Jeremiya 36 - Bhiblia Yo Sawuleka

Bharuke e gonda dibhuku Dithepeleni

¹ Ngu dilembe da wumune da Jehoyakimi, mfumeli wa ka Judha, dipswi da Mkoma di to ta ka Jeremiya, di txi kha dona:

² Ti tekele dibhuku u txi bhala totshe timhaka ti ni nga kugela ngu Israyeli ni Judha, ni xungetano ni otshe matiko, kukhukhela ka ditshikwedo ni nga womba-womba ni nawe ka masiku a Josiya kala ni kuwa.

³ Mwendo va ka Judha va na engisa kubiha kotshe ku ni xuvako ku va mahela; ati taku mmweyo ni mmweyo a txi hunduluka nzilani kwakwe ko biha, ni txi tsetselela wubihi wakwe ni txionho txakwe.

⁴ Sekoko Jeremiya a to dhana Bharuke, mwana Neriya, se Bharuke a to bhala dibhukuni tile a nga ti geletelwa ngu Jeremiya, mapswi otshe a Mkoma ale a nga ti ti ma wombile.

⁵ Se Jeremiya a to leletela Bharuke, a txi khene: Ani ni khotetwe, kha ni sikoti kuwulela Nyumbani ka Mkoma.

⁶ Ngu konaho wulela awe Nyumbani ka Mkoma ngu ditshiku da kuyila, u txi ya gonda dibhuku di u nga bhala mapswi ale ni nga kugeletela, i ku mapswi a Mkoma, u txi ma gonda tinzeveni ka vathu ni ka votshe Vajudha vale va nga ta ngu madhoropani kwawe.

⁷ Mwendo va na khongela masoni ka Mkoma, se ve hunduluka mmwani ni mmwani ka nzila yakwe yo biha, nguko kuhenya ni txiviti txa Mkoma nza hombe, asi a wukelako ngu sona vathu vava.

⁸ Bharuke mwana Neriya, a to maha totshe ti a nga gelwa ngu mprofeti Jeremiya, a txi gonda timhaka ta Mkoma mu ka dibhuku diya Nyumbani ka Mkoma.

⁹ Ngu dilembe da wutxhanu da Jehoyakimu mwana Josiya, mfumeli wa ka Judha, ngu mtxima wa wutxhanu ni mune, ku to pekwa nyiwo ya ditshiku da kuyila masoni ka Mkoma, ka votshe vathu va Jerusalema, ni votshe vathu va humako ngu madhoropani ka Judha va txita Jerusalema.

¹⁰ Bharuke koko a to gonda amu ka dibhuku timhaka ta Jeremiya Nyumbani ka Mkoma, amu wukhaloni ka Gemariya, mwana Xafani, m'bhali, habanza ka txitimwi ka txike txa txiphya txa Nyumba ya Mkoma, a txi di gonda tinzeveni ka vathu votshe.

Kugondwa ka dibhuku masoni ka vathangeli

¹¹ Ahawa Mikaya, mwana Gemariya, mwana Xafani, a nga pfa totshe timhaka ta Mkoma ti txi gondwa mu ka dibhuku,

¹² a to kwitima eya nyumbani ka mfumeli, amu ka wukhalo wa m'bhali. Se wona taku votshe vathangeli va di khalahatshile kona hale: I ku Elixama m'bhali, ni Dhelaya, mwana Xemaya, ni Elinatani, mwana Akibhori, ni Gemariya, mwana Xafani, ni Zedhekiya, mwana Hananiya, ni votshe vamwani vathangeli.

¹³ Sekoko Mikaya a to va gela totshe timhaka ti a nga tipfa, ahawa Bharuke a txi gonda tinzeveni ka vathu.

¹⁴ Sekoko votshe vathangeli va to ruma Jehudhi, mwana Netaniya, mwana Xelemiya, mwana Kuxe, ka Bharuke, va txi kha vona: Teka dibhuku di u ngadi gonda tinzeveni ka vathu, u txi ta nado: Bharuke, mwana Neriya, a to teka dibhuku a txi ta kwawe.

¹⁵ Va ti kha vona kwakwe: Khalahatsha, u txi di gonda tinzeveni kwathu. Se Bharuke a to di gonda tinzeveni kwawe.

