ni Gomora ni vaakelani vakwe, kuwomba Mkoma; nga toneto ni wammweyo kha na mbi aka koneyo, hambi ni mwanana wa m'thu kha na mbi zumba.

⁴¹ Wonani vathu va va tako ngu Wuphemba, i ku ditiko da hombe, ni vathangeli va mitamo va na huma ngu ka makhalo a magwito ka mafu.

⁴² Va na teka wulaho ni mkuni; vona mba txixinya, kha va pfeli wusiwana, dipswi dawe di na dhinda nga linene, va na gadha mahantxhi ku nga wamwamna wu a zivako ti taku aya kulwani, kuya kuwukela, awe mwanana wa Bhabhilona.

⁴³ Mfumeli wa Bhabhilona a pfite nduma yawe, se ma so hololo manza akwe, e ñolwa ngu xomulo, kupanda, nga ka wamsikati a hefemulako.

⁴⁴ Wonani ti taku mmweyo wa ku nga ngonyamo a na humelela likasani ka Jordhani, e wukela dizumbo da mtamo, aniko ngu mbimo yokari ni na mtutumisa hale; se awule ni nga msawula a na mwukela: Nguko i mani wo fana ni nani kani? Se i mani wo a nga ni randela kani? I mani m'dyisi wo a nga tsana masoni kwangu kani?

⁴⁵ Sekoko, pfanani txileleto txa Mkoma txo sola Bhabhilona, ni kuwomba kwakwe madingano ni Vakaldheya: Ngu ditshuri ava vavadotho ngutu va mtxhambi, va na va ndinda-ndinda; ngu ditshuri di na fuviswa dizumbo dawe.

⁴⁶ Ka diguwa da kutekwa ka Bhabhilona, ma dhudhumete mafu; se huwa yi pfate matikoni.