Jeremiya 48 - Bhiblia Yo Sawuleka

Kuhasamulwa ka Mowabhi

¹ Xungetano ngu Mowabhi, a womba tiya Mkoma wa Mabutho a Tiyimbi, Txizimu txa Israyeli: Dikhombo da Nebho, nguko a hasamutwe! Kiriyatayimi a wisilwe tingana, kambe a honyotwe; Misigabhe a wisilwe tingana, kambe wa xamala.

² Wudhundo wa Mowabhi hi nga ngadi wona kambe; aniya Hesbhoni va mmahete txikungo, va txi kha vona: “Ngonani hi ta va fuvisa kasi va si nga ngadi vathu kambe; na nawe Madhimeni, u na hasamulwa; u na londiselwa ngu ditxhari.”

³ Ka pfala tihuwa kona Haronayime: Ta dirumbi ni kuhasamulwa ka hombe!

⁴ Mowabhi a hasamutwe; vanana vakwe va pfate kudila.

⁵ Nguko aha va no kwela Luhite va na engetekelana kudila; nguko kutxhika kwawe ngu Horonayime, valala va Mowabhi va pfite kudila ka hombe.

⁶ “Tutumani mi txi hulukisa wutomi wanu, nga timbongola ta txitinga!”

⁷ Nguko, ngu mhaka ya ku u thembako mithumo yako ni tithomba tako, na nawe u na xulwa; Kemoxe a na yiswa wukhumbini, kumweko ni vaphaxeli ni vathangeli.

⁸ Nguko a nata mxaseli txitimwi ka didhoropa dimwedo ni dimwedo, kha ku na mbi huluka ni da dimwedo, mkova wu na lova, ku na onhetelwa lotshe libala; nguko Mkoma a wombile.

⁹ Mningeni tibhapi Mowabhi; nguko a txi puruma a na huma, ni madhoropa akwe ma nave marumbi, kha na mbi zumba m'thu.

¹⁰ A ruketetwe wule a mahako mthumo wa Mkoma ngu wukanganyisi! A ruketetwe nene wule asi lekiko kutheketa mnoha ngu ditxhari.

Kukhundumuswa ka madhoropa a Mowabhi

¹¹ Mowabhi a ti ti zumba kuthuthani kukhukhela ha wuphyani kwakwe, a zumbile tithombani kwakwe; kha nga thaviswa ka txiya a txi vekwa ka tximwani, kambe kha tsuliswa wukhumbini; ngu mhaka yeto a xayisile wunene wakwe, ni kubhumula kwakwe kha nga txitxa.

¹² Ngu konaho, mata masiku, kuwomba Mkoma, aya ni no rumela ngu ka ona vatheketeli, ava va no maha ti to vathu ve tsimbila ngu mazambo a hombe; va nata tshakunutela siya sawe ni ku bhandelela misava yawe.

¹³ Mowabhi a nave ni tingana ngu Kemosi, nga kule nyumba ya ka Israyeli yi nga pfa tingana ngu Bheteli, txithembo txakwe.

¹⁴ Mi nga wombisa kutxani mi txi khanu: Hi tindena hi ni mtamo wa kulwa kani?

¹⁵ Mowabhi a hasamutwe kumweko ni madhoropa akwe, majaha akwe ma tsulisilwe kudawani, a womba eto Mkoma, awu ditina dakwe i ku Mkoma wa Mabutho a Tiyimbi.

¹⁶ Ku hafuhi ni kuta kumwalalelwa ka Mowabhi; ka kuluveta kubiha kwakwe.

¹⁷ Xanisekani kumweko nayo, anu motshe mi ku madhawani kwakwe, ni nanu motshe mi zivako ditina dakwe.

¹⁸ Txhika ngu mfumoni kwako, u txi khalahatsha mu ka kuoma, awe muaki, mwana Dhibhoni; nguko muhasamuli wa Mowabhi a ku hokete, a tshungunulete maguma ako.

¹⁹ Ema hanzila u txi xiya, awe u zumbako Aroweri: Wotisa ka wule a tutumako; ni ka wule a nga huluka u txi khawe: Ku to maheka txani kani?

²⁰ Mowabhi a wisilwe tingana nguko a funyilwe; dilani mi txi peka huwa; zivisani Arnoni ti to Mowabhi a hasamutwe.

²¹ Ni kona kulamulwa kutile txitimwi ka ditiko da libala: Ka Holomi, Jaza, ni ka Mefaate;

²² ni txitimwi ka Dhibhoni, ni ka Nebho ni ka Bheti-Diblatayime,

²³ ni txitimwi ka Kiriyatayimi, Bheti-Gamuli, ni ka Bheti-Meyoni,

²⁴ ni txitimwi ka Keriyote, Bhozira, kala ka otshe madhoropa a ditiko da Mowabhi, a kule ni a hafuhi.

²⁵ Mtamo wa Mowabhi wu wilekile, ni kufunywa diwoko dakwe, kuwomba Mkoma.

