Jeremiya 49 - Bhiblia Yo Sawuleka

Kukonwa ka va ka Amoni

¹ Txisolo ka vanana va Amoni, Mkoma a womba tiya: Ina Israyeli kha nga ni vanana, kha nga ni sidya-thomba kani? Ngu kutxani koko Malkami a lumbwako ngu Gadhi ni vathu vakwe e zumba madhoropani ka kona kani?

² Ngu toneto, mata masiku, kuwomba Mkoma, aha ni no pfalisa diguwa da yimbi ya Rama yo wukela vanana va Amoni, a na maha mmumbu wa marumbi ni makhalo ya a ma fumelako ma na hiswa ngu mndilo; Israyeli a na lumbwa ngu vale a nga txi va lumba, kuwomba Mkoma.

³ Peka huwa awe Hesibhoni, nguko wa hasamulwa Ayi; huwelelani anu vanana va Rabha, tipambiyeteni ngu masaka, dilani, horolokelani maguma; nguko Malkami a naya wukhumbini, kumweko ni vaphaxeli vakwe ni tinduna takwe.

⁴ Ngu kutxani u txi ti dhumisa mikovani, ka mikova yako yo tshura, awe mwanana wa txigevenga u thembako tithomba tako, u txi khawe:

⁵ I mani a nota ni wukela kani? Wona ti taku ni na tisa kuthava txitimwi kwako, kuwomba Mkoma wa Mabutho a Tiyimbi, ka votshe va va nga kurandela; mi na tshotshwa hahanze, mmweyo ni mmweyo a na lava kuthangela, kha ku nga ni wu a no tsanisa vamwani.

⁶ Aniko msana ka tiya, ni na tshumeta tikhumbi ta vanana va Amoni, kuwomba Mkoma.

Kukonwa ka Edhomi

⁷ Txisolo xungetano ni Edhomi. Mkoma wa Mabutho a Tiyimbi a womba tiya: Ku ngava ku si ngadi ni wutxhari Temani kani? Ina si lovile silayelo sa titxhari kani? Wu bhirete wutxhari wawe kani?

⁸ Pfhukani, wuyani, zumbani kusisalani, anu mi zumbako Dhedhani, nguko ni wuyisile kwakwe dirumbi da Esawu, mbimo yile ni nga mu endela.

⁹ Va txo dhuka va txi ta kwako vahaphi va mauvha, kha va na kusiyeta okari kani? Ina makhamba kha ma na ku ta kuxasela ni wusiku ngu ku phindeletisa kani?

¹⁰ Aniko mbimo yile ni nga tutumisa Esawu, ni ti ko tumbula sihunja sakwe, kha na mbi sikota kusisala, ku na hasamulwa vanana vakwe, kumweko ni vanawe, ni vaakelani, se asi swi i di ene.

¹¹ Leka sikulungu sako, ani ni na si xayisa si txi hanya; ni tinoni tako ti na themba kwangu.

¹² Nguko Mkoma a khene: Wonani ti taku avale va nga sa emiselwa kusela dijingo, va di sela ngu ditshuri, se ina awe u nga huluka ngu ditshuri kani? Khu na mbi huluka, ngu ditshuri u na di sela.

¹³ Nguko ni xambanyile ngu ngani nipune, kuwomba Mkoma, taku Bhozira i nava ditiko da txixamaliso, da tingana, da xomulo, di hasamulwako; ni otshe madhoropa akwe ma fuva da magwito.

¹⁴ Ni pfite diguwa di txi ta ngu ka Mkoma, di txi kha dona ku ni mtumi wu rumwako ka matiko, kuya kha wona: Sengeletanani, mwukeleni, khukhani mi txi tsula yimbini.

¹⁵ Nguko wona ti to ni kumahile wam'dotho hagari ka matiko, wa kutxhipiswa hagari ka vathu.

¹⁶ Kasi ngu mhaka ya mathiselo ako, kutikukumukisa ka mbilu yako ku kuxengile. Awe u zumbako mibhalani ka marigwi, u manekako txitimwi ka mimango, hambi u txo guleta txisaka txako nga digama, ni na kukhundumusa koneyo, kuwomba Mkoma.

¹⁷ Ngu toneto, Edhomi a na va txixamaliso; ni wihi a no pinda ngu kona a na xamala, a na veta mloti ngu mhaka ya sikarato sa kona.

¹⁸ Ku na nga kukhundumuswa ka Sodhoma ni Gomora, ni ka vaakelani vakwe, kuwomba Mkoma: Kha ku na mbi zumba m'thu eho, hambi ku mwanana wa m'thu e aka kona.

¹⁹ A na woneka sixaxani Jordhani nga ngonyamo, a txi lwisa wukhalo wa mtamo; nguko, ngu mbimwanyana, ni na mtutumisa hale; niku i mani ni no msawula ni txi m'veka txitimwi kwakwe kani? Nguko i mani a fananako ni nani! I mani a no ni vekela mbimo kani? I mani m'dyisi wu a no ni tsiveta kani?

