Jeremiya 2 - Bhiblia Yo Sawuleka

Kuthembeka ka Israyeli

¹ Dipswi da Mkoma di tile kwangu, di txi ta kha dona:

² Tsula, kwangula tinzeveni ka Jerusalema, u txi khawe: Mkoma a khene: “Na alakanya wunene wa wuphya wako, Ni lirando lako mbimo yi u nga wutwa ngu yona; mbimo yile u nga ti ni londetela txiwulani, Ka ditiko di ku nga sa phaywa txilo

³ Sekoko Israyeli i ti ti msawuleki wa Mkoma Siyalo so khata sa kufunyela kwakwe; votshe vale va mvandamulako va ni mnandu va na welwa ngu dikhombo, kuwomba Mkoma.”

Sionho sa vakale va Vaisrayeli

⁴ Engisani dipswi da Mkoma anu va nyumba ya ka Jakobe, Ni nanu mimwaya yotshe ya ka Israyeli.

⁵ Mkoma a khene: Mbubihi muni va nga wu wona kwangu vatate vanu kani? Aku va dhawukanako ni nani kani? Va londetela sifananiso si si vhuniko txilo, ve maneka va si nyawuli.

⁶ Se kha va kha vona: “Ahani Mkoma, awu a nga hi humisa ditikoni ka Egipta kani? Awu a nga hi thangela amu txiwulani, ditikoni ka sigwangwa ni maphala, ditikoni ka kuoma kumweko ni mtsudini wa kufa Ditiko di nga ti si nga ni vapindi ni vaaki.”

⁷ Ni mi nehile ditikoni ko pfuna, kuva mi ta dya mihando ya kona ni kuzumbiseka ka dona. Aniko hale mi nga wulela ka dona mi di nyenyezisile ditiko dangu; ni thomba yangu mi yi mahile manyala.

⁸ Vaphaxeli kha va nga wotisa, va txi kha vona: Ahani Mkoma kani? Ni vañoli va mlayo kha va nga ni ziva. Vathangeli va to ni tshuralela. Ni vaprofeti va profetile ngu Bhahali. Ve londeta sa kwa mbi vhuna txilo.

⁹ Ngu konaho, ni ngadi ni txi na lwa ni nanu, kuwomba Mkoma. Ni vatukulu vanu ni na lwa navo.

¹⁰ Hi nga wulelani miya txitondoloni ka Kilimu, mi ya wona; rumelani Kedhari, mi xolisisa kha kwati; mi wona ngako txilo txo ngeto txi khala kumaheka.

¹¹ Di ngava di diho ditiko di di nga hundulusa sizimu sa dona, hambiko i singako sizimu kani? Aniko vathu va vangu va lekile wudhumo wawe, ve khozela sisi si vhuniko txilo.

¹² Xamalani ngu sona anu tinzuma! Thavani ngutu mi dhudhumela, kuwomba Mkoma.

¹³ Nguko vathu vangu va mahile kubiha kumbidi: Va ni lekile ani txisima txa mati ma hanyako, ve ti akela mathange ma ku ni tifa, ma si sikotiko kuxayisa mati.

Mihando ya kwa mbi thembeka ka vathu

¹⁴ Ina Israyeli a ngava i di txithumi kani? Mwendo i khumbi ya maveleko kani? Ngu kutxani a handwako kani?

¹⁵ Tingonyamo tiwete txitimwi kwakwe ti txi bhonga-bhonga ngu dipswi da tona, ti bhandelela ditiko dakwe; miti yakwe yi hisilwe; kha ku na m'thu a zumbako ka yona.

¹⁶ Hambi ni vanana va Nofa ni va Takapanesi va bhandile dithafurafu dako!

¹⁷ Ina khwa ti vangela dikhombo upune! Nga ha u nga leka Mkoma Txizimu txako, ahawa ene a nga kuthangela nzilani kani?

¹⁸ U tsimbilela txani ngu nzila ya Egipta, kuya sela mati a Nilo kani? U tsimbilela txani ngu nzila ya Asiriya kuya sela mati a mnambo kani?

¹⁹ Kubiha kwako ku na kutsayisisa, u pekwa ngu wubihi wako, ngukonaho, ti zive ku tibihile kuleka Mkoma, Txizimu txako. Ni kwa mbi thava ka tisa kupandiseka, kuwomba ene apune Mkoma Txizimu txa Mabutho a Tiyimbi.