Ditiko da Mowabhi di mahile txisekiso

²⁶ Mleviseni nguko a ti kulisile masoni ka Mkoma; Mowabhi a na tshumelela ka makosa akwe, se ene a na xaniswa.

²⁷ Ina Israyeli kha xaniswa ngu ngawe kani? Ina a to manwa kupani kani? Ti mahisa kutxani aha u wombawombako ngene u txi seka kani?

²⁸ Lekani madhoropa, tsulani mi txi ya zumba marigwini, anu mi zumbako Mowabhi; mahisani ku nga tile txituvani txi akisako tona txisaka txa txona, ha txikeni ka diphala.

²⁹ Hi pfite kuwomba ngu mabava a Mowabhi, wa livengo ngutu, wo ti guleta ni kutikulisa, e ti veka txitimwi, ni ku ti gwilikisa ngu mbilu.

³⁰ Ani na kuziva kuhenya kwakwe, kuwomba Mkoma, hambiko eto hi nga ta txilo: Makuhu akwe kha ma na mbi maha txilo.

³¹ Ngu kota yeto, ni na xanisekela Mowabhi; ina ni na diliswa ngu Mowabhi, nguko vavamna va Kiri-Heresi va na vilela.

³² Ni na ku dilelisa ku nga ti ta Jazeri, awe mndonga wa Sibhima; madhavi ako ma pindile linene, ma hokile ka Linene la Jazeri; aniko muhasamuli a wite txitimwi ka mihando ya mbimo ya malanga, ni thembweni kwako.

³³ Kutsaka ni kunengela si thavisilwe thembweni ko nona ni ditikoni ka Mowabhi; nguko ni mahile ti to yi guma vhinya mapipani: Kha va na mbi rukuta mauvha ngu kutsaka: Kutsaka ku na maha tihuwa.

³⁴ Ku pfate huwa ya Hesibhoni kala Eleyale ni Jahazi, ni kukhukhela Zowari kala Horonayime, di pfate dipswi dakwe, nga dirole da malembe mararu; nguko hambi mati a Nimrime, ma nava ma ti phwite.

³⁵ Ni na fuvisa vale va phaxelako ni kuhisa dibaselo ka sizimu sawe txitimwi ka Mowabhi.

³⁶ Ngu toneto, yi na pfalisa ku nga tshodi mbilu yangu ngu vavamna va Kiri-Heresi; na va di luzile mpfuno wu va nga sengeleta.

³⁷ Nguko wotshe msungo wu na va ligwayi, otshe maletu ma di hungutwe; kotshe manzani ku na sehelelwa, ni masaka siwununi kwawe.

³⁸ Txitimwi ka totshe tinyumba ta Mowabhi ni mu ka tinzila takwe ta hombe ku na vaho tihuwa ta hombe; nguko ni fayile Mowabhi nga fuko ya kwa mbi tsakisa, kuwomba Mkoma.

³⁹ Eto a nga fayeteliswa tona! Eto a pekisako tona tihuwa! Mowabhi a tshurarile, kambe a tinganani! Se Mowabhi a na sekwa ni ku xamalwa ngu votshe vale va ku madhawani kwakwe.

Mowabhi kha na mbi sikota kuhuluka

⁴⁰ Nguko Mkoma a khene: Wonani, mlala a na puruma ku nga digama, a txi gwimba tibhapi takwe txitimwi ka Mowabhi.

⁴¹ Ma tekwa madhoropa, ni kurandelwa mikhokhola: Yi na va mbilu ya tindena ta Mowabhi, ka dona ditshikwedo, ku nga mbilu ya wamsikati wu a diliswako ngu kupanda.

⁴² Mowabhi a na hasamula, va si ngadi vathu; ngu mhaka yo tikulisa masoni ka Mkoma.

⁴³ Msanekera, diphala ni kuthava sata txitimwi kwako, awe u zumbako Mowabhi, kuwomba Mkoma.

⁴⁴ Awule a no tutuma ngu msanekera a na wela diphalani, awu a no huma diphalani a na txikwa ngu mkuni; nguko ni na tisa txitimwi kwakwe, txitimwi ka Mowabhi ni vekile dilembe da kuhasamulwa kwakwe, kuwomba Mkoma.

⁴⁵ Avale va nga txi tutuma va to ya sisala ka mtsudi wa Hesibhoni; aniko ku so vhutuka mndilo ngu Hesibhoni, ni m'dhikila ngu hagari ka Seyoni, wu txi hisa dikhona da Mowabhi, ni mtamo wa sikarato.

⁴⁶ Dikhombo kwako Mowabhi; va lovile vathu va Kemoxe; nguko vanana vako va mahilwe tikhumbi, ni mahorana ako ma wukhumbini.

⁴⁷ Aniko ni na wuyisa tikhumbi ta Mowabhi ka masiku o gwitisa, kuwomba Mkoma. Kala ahawa ngu kona kulamulwa ka Mowabhi.