²⁰ Ngu toneto, pfanani sileleto sa Mkoma, asi ene a nga si emisela Edhomi; ni kuxuva kwakwe ngu vaaki va Temani: Ngu ditshuri ava vavadotho hagari ka tinvuta va na ndindwandindwa. Ngu ditshuri ku na fuviswa tinyumba tawe.

²¹ Mafu ma zinginikile ngu diguwa da kuwa kwakwe; ni huwa yakwe, yi pfate hambi ka Linene lo Bhilivila.

²² Hi nga wonani ti to wata, a txi puruma ku nga digama, a na nawuluta tibhapi takwe txitimwi ka Bhozira; ni mbilu ya tindena ta Edhomi, ka dona ditshiku dile, yi na nga mbilu ya wamsikati wu a lumwako!

Kukonwa ka Dhamasku

²³ Xungetano ngu Dhamasku, a vile ni tingana Hamati ni Aripadhe, ni mbimo yile va nga pfa mahungu a maphya o biha, va to tsivala; lineneni ku ni kuxaniseka, kuwalo kuthutha.

²⁴ Dhamasku a hetile mtamo; a tshurate, a lava kututuma, a ñotwe ngu kuthava: Xomulo ni kupandiseka si va ñote, kufana ni ka wolava kuhefemula.

²⁵ Di nga va di sa siwa didhoropa diya da nduma, i ku didhoropa da kunitsakisa kani?

²⁶ Ngu konaho majaha akwe ma na wa tinzilani ka ona; ni votshe vavamna va yimbi va na loviswa, ka dona ditshiku dile, kuwomba Mkoma wa Mabutho a Tiyimbi.

²⁷ Ni na dhivela mndilo digumani ka Dhamasku, awu wu no hisa tinyumba ta hombe ta Bhenadhadhi.

Kukonwa ka Kedhari ni ka Hazori

²⁸ Xungetano ngu Kedhari, ni mifumo ya Hazori, avale va nga pekwa ngu Nebhukodhonosori, mfumeli wa Bhabhilona. A khene kha Mkoma: Khukhani, kwelani mi txi ya khundumusa Kedhari, ni kuhangalasa vanana va Wutxani.

²⁹ Va na hamdwa, matenda awe, sifuyo sawe, mijiyo yawe, ni siya sawe, va na honyolwa makameli awe; va na va mahela diguwa: Kuho kuthava ngu ka otshe madhawa!

³⁰ Tutumani, pengani mi tsula kule ngutu, zumbani kusisalani, anu vaaki va Hazori, kuwomba Mkoma; nguko Nebhukodhonosori, mfumeli wa Bhabhilona, a mahile txikungo txa ku mi wukela, a wombile mapswi a ku mi lwisa.

³¹ Khukhani, kwelani mi txi wukela ditiko do thutha, di zumbako ngu kuthemba, kuwomba Mkoma; amu ku kuwalo matimba, hambi sikhweketo, vona va zumba vokha.

³² Makameli awe ma na honyolwa, ni sifuyo sawe sasingi si na handwa: Ni na va hangalasa ka otshe madhawa ava va nga wila misisi yawe ya mabambe, se ngu ka otshe madhawa ni na va mahela marumbi, kuwomba Mkoma.

³³ Se Hazori a na va dizumbo da madragoni, ngu kufuviswa ka yotshe mbimo; kha nga ho a no zumba hale, kambe kha ku na mbi maneka mwanana wa m'thu.

Kulamulwa ka Elame

³⁴ Dipswi da Mkoma di nga ta ka Jeremiya mprofeti, da kusola Elame, kukhatani ka kufuma ka Zedhekiya, mfumeli wa Judha, di txi kha dona:

³⁵ Mkoma wa Mabutho a Tiyimbi a khene: Wonani ti taku ni na funya wulaho wa Elame, i ku makhato a mtamo wakwe.

³⁶ Ni na tisa txitimwi ka Elame, mune wa mimoya ya mune wa makhona a nzuma, se ni na yi hangalasa yi londisa mimoya yiya yotshe; kambe kha di na mbi vaho ditiko di va no mbi tutumela ka dona va ka Elame.

³⁷ Ni na maha ti to Elame e thava masoni ka valala vakwe, ni ka votshe vale va xotako ku m'daya; ni na tisa wubihi txitimwi kwakwe, txiviti txa kuhenya kwangu, kuwomba Mkoma; se ni na rumela ditxhari, kala di txi va fuvisa.

³⁸ Wukoma wangu ni na wu veka kona Elame; se ni na fuvisa vafumeli ni vathangeli vawe, kuwomba Mkoma.

³⁹ Ngu toneto, ku na maheka ka dimwedo da masiku o gwitisa, ti to ni wuyisa tikhumbi ta Elame, kuwomba Mkoma.