Jeremiya 29 - Bhiblia Yo Sawuleka

Dipapilo da Jeremiya ka Vajudha va Bhabhilona

¹ Se atiya ngu tona timhaka ta dipapilo da mprofeti Jeremiya ngu Jerusalema, ka madhota ale ma nga sala wukhumbini, ni ka vaphaxeli, ni ka vaprofeti, ni ka votshe vathu, va va nga ti ñotwe ngu Nebhukodhonosori kona Jerusalema, va txi yiswa Bhabhilona,

² (msana ka kuva Jokoniya, mfumeli, a di humile ngu Jerusalema kumweko ni mame wa mfumeli, ni tinduna ni vathangeli va ka Judha ni Jerusalema, ni vavati ni vapeki va nyundo).

³ Dipapilo di tsute ni Elasa, mwana Xafani, ni Gemariya, mwana Hilikiya, (ava Zedhekiya, mfumeli wa ka Judha, a nga ti va rumile kuya Bhabhilona, ka Nebhukodhonosori, mfumeli wa Bhabhilona), a txi khene:

⁴ Mkoma wa Mabutho a Tiyimbi, Txizimu txa Israyeli, a khene: Ka votshe vale va nga tekwa, ni nga va maha ve tekwa Jerusalema ve yiswa Bhabhilona:

⁵ Akani tinyumba mi txi zumba ka tona; phayani mu tithembweni, mi txi dya mihando ya kona.

⁶ Tekani vasikati, mi txi veleka sizambzana ni sihoranana; lowotani vafana vanu vasikati, ni kuningela mahorana anu ma txi tekwa ngu vavamna; va txi veleka sizambzana ni sihoranana; andani kheyo, mi nga hungulekeni.

⁷ Lavani kuthutha ka didhoropa di mi no yiswa ka dona; mi txi di khongelela ka Mkoma, nguko kuthutha ka dona, mi na va ni kuthutha.

⁸ Nguko Mkoma wa Mabutho a Tiyimbi, Txizimu txa ka Israyeli, a khene: Mi nga lundumisweni ngu vaprofeti vanu, ava va ku hagari kwanu, ni vahuteteli vanu, mi nga dhuke mi txi engisa miloro yawe.

⁹ Nguko va mi profetela makuhu ngu ditina dangu; kha na va ruma, kuwomba Mkoma.

¹⁰ Nguko, Mkoma a khene: Aha ku no pinda mtxhanu wa magumi ni mambidi a malembe Bhabhilona, ni na mi alakanya, ni txi mi mahela ta tinene, ni txi mi wuyisa ka wuwa wukhalo.

¹¹ Nguko na tiziva ti ni xuvako tona ngu nganu, kuwomba Mkoma: Maalakanyo a kuthutha, na i si nga a dikhombo, ti taku ni verela masiku matako.

¹² Mi na ni dhana mi txi khongela kwangu, se ani ni na mi engisa.

¹³ Mi na ni lava, mi na ni mana ngako mi txi ni lava ngu mbilu yanu yotshe.

¹⁴ Ni na manwa ngu nganu, kuwomba Mkoma, ni na tshumeta va va nga ñolwa, ni na mi sengeleta ngu ka otshe matiko, ni ka otshe madhawa, awa ni nga mi hangalasa ka ona, kuwomba Mkoma; ni na tshumela ni txi mi wuyisa ka wukhalo wu ni nga mi tutumisa ka wona, mi txi ya wukhumbini.

¹⁵ Nguko mi khanu: Mkoma a hi wusete vaprofeti kona Bhabhilona.

¹⁶ Mkoma a wombeto xungetano ngu mfumeli wu a ku ha txikhaloni ka mfumo wa Dhavhidha, ni xungetano ni vathu va va zumbako, i ku vananu va va nga mbi tsula ni nanu wukhumbini;

¹⁷ Mkoma wa Mabutho a Tiyimbi a khene: Ni na va rumela ditxhari, ni nzala, ni mtungu, ni na va maha va txi nga maxanvu o bava, ma si sikotiko kudyiwa ngu mhaka ya kubava ka ona.

