Jeremiya 20 - Bhiblia Yo Sawuleka

Jeremiya ni mphaxeli Paxuri

¹ Paxuri, mwana Imeri, mphaxeli wu i nga ti mthangeli Nyumbani ka Mkoma, a to pfa Jeremiya, a txi profeta ngu timhaka tiya.

² Se a to peka mprofeti Jeremiya, a txi mkhotela ka wukhalo wu ku txikenini ka txitimwi ka Bhenjamini, amu Nyumbani ka Mkoma.

³ Mangwanani ka kona Paxuri a to humisa Jeremiya ngu ku khotelwani. Sekoko Jeremiya a to khene kwakwe: Mkoma kha kudhani ditina do khene ngawe Paxuri, aniko ngawe “Magori-Misabhibhi.”

⁴ Nguko Mkoma a khene: “Ni na kumaha txidhukiso txako upune, ni txa maxaka ako otshe; vona va na dawa ngu matxhari a valala vawe, awe wutumbu u na ti wona. Ni na ningela dotshe ditiko da Judha manzani ka mfumeli wa Bhabhilona, a na va yisa kuñolwani Bhabhilona, e va daya ngu ditxhari.

⁵ Txa wumbidi ni na ningela yotshe thomba ya didhoropa diya, ni mabhindu a kona otshe, ni sotshe siya sa lisima, ina, ni tithomba totshe ta vafumeli va ka Judha, ni na si ningela manzani ka valala vawe, ava va no si teka ngu ku si handa, va txi si yisa Bhabhilona.

⁶ Na nawe Paxuri, ni votshe va zumbako nyumbani kwako mi na yiswa kuñolwani. Awe u na tsula Bhabhilona, eho u noya fela kona, ni kutshotshwa kona kumweko ni maxaka ako otshe, aawa u nga ma profetela makuhu.”

Kutitsetsa ka Jeremiya

⁷ Awe Mkoma, u ni xengile, ni tumete kuxengwa. Awe u ni mtamo ku ni pinda, u ni xute. Ni mahile txisekiso dotshe ditshiku. Votshe va ni poyilela.

⁸ Nguko konkuwa ni wombawombako, na peka huwa; ni peka huwa ngu “kutsindavetwa ni kuhandwa.” Nguko va ni ruketela ngu mhaka ya dipswi da Mkoma, ni ku ni seka dotshe ditshiku.

⁹ Sekoko ani ni ti khani: Kha ni na mbi mu alakanya, hambi kuwombawomba ngu ditina dakwe; aniko eto mbiluni kwangu ti to nga mndilo wo tura, na wu di tsivetwe marambuni kwangu; kambe ni rerekile ngu kuxaniseka se kha ni sikoti.

¹⁰ Nguko ni pfite kungungurukela ka vavangi: Kuho kuthava ka otshe madhawa! “Wombani, hi na mmangala!” Votshe vale va ku ni kuthutha ni nani, va verela kuwa kwangu, va txi kha vona: “Mwendo a nga tumela kukujetelwa, sekoko hi na mxuthula, kuva hi pharela kwakwe.”

¹¹ Aniko Mkoma a kumweko ni nani nga ndena yi thavisekako; va xanisi vangu va na humbwa, va si ni xuli; aniko va na so koyo tingana, nguko kha va maha ngu wutxhari; ti nava tingana ta kwa mbi guma, ti singako ni kudivalwa.

¹² Aniko, Mkoma wa Mabutho a Tiyimbi, awe u xolako va vo lulama; awe u wonako mapimo awe ni timbilu. Ni na wona ngako u txi ni pharelela ka vona, nguko ni kuzivisile mhaka yangu.

¹³ Embelelani ka Mkoma, mi dhumisa Mkoma; nguko a hulukisile dihika da wu a pwatako manzani ka vo biha.

¹⁴ Di na rukwe ditshiku di ni nga velekwa ngu dona! Ditshiku edo mame a nga ni veleka ngu dona, di nga katekiswe!

¹⁵ A na rukwe m'thu wu a nga bika mahungu amanene ka tate wangu, a txi khene: U veleketwe txizambyana, e m'tsakisa ngutu.

¹⁶ Se m'thuyo a na fana ni madhoropa aawa Mkoma a nga ma hasamula, na asi ti layi. Kambe ene a napfe tihuwa ni mixo, ni huwa ngu mbimo ya mitshikari.

¹⁷ Ngu kutxani a nga mbi ni daya ni di ngadi mndani kani? Kuva mwamwangu eva ni dithitha dangu kani? Mwendo kuzumba ni mrumbu ngu ha ku si gwitiko kani?

¹⁸ Kasi ni humete txani ngu mndani ka mame kani? Titaku ni ta wona mthumo ni xomulo, ni ku masiku angu me gwita ngu tingana kani?