Jeremiya 28 - Bhiblia Yo Sawuleka

Jeremiya ni mprofeti Hananiya

¹ Se ku to maheka ka dona dilembedo, kukhatani ka kufuma ka Zedhekiya, mfumeli wa ka Judha, ngu dilembe da wumune, ngu mtxima wa wutxhanu, Hananiya mwana Azuri, mprofeti wa m'ti wa Gibheyoni, a to ni gela masoni ka vaphaxeli ni ka vathu votshe, amu Nyumbani ka Mkoma a txi khene:

² Mkoma wa Mabutho a Tiyimbi, Txizimu txa ka Israyeli, a khene: Ni funyile dikange da mfumeli wa Bhabhilona.

³ Ma txi nave ma di pindile malembe mambidi, ni na wuyisa ka wuwa wukhalo sotshe siya sa Nyumba ya Mkoma, asi Nebhukodhonosori, mfumeli wa Bhabhilona, a nga si tekela kona, a txi si heleketa Bhabhilona.

⁴ Kambe ni na wuyisa ka wuwa wukhalo Jokoniya, mwana Jehoyakimu, mfumeli wa ka Judha, ni totshe tikhumbi ta ka Judha, ti nga yiswa Bhabhilona, kuwomba Mkoma, nguko ni na funya dikange da mfumeli wa Bhabhilona.

⁵ Sekoko mprofeti Jeremiya a to xamula ka mprofeti Hananiya masoni ka vaphaxeli ni masoni ka vathu votshe va nga ti emile mu Nyumbani ka Mkoma,

⁶ Mprofeti Jeremiya koko a txi khene: Amen! Mkoma a na ti mahe eto. Mkoma a na tatise timhaka tako, ati u nga ti profeta, ta ku wuyisa siya sa Nyumba ya Mkoma, ni votshe va ku wukhumbini ka Bhabhilona, va txi wuya hawa.

⁷ Hambiko, pfana mhaka yiya ni wombako tinzeveni kwako, ni ka tinzeve ta votshe vathu.

⁸ Vaprofeti va va nga ti tiho masoni kwangu ni masoni kwako, kukhukhela kaleko va to profetela matiko o tala ni mifumo ya hombe, ati taku ku na vaho yimbi ni makhombo ni mitungu.

⁹ Aniko ngako mprofeti a txi profeta ngu kuthutha, yi txi tatiseka mhaka ya mprofeti, mprofetiyo a na zivaneka tito, ngu ditshuri a rumilwe ngu Mkoma.

¹⁰ Sekoko, Hananiya, mprofeti, a to teka ha thamoni ka Jeremiya, a txi di funya.

¹¹ Se Hananiya a to womba masoni ka votshe vathu, a txi khene: Mkoma a khene: Ni na di funyisa tona eto, dikange da Nebhukodhonosori, mfumeli wa Bhabhilona, msana ka malembe mambidi o tala, tithamoni ka otshe matiko. Se mprofeti Jeremiya, a to ti tsimbilela nzilani kwakwe.

¹² Se mhaka ya Mkoma yi to ta ka Jeremiya, msana ka kuva mprofeti Hananiya a di funyetete dikange thamoni ka mprofeti Jeremiya, a txi khene:

¹³ Tsula u txi ya gela Hananiya, u txi khawe: Mkoma a khene: U funyetete dikange da mndonga, aniko wukhaloni ka dona u na va ni dikange da txikete.

¹⁴ Nguko Mkoma wa Mabutho a Tiyimbi, Txizimu txa Israyeli, a khene: Ni sanzekile dikange da txikete txitimwi ka tithamo ta otshe matiko awa, ti taku me thumela Nebhukodhonosori, mfumeli wa Bhabhilona, va na mthumela. Ni mningile ni sihari sa txitinga.

¹⁵ Mprofeti Jeremiya a to engeta e womba ka mprofeti Hananiya, a txi khene: Engisa-ka, Hananiya; Mkoma kha kuruma; aniko u maha ti taku vathu vava ve lumba makuhu.

¹⁶ Ngu konaho, Mkoma a khene: Ni na kuthavisa ha mafuni, u na fa ka dona dilembe diya, nguko u wommbawombile ngu kukaneta, u txi wukela Mkoma.

¹⁷ Se mprofeti Hananiya, a to fa ka dona edo dilembe, ka mtxima wa wutxhanu ni yimbidi.