²⁰ Nguko ngale ni di funyile dikange dako, ni bhenula tingoti tako, u nje khawe: Na mbiswa ni txi thuma, nguko u sisate ka yotshe mimango yo guleka, ni hahatshi ka yotshe mindonga yo nyuka, u maha wugango.

²¹ Ni kuphaya ku nga mndonga wo tshura wa m'vhinya, wa lixaka la linene; u phemberukete txani u maha mndonga wa limwani lixaka kani?

²² Hambi u nga samba ngu mirende, u pupumisela sephu yayingi, wubihi wako wu na woneka masoni kwangu, Ngene apune Mkoma a wombako.

²³ U nga wombisa kutxani ku khawe, kha na nyenyeziswa, kha na londisela Bhahali kani? Hi nga wona nzila yako mreleloni, alakanya ti u nga maha; awe u dikameli da mazambo di tutumelako hale ni hale.

²⁴ Awe u fana ni mangwa ya mkati, ayiya ngako yi txi hokelwa ngu mbimo yo lava matune, yi txi hanuka kha yi tumeli ku tshumetwa ngu m'thu; ngako matune a txi yi lava kha na mbi karala, a na yi mana ngu mtxima wa yona

²⁵ Thela kota ti to mkondo wako wu si mwalalelwi ngu kathula, ni mkolo wako ti to wu mana ditora! Aniko u khawe: “Wa ti karata walo! Nguko ni randa sizimu sa vamatiko ni nga txi na si londetela.”

Txitsayiso txa vathu va ka Israyeli

²⁶ Kufana ni dikhamba di di manwi di ni tingana, ngu toneto ni nyumba ya ka Israyeli yi ni tingana, kumweko ni vafumeli ni vathangeli va yona, vaphaxeli va yona ni vaprofeti va yona.

²⁷ Ava va wombako ka mndonga va txi kha vona: Awe u tate wangu, se va txi kha vona ka dirigwi: Ani ni velekilwe ngu ngawe; nguko va ni tshuralete, kha va ni rendekeli; aniko, mbimo ya dikhombo, va na kha vona: Ema, u txi hi xanguta!

²⁸ Sekoko si hani sizimu sako asi u nga ti mahela kani? Hi nga si leka si txi ema, hi wona ngako si txi sikota ku kuhanyisa ka mbimo ya makhombo! Nguko sizimu sako si dingana ni mtengo wa miti yako, awe Judha.

²⁹ Mi ni henyela ngu kutxani kani? Anu motshenu mi hambunyetile mi txi ni wukela, kuwomba Mkoma.

³⁰ Ni pekile walo vanana vanu, kha va tumela kukawukwa. Ditxhari danu di date vaprofeti vanu nga ngonyamo yi hasamulako.

³¹ Anu va liveleko liya, engisani dipswi da Mkoma! Ina mwendo ani ni khala ku va txiwula ka Israyeli kani? Mwendo kuve ditiko da txidema kani? Ngu kutxani vathu vangu va txi: Hi txhusekile; kha hi na mbiswa hi txita kwako kani?

³² Ina m'horana a nga divala wubombi wakwe, mwendo wa ku ngadi kulowolwa kudivala sihiwa sakwe kani? Kambe ditiko dangu di ni divate kale.

³³ Eto u tshurisisako tona ma lavelo ako a lirando! Uza u gondisa ni vavasikati va wubhemba tinzila tako.

³⁴ Mirungoni ka txyambalo txako kumaneka mnoha wa sisiwana asi si singako ni mnandu, ava u nga mba va mana va txi dhoda nyumba yako. Aniko u va date, nguko u dhunda ta ku nga toneto.

³⁵ Kambe u khawe: Nga hawa ni kuwalo mnandu, kuhenya kwakwe kuhumile kwangu. Wa wona, ni na kulamula. Aniko u khawe: Kha na onha!

³⁶ Ngu kutxani u kuluvetako kujika, u txitxa nzila yako kani? U engeta u xowokiswa ngu Egipta, ngako u nga wiswa tingana ngu Asiriya.

³⁷ Kambe u na huma u di sanzekile mawoko ako ha msungo; nguko Mkoma a lambile va u va thembako, khu na mbi humelela ngu vona.