Jeremiya 23 - Bhiblia Yo Sawuleka

Themba ya masiku matako

¹ Dikhombo ka vadyisi va va onhako, ni kuhangalasa tinvuta ta wudyiselo wangu, kuwomba Mkoma.

² Ngu konaho, Mkoma, Txizimu txa Israyeli, a khene xungetano ni vadyisi va vathu vangu: “Anu mi hangalasile tinvuta tangu, mi txi ti tutumisa, kha ma khatala ngu tona. Ni na mi tsayisa ngu mhaka ya kubiha ka simaho sanu, kuwomba Mkoma.”

³ Ani nipune ni na sengeleta misalela ya tinvuta tangu, ti huma ngu ka otshe matiko amu ni nga ti hangalasa kona, ni txi ti tshumetela wudyiseloni ka tona; ti na veleka ti txi anda.

⁴ Ni na emisa vadyisi txitimwi ka tona, ava va no ti dyisa. Kha ti na mbi ngadi ti thava, hambi kudhudhumela, kha ku na mbi pwateka ni ya yimweyo, kuwomba Mkoma.

⁵ Se mata masiku, kuwomba Mkoma, aawa ni no wusela ka ona Dhavhidha dikhukhu do lulama. A nava mfumeli wa txitshurwa, a na humelela, ene a na lamula ngu mlayo ni wululamo, ha ditikoni.

⁶ Judha a na hanyiswa ka masikuyo akwe, ni Israyeli a na zumba ngu kuthutha. Ndide ditina dakwe di a no dhanwa ngu dona: “Mkoma ngene kululama kwangu.”

⁷ Ngu konaho, mata masiku kuwomba Mkoma aawa ku no mbiswa kuwombwa kambe ku kha vona: “Mkoma a hanyako, awu a nga humisa vanana va ka Israyeli ngu ditikoni ka Egipta”;

⁸ Aniko: Mkoma a hanyako, awu a nga thangela vanana va ka Israyeli, ve huma ngu ditikoni ka Wuphemba, ni ka otshe matiko ale a nga ti va tovelete ka ona; va nata aka ditikoni kwawe.

Dipswi do wukela vaprofeti

⁹ Xungetano ngu vaprofeti, mbilu yangu yi bhandekile; Marambu angu otshe ma dekadeka; no nga m'thu wu a nga leva, mwendo wu a nga leviswa ngu vhinya, ngu mhaka ya Mkoma ni mahungu akwe o sawuleka.

¹⁰ Nguko ditiko di tate ngu va wugango Ditiko da dila ngu mhaka ya txiruko; wudyiselo wa txiwulani wu hyite; matsimbilelo awe ma bihile, a ti to biha, ngu tona i ku mtamo wawe.

¹¹ “Nguko votshe vaprofeti ni vaphaxeli kha va sawuleka, hambi nyumbani kwangu ni mani wubihi wawe, kuwomba Mkoma!

¹² Ngu konaho, nzila yawe yi na va ni makhalo o rithimukela amu txidemani, va na rethwa va txi wa ka yona, ni na va nehela dikhombo ka dilembe da kupekwa kwawe, kuwomba Mkoma!

¹³ Ni wonile to nyenyeza, ni ka vprofeti va Samariya; va to profeta ditinani ka Bhahali, ve hambukisa vathu vangu va ka Israyeli.

¹⁴ Aniko ngu ka vaprofeti va Jerusalema ni woni silo so thisa ngutu: Vona va maha wugango, ve hemba makuhu; ve tsanisa mawoko a vamahi va kubiha, kasi ku si hunduluki ni wammweyo amu ka wubihi wakwe; kwangu, va fana ni Sodhoma, vaaki va Jerusalema va fana ni Gomora.

¹⁵ Ngu konaho, nda ku nga tona eto a wombako Mkoma wa Mabutho a Tiyimbi xungetano ngu vaprofeti: Ni na va dyisa manonwe ni ku va dyisa nyongwa, nguko kwa mbi sawuleka ku tshapela dotshe ditiko. Na ku txi huma ngu ka vaprofeti va Jerusalema.

¹⁶ Mkoma wa Mabutho a Tiyimbi a khene: Mi nga engiseleni timhaka ta vaprofeti vava va profetako kwanu, nguko va mi kanganyisa; va txhumayela siwoniso sa timbilu tawe vapune, na si si humi ngu ka txisofu txa Mkoma.

¹⁷ Va txhumayela va di ka so vavalu ka va va ni kanyisako, va txi kha vona: Mkoma a khene: Mi na zumbiseka kha kwati. Ni ka votshe va tsimbilako ngu kubanga ka timbilu tawe, va txi kha vona: Kha di na mbi ta dikhombo txitimwi kwathu.

¹⁸ I mani wawe a nga ema makungoni ka Mkoma, ati taku e wona ni kupfa dipswi dakwe kani? I mani a xiyako mhaka yakwe a txi yi engisa kani?”

