Jeremiya 17 - Bhiblia Yo Sawuleka

Txionho ni kutsayiswa ka Judha

¹ Txionho txa Judha txi bhatwe mbiluni ngu mtenga wa txikete, wu ku ni tshoka ya dhayimana; txi vatetwe timbiluni kwawe, ni mu ka titxheho ta siluvelo,

² vanana vawe va ti ti alakanya siluvelo sawe ni sifananiso sawe sa Aseri hahatshi ka mindonga yo nyuka mimangoni.

³ O mmango wangu amuwa thembweni. Ni na ningela thundu yako ni tithomba tako kuva ti txi handwa, kumweko ni makhalo ako o guleka, ngu mhaka ya sionho si u nga si maha mu ka ditiko dako dotshe.

⁴ Ngu mnandu wako wutumbu u na mwalelwa ngu thomba yako ayi ni nga kuninga; ni na kumaha u thumela valala vako, ka ditiko di u si di ziviko. Nguko mi dhivete mndilo wa kuhenya kwangu awu wu no tura kala kupinduka.

Mapimo a wutxhari

⁵ Mkoma a khene: “A ruketetwe m'thu wu a thembako m'thu, a thembako mtamo wa diwoko dakwe, na mbilu yakwe yi di hambanile ni Mkoma.

⁶ Nguko a na fana ni txitxhotxhota txa txiwulani, kha na mbi ma wona makatekwa ma txita; aniko a na zumba ka makhalo ma nga hya mu txiwulani, ka ditiko da mnyu di di singako ni m'thu.

⁷ A katekile m'thu wu a thembako Mkoma, awu kuthemba kwakwe i ku Mkoma.

⁸ Nguko a na fana ni mndonga wu wu nga phawa hafuhi ni mati, awuwa mitwi ya wona yi navako kala matini. Hambi kuva ni lisani kha wu thavi, aniko mazokoro a wona mo simama me nyuka. Kha wu karateki hambi i di dilembe do mbawa mati, hambi kuleka kuveleka mihando.

⁹ Se mbilu mkanganyisi kupinda sotshe silo, yi sinile; i mani a no yi ziva kani?

¹⁰ Ani Mkoma ni xola mbilu, ni xola mapimo; ni ninga ka mmwani ni mmwani, madingano ni mahanyelo akwe, madingano ni mihando ya mithumo yakwe.

¹¹ Nga tshukwa yi yi fundamelako manda a yi nga mbi ma veka, ngu toneto ni wu a sengeletelako tithomba ngu nzila ya walo; kuve a na yi leka i di ngadi mixo, magwito akwe ngu kuxanga.”

¹² Wukhalo wathu wo sawuleka njikhalo txathu txa wukoma txo guleka, txi nga vekwa txitimwi kukhukhela kukhatani.

¹³ Awe Mkoma u kuthemba ka Israyeli; votshe va va ku lekako va na wa tingana. Votshe va va khukhako kwangu va na bhalwa txivhunyeni; nguko va lekile Mkoma wu i ku Txizimu txa mati a wutomi.

Jeremiya e kombela kuvhunwa ngu Txizimu

¹⁴ Ni thume Mkoma, ni na va ni di kalamukile, ni hanyise, ni na va ni di hanyisilwe. Nguko ngawe wudhumo wangu.

¹⁵ Wona, va womba kwangu, va txi kha vona: “Ku hayi koko kudhukisela ka Mkoma kani? Ku na maheke koko ka!”

¹⁶ Ani kha na lamba kuve m'dyisi wu kambe i ku didhota, kha na verela ditshiku da dikhombo; awe wa tiziva. Ati ti nga huma ngu txisofuni kwangu, ti wombilwe masoni kwako.

¹⁷ U nga ti mahe txidhusa kwangu; awe u ku wuthavelo wangu, ka ditshiku da dikhombo.

¹⁸ Nga va txi goo tingana va va ni xanisako, aniko ani nga ni si wiswi tingana; nga va txi dhudhumela, aniko ani nga ni si dhuki ni dhudhumela. Va tisele ditshiku da dikhombo, u txi va hasamulela kumbidi.

Sabbata

¹⁹ Mkoma a ti khene kwangu: Tsula u txi ya ema ha txikeni ka vanana va ditiko, ahawa va wulelako ngu kona vafumeli va ka Judha, va humako ngu kona, u txi ema ni ka sotshe sidinge sa Jerusalema;

²⁰ u txi khawe kwawe: Engisani dipswi da Mkoma anu vafumeli va ka Judha, ni nanu motshenu Vajudha, ni nanu motshe mi zumbako Jerusalema, mi wulelako ngu sike siya.

²¹ Mkoma a khene: “Ti woneleni, mi nga rwaleni mirwalo ngu ditshiku da Sabbata, mi nga yi wuleteni Jerusalema ngu sike sa kona.

²² Hambi kuhumisa mirwalo ngu tinyumbani kwanu ngu ditshiku da Sabbata, hambi kumaha ni wihi mthumo. Aniko sawulekisani ditshiku da Sabbata, nga kule ni nga laya vakokwani vanu.

²³ Vona kha va engisa, hambi kuhuphuta tinzeve tawe; aniko va to bangisa tithamo tawe, kasi va si engisi, ni kwa mbi amukela kulaywa.

²⁴ Ngako koko, mi txi ni engisa, kuwomba Mkoma, mi si wuleti mirwalo sidingeni ka didhoropa diya ngu ditshiku da Sabbata, kambe mi sawulekisa ditshiku da Sabbata, mi nga thumeni mthumo ngu dona;

²⁵ sekoko ku na wuletwa ngu sike sa diya didhoropa, vafumeli ni manganakana va va nga khalahatsha txikhaloni ka wukoma ka Dhavhidha, na va di mu ka sikotxikani si ndindwako ngu mahantxhi, ve londetelwa ngu manganakana awe, ni vathu va ka Judha, ni vazumbi va Jerusalema; didhoropa diya di na va ni vathu kala kupinduka.

²⁶ Va nata ngu madhoropani a ka Judha, ni madhawani ka Jerusalema, ni ditikoni ka Bhenjamini, ni tibalani, ni mimangoni, ni wulambwe, ve neha miningelo yo hiswa ni miphaxo, ni miningelo ya mpupu, ni dibaselo, ni miningelo ya kudhunda amu Nyumbani ka Mkoma.

²⁷ Aniko, ngako mi si ni engisi, kasi ku mi si sawulekisi ditshiku da Sabbata, ni kuva mi si tisi mirwalo ni kuwulela nayo ngu sike sa Jerusalema, ngu ditshiku da Sabbata; sekoko, ni na dhivela mndilo sikenini ka dona, wu hisa tinyumba ta wukoma ta Jerusalema, mndilo wuwa kha wu na mbi timeka.”