Jeremiya 43 - Bhiblia Yo Sawuleka

Jeremiya a txi yiswa Egipta

¹ Mbimo yi Jeremiya a nga gwita kuwombawomba ka vathu votshe mapswi a Mkoma, Txizimu txawe, i ku mapswi otshe ya a nga rumwa ngu Mkoma, Txizimu txawe,

² sekoko a to womba-womba Azariya mwana Hoxaya, ni Johanani mwana Kareya, ni votshe vavamna va mabava va txi kha vona ka Jeremiya: “Awe u womba makuhu! Mkoma, Txizimu txathu, kha kurumela ku ta womba ku: Mi nga tsuleni mi txi ya luvela Egipta.

³ Bharuke, mwana Neriya, ngene a ku kujetelako ku hi wukela, ni ku hi ningela manzani ka Vakaldheya, kasi va txi hi daya, mwendo ku hi yisa Bhabhilona.”

⁴ Johanani koko, mwana Kareya, ni tinduna totshe ta yimbi, hambi ni votshe vathu, kha va engisa dipswi da Mkoma, kasi kuzumba ditikoni ka Judha.

⁵ Se Johanani, mwana Kareya, ni tinduna totshe ta yimbi, va to teka misalela ya ka Judha, avale va nga ti wuyile ngu ka matiko ya va nga ti hangalisetwe kuya luvela ka ona a ka Judha.

⁶ I ku vavamna, ni vavasikati, sizambiana ni vanana va mfumeli vamahorana, ni sotshe so hanya asile si nga siwa ngu Nebhuzaradhani, mthangeli wa yimbi, ni Gedhaliya, mwana Ahikamu, mwana Xafani, kumweko ni Jeremiya, mprofeti, ni Bharuke mwana Neriya.

⁷ Se va to wulela ditikoni ka Egipta, nguko kha va engisa dipswi da Mkoma ka Jeremiya, va to hoka Tafinesi.

⁸ Sekoko di to ta dipswi da Mkoma ka Jeremiya, kona Tafinesi, di txi ta kha dona:

⁹ Teka marigwi a hombe manzani kwako, ma kopolele ngu ndope, hahatshi ka txike txa nyumba ya Faro, kona Tafinesi va txi kuwona Vajudha.

¹⁰ U txi khawe kwawe: Mkoma wa Mabutho a Tiyimbi, Txizimu txa Israyeli, a khene: Ni na rumela ka Nebhukodhonosori, mfumeli wa Bhabhilona, txithumi txangu, ni na veka mfumo wakwe txitmwi ka marigwi awa, ni nga ma khweketela, ene a na gwimba ditenda da mfumo wakwe txitimwi ka ona.

¹¹ A nata peka ditiko da Egipta; awu a dinganwako ngu kudawa a na dawa, awu a dinganwako ngu wukhumbi a na va khumbi, awu a dinganwako ngu ditxhari a na dawa ngu ditxhari.

¹² A na dhivela mndilo tinyumbani ka sizimu sa Vaegipta ti txihya, a na yisa wukhumbini sifananiso sa sizimu sawe, a na basisa ditiko da Egipta nga ti m'dyisi a thaviselisako tona sigalani ka syambalo sakwe, a txi huma ngu kuthutha.

¹³ A na khundumusela tiphande ta Bheti-Xemexe ka ditiko da Egipta, a txi hisa tinyumba ta sizimu sa Vaegipta.