Jeremiya 40 - Bhiblia Yo Sawuleka

Jeremiya ni Gedhaliya

¹ Dipswi di di nga ta ka Jeremiya ngu ka Mkoma msana ka kuva Nabhuzaradhani, mthangeli wa vawoneleli, a ti mu txhatxhisile Rama, eho a nga mmana kona a ti sungilwe ngu titxhini, na a ti hagari ka va va nga ñolwa votshe va niya Jerusalema ni Judha, ava va nga yiswa wukhumbini ka Bhabhilona.

² Nduna ya vawoneleli yi to dhana Jeremiya, yi txi kwakwe: “Mkoma, Txizimu txako, a wombile ngu diya dikhombo txitimwi ka wuwa wukhalo;

³ Mkoma a di nehile, e maha ti a nga womba, nguko mi ti ti onhete Mkoma, mi si engisi dipswi dakwe, miza mi humelwa ngu totshe tiya.

⁴ Wona, ni ku txhatxhile titxhini ti ti nga ti mawokoni kwako. Ngako u txi lava kutsula ni nani Bhabhilona, ngono, ni na kuxayisa. Aniko u si ti lavi kutsula ni nani Bhabhilona, u nga sala. Hi nga wona, dotshe ditiko di masoni kwako; ni hayi ku ku tsakisako, aha u lavako kuya kona, tsula kheyo.”

⁵ Ngako a nga sanzi kutshumela, a to khene kwakwe: “Tshumelela ka Gedhaliya, mwana Ahikamu, mwana Xafani, eyo a nga mahwa mfumeli txitimwi ka didhoropa da ka Judha ngu mfumeli wa Bhabhilona, u zumba nayo hagari ka vathu; hambi ku ti yela ka ni dihi didhawa u di lavako.” Sekoko mthangeli wa vawoneleli yi to mninga timbuva ni siningo yi mu leka e tsula.

⁶ Jeremiya a to ta ka Gedhaliya, mwana Ahikamu, aniya Misipa, e zumba nayo hagari ka vathu avale va nga sala mu ditikoni.

Mfumo wa Gedhaliya

⁷ Tinduna ta yimbi ati ti ku mkovani kumweko ni vathu va tona, ti di pfite ti to mfumeli wa Bhabhilona a vekile Gedhaliya, mwana Ahikamu, ku va mfumeli mu ditikoni ni ti to a vekile manzani kwakwe vavamna ni vavasikati, ni vanana ni sisiwana amu ditikoni, ava va nga mba yiswa kuñolwani Bhabhilona,

⁸ Sekoko va to ya ka Gedhaliya aniya Misipa. I ti ti Ismayeli, mwana Netaniya, ni Johanani ni Jonatani, vanana va Kareya, ni Seraya, mwana Tahumete, ni vanana va Efaya munetofa, ni Jezaniya, mwana Mahakate, kumweko ni vathu vawe.

⁹ Gedhaliya, mwana Ahikamu, wa Xafani, a to xambanya ka vona ni ka vathu vawe, a txi khene: “Mi nga thaveni kuthumela Vakaldheya! Zumbani mu ditikoni, mi thumela mfumeli wa Bhabhilona, mi na zumbiseka kha kwati.

¹⁰ Ani, bo, ni ya aka Misipa, kuva ni txi na ema masoni ka Vakaldheya ava va nota kwathu. Aniko anu sengeletelani vhinya ni mihando ya mbimo ya lisani ni mafura, mi veka mu ka siya sanu, mi aka ka didhoropa di mi ngadi honyola.”

¹¹ Ngu nzila yo nga yoneyo, mbimo yi votshe Vajudha vale va nga ti Mowabhi, hagari ka vanana va Amoni, ni Edhomi, ni votshe vale va nga ti ti ka otshe matiko ale, va nga pfa to kha vona mfumeli wa Bhabhilona a ti ti lekile vamwani kona Judha, niku a ti ti va vekete Gedhaliya, mwana Ahikamu, mwana Xafani.

¹² Votshe Vajudha, va to tshumelela ka makhalo ale va nga ti thavisilwe ka ona ve ta maneka Judha, ka Gedhaliya kona Misipa, va to sengeletela vhinya ni mihando yayingi ngutu ya malanga.

Kudawa ka Gedhaliya

¹³ Johanani, mwana Kareya, ni votshe vathangeli va mabutho, va nga ti ti ditikoni, va tile ka Gedhaliya kona Misipa.

¹⁴ Se va to kha vona: “Ina wa tiziva kha kwati taku Bhahalisi, mfumeli wa vanana va Amoni, a rumile Ismayeli, mwana Netaniya, kasi ku ta ku daya kani?” Aniko Gedhaliya, mwana Ahikamu, kha va tumela.

¹⁵ Hambi keto, Johanani, mwana Kareya, a to lengela Gedhaliya va ti Misipa, a txi khene: “Ni na tsula kona kuwa ni txi ya daya Ismayeli, mwana Netaniya, na ti si zivwi ngu m'thu: Ngu kutxani a lavako ku kudaya, vathu va ditiko da Judha va ku ni nawe va na hangalaka, vamwani ve sala ve lova?”

¹⁶ Aniko Gedhaliya, mwana Ahikamu, a ti khene ka Johanani, mwana Kareya: U nga mahe eto, nguko wa mu hembela Ismayeli.