Jeremiya 24 - Bhiblia Yo Sawuleka

Sirundu simbidi sa maxanvu

¹ Msana ka kuva Nebhukodhonosori, mfumeli wa Bhabhilona, a di ñolisile Jokoniya, mwana Jehoyakimu, mfumeli wa ka Judha, ni vavati ni vapeki va nyundo, va kuta ngu Jerusalema, va txi yiswa Bhabhilona, Mkoma a to ni wonisa sirundu sa maxanvu na si di vekilwe ha txikeni ka Dithepele da Mkoma.

² Txirundu tximwetxo txi di ni maxanvu o tshura ngutu, o fana ni maxanvu awa o thangelela kuvitwa; tximwani txirundu txi di ni maxanvu o biha ngutu, ti si kotekiko ku ma txi dyiwa, nguko ma ti bihile ngutu.

³ Mkoma a to khene kwangu: “U wona txani Jeremiya kani?” Ni to xamula, ni txi khani: “Na wona maxanvu. Maxanvu o tshura, amanene ngutu; o biha ma bihile ngutu, kha ma na kudyiwa, nguko ma bihile ngutu.”

⁴ Sekoko mhaka ya Mkoma yi tile kwangu, yi txi kha yona:

⁵ Mkoma, Txizimu txa Israyeli, a khene: Nga kule vathu va tsakako ngu maxanvu amanene, ngu toneto ni na tsaka ngu Vajudha va va nga sungwa, ni xayisa kwati va ni nga va humisa ka wuwa wukhalo ni va yisa ditikoni ka Vakaldheya.

⁶ Ni na va wona ngu wunene, ni na tshumela ni va wuyisa ka diya ditiko. Ni na va akisa, ni si va wisi hahatshi; ni na va phaya ni si va duli.

⁷ Ni na va ninga timbilu to ni ziva ti taku ngani Mkoma; vona va na va vathu vangu, ani ni na va Txizimu txawe, ngako va txi tshumelela kwangu ngu mbilu yawe yotshe.

⁸ Se nga tile ku mahiswako tona ka maxanvu o biha, aawa ma si sikotiko kudyiwa, ngu bihelo ya ona, nguko Mkoma a khene, “Ngu toneto, ni na ningela Zedhekiya, mfumeli wa ka Judha, ni tinduna takwe, ni misalelwa ya Jerusalema, ayi yi nga sala ka diya ditiko, ni ka va va zumbako ditikoni ka Egipta.

⁹ Ni na va ningela kasi ku veva txidhukiso, ni dikhombo ka matiko otshe a mafu, va na va txisekiso, ni divingu, ni txipoyilo, ni txiruko, kotshe amu ni no va hangalasela kona.

¹⁰ Ni na va rumela ditxhari, ni nzala, ni mtungu, veza va txi bhi ka ditiko diya, ni nga va ninga vona ni vatate vawe.”