¹⁸ Ni na va tutumisa ngu ditxhari, ni nzala, ni mtungu; ni na va maha ve thisa hagari ka yotshe mifumo ya mafu, veva txiruko, ni txidiwukiso, ni txisekiso, ni txixowokiso ka otshe matiko ni no va hangalasa ka ona;

¹⁹ nguko kha va engisa timhaka tangu, kuwomba Mkoma, aha ni nga va rumelela sithumi sangu i ku vaprofeti ngu kusimamisa. Aniko kha ma engisa, kuwomba Mkoma.

²⁰ Ngu konaho, pfanani mhaka ya Mkoma, anu motshenu mi ku wukhumbini, anu ni nga mi rumela ngu Jerusalema kuya Bhabhilona.

²¹ Mkoma wa Mabutho a Tiyimbi, Txizimu txa Israyeli, a khene xungetano ngu Ahabi, mwana Kolaya, ni Zedhekiya, mwana Maaseya, ava va mi profetelako makuhu ditinani kwangu: Wona, ni na va ningela manzani ka Nebhukodhonosori, mfumeli wa Bhabhilona; ene a na va daya masoni kwanu.

²² Di na tekwa kwanu dipswi da txiruko, ka votshe Vajudha va va manekako Bhabhilona ngu kuñolwa, daku: Mkoma a na ku mahe u txi nga Zedhekiya ni Ahabi, ava mfumeli wa Bhabhilona a nga va phomisa ha mndiloni.

²³ Nguko va mahile wuphuta muwa ka Israyeli, ngu kuotela ni vasikati va vaakelani vawe, ni kuwombawomba makuhu ngu ditina dangu, i ku ti ni nga mbi va laya. Ani na tiziva, ni fakazi ya tona eto, kuwomba Mkoma.

Dipapilo da Semaya

²⁴ Gela Semaya wa Nehelame, u txi khawe:

²⁵ Mkoma wa Mabutho a Tiyimbi, Txizimu txa Israyeli, a khene: Ngako u nga rumela ngu ditina dako ka vathu votshe va ku Jerusalema, ni ka Zefaniya, mwana Mahaseya, mphaxeli, ni ka votshe vaphaxeli, u txi khawe:

²⁶ Mkoma a ku emisile ku va mphaxeli ka wukhalo wa Jehoyadha, mphaxeli, kasi kumaneka vathangeli Nyumbani ka Mkoma, ti taku, u txi sunga ngu makhodha ni tingoti, ava va xangako, va txi ti maha vaprofeti.

²⁷ Ngu kutxani u nga mbi kawuka Jeremiya wa niya Anatote, awu a profetako hagari kwanu?

²⁸ Ngu mhaka yeto, a nga hi rumelela mhaka aniya Bhabhilona, a txi khene: Wukhumbi wu ngadi wu txi na lapha; ti akeleni tinyumba mi zumba ka tona, mi phaya tithembweni, ni kudya mihando ya kona.

²⁹ Mphaxeli Zefaniya a to gonda dipapilo tinzeveni ka Jeremiya mprofeti.

³⁰ Se mhaka yi to ta ka Jeremiya ngu ka Mkoma, yi txi kha yona:

³¹ Rumela dipswi ka votshe va ku wukhumbini, u txi khawe: Mkoma a khene xungetano ngu Semaya wa niya Nehelame: Nga kule Semaya a nga profeta kwanu ni sa mruma, a txi mi maha mi themba makuhu.

³² Ngu konaho Mkoma a khene: Ani ni na tsayisa Semaya wa Nehelama ni vanana vakwe; kha na mbi va ni m'thu wo zumba hagari ka vathu vava, kambe kha na mbi wona makatekwa ni no mahela vathu vangu, kuwomba Mkoma, nguko a wombawombile to wukela Mkoma.