¹⁶ Sekoko aha va nga pfa totshe timhaka tiya, va to dhuka, ve wonana, va txi kha vona ka Bharuke: Ngu ditshuri hi na gela mfumeli totshe timhaka tiya.

¹⁷ Se va to wotisa Bharuke, va txi kha vona: Hi gele koko, u bhalisile kutxani timhaka totshe tiya ngu kuwomba kwakwe kani?

¹⁸ Bharuke a to va xamula, a txi khene: A ni gete otshe mapswi awa ngu txisofu txakwe, ni txi ma bhala dibhukuni ngu “penda.”

¹⁹ Sekoko vathangeli va ti kha vona ka Bharuke: Tsula u txi ya sisala, awe ni Jeremiya; mi nga geleni hambi m'thu aho mi nova kona.

Mfumeli a txi hisa dibhuku

²⁰ Va to teka dibhuku amu nyumbani ka Elixama, m'bhali; se va to tsula banzani ka mfumeli, veya m'gela totshe timhaka tiya.

²¹ Mfumeli a to ruma Jehudhi kuya teka dibhuku; a to ya di teka nyumbani ka Elixama m'bhali. Se Jehudhi a to di gonda tinzeveni ka mfumeli, ni tinzeveni ka votshe vathangeli vale va nga ti emile masoni ka mfumeli.

²² Mfumeli a ti ti zumbile nyumbani ka wuxika, nguko i ti mtxima wa wutxhanu ni mune; ku ti ti ni mndilo ha txikho masoni kwakwe.

²³ Ku ti ngako Jehudhi a ti gondile tindima tiraru mwendo mune, mfumeli a to wila dibhuku ngu mesa a txi di tshotsha ka mndilo ha txikho.

²⁴ Mfumeli ni sithumi sakwe ngako va ti pfite timhaka tiya, kha va thava, kambe kha va bhandelela simaha sawe,

²⁵ Elnatani ni Dhelaya ni Gemariya va to khongotela mfumeli ti to asi hisi dibhuku, aniko kha va engisa.

²⁶ Se mfumeli a to laya tito, Bharuke, m'bhali, ni mprofeti Jeremiya va txi ñolwa ngu Jerameyeli, mwanana wa mfumeli, ni Seraya, mwana Aziriyeli, ni Xelemiya mwana Abdheeli, aniko Mkoma a to va sisa.

Dimwani dibhuku

²⁷ Se di tile dipswi da Mkoma ka Jeremiya, nguko mfumeli a ti hisile dibhuku diya di ku ni timhaka tiya Bharuke a nga ti bhate to wombwa ngu Jeremiya, a txi khene:

²⁸ Ti tekele dimwani dibhuku, u txi bhala ka dona totshe timhaka ti ti nga ti ka dibhuku do khata, adi di nga hiswa ngu Jehoyakimu mfumeli wa ka Judha.

²⁹ U na gela Jehoyakimu mfumeli wa ka Judha, u txi: Mkoma a khene: Awe u hisile dibhuku diya, u txi: Ngu kutxani u nga bhala ka dona ti taku mfumeli wa Bhabhilona a nata hasamula ditiko diya, a txi heta vathu ni sihari kani?

³⁰ Ngu konaho, Mkoma a khene xungetano ni Jehoyakimu, mfumeli wa ka Judha: Kha na mbi va ni mwanana wo zumba ha txikhalo ka Dhavhidha; txirumbi txakwe txi na tshotshwa hahanze ha lisanini ka mitshikari ni ha phehoni ka wusiku.

³¹ Ni na tsayisa ene ni liveleko lakwe ni sithumi sakwe ngu mhaka ya wubihi wawe; ni na tisa txitimwi kwawe ni txitimwi ka vazumbi va Jerusalema ni txitimwi ka vathu va ka Judha, makhombo otshe awa ni nga ma womba txitimwi kwawe, aniko kha va engisa.

³² Sekoko Jeremiya a to teka dimwani dibhuku, a txi di ningela ka Bharuke, mwana Neriya, m'bhali, awu a nga bhala ka dona ati ti nga wombwa ngu Jeremiya, totshe timhaka ta dibhukwedo di nga hiswa ngu Jehoyakimu, mfumeli wa ka Judha; kambe ku engetetwe timhaka ta tingi to fana nito.