¹⁹ Wonani txivhunguvhungwani txa Mkoma, i ku txiviti txakwe, txi vhilukile ngutu, txi fanana ni txingulu; txi na wa txitimwi ka misungo ya va vo biha.

²⁰ Kuhenya ka Mkoma kha ku na mbi boxa na asi se maha ati ti xuvwako ngu mbilu yakwe; mi na ti zivisisa kha kwati ka masiku matako.

²¹ Kha na va ruma vaprofetivo, aniko va ta so tutumela vapune; kha na womba-womba navo, aniko va to profeta vapune.

²² Aniko, i tiku va ti ti emile banzani kwangu, nga va di zivisile ka vathu vangu timhaka tangu, ve va hundulusa nzilani kwawe ko biha, ni ka simaho sawe so biha.

²³ Ina ni Txizimu txa hafuhi dwe, na ni si nga Txizimu txa kule kani? Kuwomba Mkoma.

²⁴ Ina m'thu a nga sisala ka makhalo a sihunja saku ve ni si mmoni kani? Kuwomba Mkoma. Ina kha ni tati nzuma ni mafu kani? Kuwomba Mkoma.

²⁵ Ni pfite ti va wombako vaprofeti, ava va profetako makuhu ngu ditina dangu, va txi kha vona: Ni lorile, ni lorile!

²⁶ Ina tona tiya ti na vaho timbiluni ka vaprofeti va va profetako makuhu kani? Ava va profetako ngu kukanganyisa ka timbilu tawe vapune kani?

²⁷ Na va txi alakanya ti taku va na maha vathu vangu ve divala ditina dangu ngu mhaka ya miloro yawe, ayiya mmweyo ni mmweyo a gelako muakelani wakwe, kufana ni kule vakokwani vawe va nga divala ditina dangu ngu mhaka ya Bhahali.

²⁸ Mprofeti wu aku ni mloro, a na wu xawutele; aniko awu a ku ni mhaka yangu, nga a txi txhumayela yona ngu kuthembeka. Ngu kutxani mi pata mthungu ni fulaho kani? Kuwomba Mkoma!

²⁹ Ina mhaka yangu kha yi fani ni mndilo kani? Kuwomba Mkoma! Kha yi fani ni hamela yi bhandako marigwi kani?

³⁰ Ngu konaho, na wukela vaprofeti, kuwomba Mkoma, ava va pako timhaka tangu, mmweyo ni mmweyo ka dixaka dakwe.

³¹ Na wukela vaprofeti, kuwomba Mkoma, ava va txhumayelako ngu tidimi tawe, na va txi kha vona: Mkoma a khene:

³² Ina, na wukela vale va profetako makuhu, kuwomba Mkoma, ngako va txi yi xawutela, ve hambukisa vathu vangu ngu makuhu awe ni kulalata kwawe. Kuve ani kha na va ruma, hambi ku va elela; kha va na txivhuno txa txilo ka vava vathu, kuwomba Mkoma!

Ina dipswi da Txizimu mrwalo kani?

³³ Ngako vathu vava, mwendo mprofeti, mwendo mphaxeli, va txi ku wotisa, va txi kha vona: Ngu wuhi mrwalo wa Mkoma kani? Sekoko u na va xamula, u txi khawe: Nganu mrwalo wa kona! Ni na mi ginyalata, kuwomba Mkoma.

³⁴ Mprofeti, mwendo mphaxeli, mwendo m'thu wu a no womba, a txi khene: Mrwalo wa Mkoma, eyo ni na mtsayisa kumweko ni votshe va nyumba yakwe.

³⁵ Mi na khanu, mmweyo ni mmweyo a na wotisa mu akelani mwendo mwanawe, a txi khene: Mkoma a xamute txani kani? Mwendo intxani a nga womba Mkoma kani?

³⁶ Mrwalo wa Mkoma kha mi na mbiswa mi txi wu khumbuka kambe: Nguko mhaka ya mmweyo ni mmweyo yi na va mrwalo wakwe; ngako mi nga somborota timhaka ta Txizimu txi txi hanyako, ta Mkoma wa Mabutho a Tiyimbi, Txizimu txathu.

³⁷ U na womba ka mprofeti, u txi khawe: Mkoma a ku xamute txani? Mwendo intxani a nga womba Mkoma kani?

³⁸ Aniko, ngako anu mi txi khanu: Mrwalo wa Mkoma, ngukonaho Mkoma a na khene: Aku mi wombako mhaka yi yaku: Mrwalo wa Mkoma, kuve ni mi layile ni txi khani: Mi nge ngadi mi womba kambe mitxi, Mrwalo wa Mkoma;

³⁹ ngu ditshuri ani ni na mi divala da magwito, ni txi mi tutumisa masoni kwangu, anu ni didhoropa diya ni nga mi ninga, ni ka vatate vanu.

⁴⁰ Ni na mi rweka kurukwa ka kwa mbi gwita, ati ti singako ni kudivalwa.