Jeremiya 41 - Bhiblia Yo Sawuleka

¹ Ku to maheka ti to ngu mtxima wa wutxhanu ni yimbidi, a txi ta Ismayeli mwana Netaniya, mwana Elixama, wa mnoha wa vafumeli, ni vathangeli va tinyimbi ta mfumeli, i ku digumi da vavamna kupata ni ene, ni Gedhaliya mwana Ahikamu, kona Misipa; se va to dya votshe dipawu kona Misipa.

² Se a to khukha Ismayeli mwana Netaniya, kumweko ni vavamna vale va digumi va nga ti ti nayo, va to ya dayisa Gedhaliya, mwana Ahikamu, mwana Xafani, ngu ditxhari; va txi m'dayiseto, awule a nga ti vekilwe txitimwi ka ditiko ngu mfumeli wa Bhabhilona.

³ Ismayeli a to dayisa votshe Vajudha vale va nga ti ti ni ene, ni Gedhaliya, kona Misipa, ni Vakaldheya kambe, vanyatiyimbi va nga ti maneka koneyo.

⁴ Ngu mangwanani ka kona, ku to maheka tito, msana ka kuva a ti date Gedhaliya, ti si zivwi ngu m'thu,

⁵ kutota vavamna va Sikemi, Silo, ni Samariya; mtxhanu wa magumi ni mararu a vavamna, na va ti yote siletu sawe, syambalo sawe si ti bhandeletwe ni kuwilelwa; manzani kwawe va ti ni siningo sa sakudya ni sa mphaxo, kasi kuya ningela Nyumbani ka Mkoma.

⁶ Ismayeli mwana Netaniya, a to va hingeta a txi dila, kukhukhela Misipa; mbimo yi a nga manana navo, a to khene: “Ngonani ka Gedhaliya, mwana Ahikamu!”

⁷ Ku ti ngako va txiya hagari ka didhoropa, a so va daya Ismayeli, mwana Netaniya e va vinza txisimani, ene kumweko ni vavamna vale a nga ti kumweko navo.

⁸ Aniko hagari kwawe ku to maneka digumi da vavamna va nga kha vona: Mi nga hi dayeni, hi ni tithomba hi nga sisa hahanze, fulaho ni sevhadha, mafura ni wulombe. Ngu kota ya toneto, a to va leka, kha va daya nga ti a nga maha ka maxaka awe.

⁹ Txisima txile a nga vinza ka txona avale a nga va daya, ngu mhaka ya Gedhaliya, ngu txoneto a nga maha mfumeli Asa, ngu mhaka ya Bhahasa, mfumeli wa Israyeli: Ismayeli mwana Netaniya, a to tata txona txisimetxo ngu vofa.

¹⁰ Se Ismayeli a to tsulisa wukhumbini votshe vathu vale va nga ti sate Misipa; i ku vanana va txisikati va mfumeli, ni votshe vathu vale va nga ti sate Misipa, evo Nebhuzaradhani, mthangeli wa vawoneleli, a nga ti va site ni Gedhaliya, mwana Ahikamu, Ismayeli, mwana Netaniya, a to va tsulisa wukhumbini; a to tsula navo ka vanana va Amoni.

¹¹ Mbimo yi a nga tiengisa Johanani, mwana Kareya, ni votshe vathangeli va mabutho a tiyimbi va nga ti ti nayo, wubihi wotshe wu a nga ti wu mahile Ismayeli, mwana Netaniya,

¹² A to teka votshe vavamna va txi yalwa ni Ismayeli, mwana Netaniya: Va to mmana hafuhi ni mati amangi ma kuho Gibheyoni.

¹³ Kumaheka tito, va txi m'wona votshe vathu va nga ti ti ni Ismayeli, va to tsakela Johanani mwana Kareya, ni votshe vathangeli va yimbi.

¹⁴ Votshe vathu vale Ismayeli a nga ti va mahile tikhumbi Misipa, va to mu tshuralela ve tsula ka Johanani, mwana Kareya.

¹⁵ Aniko Ismayeli mwana Netaniya, a so pshwitimuka kumweko ni mtxhanu wa vavamna ni vararu, ngu manzani ka Johanani, ve tsula ka vanana va Amoni.

¹⁶ Sekoko Johanani, mwana Kareya, a to teka votshe vathangeli va mabutho a nga ti nawo, ni votshe vathu vale a nga ti va honyote ka Ismayeli, mwana Netaniya, kukhukhela Misipa, msana ka kudawa ka Gedhaliya, mwana Ahikamu, tindena ta tiyimbi, vavasikati, vafana, mithenwa, a nga ti va honyote ka Gibheyoni

¹⁷ Va to khukha va txi ya zumba Geruthi-Ximami, hafuhi ni Bhetlehema, kuva ve wulela ngu kona Egipta,

¹⁸ ngu mhaka ya Vakaldheya, nguko va ti ti va thava, ngu ku va nga ti ni Ismayeli, mwana Netaniya, awu a nga ti date Gedhaliya, mwana Ahikamu, awule a nga ti vekilwe ditikoni ngu mfumeli wa Bhabhilona.