Jeremiya 13 - Bhiblia Yo Sawuleka

Libhandi la linyu

¹ Mkoma a ti khene kwangu: Tsula u txi ya ti xavela libhandi lo tshura, u sunga txiwununi kwako, na u sa li beta matini.

² Sekoko ni to ya ti xavela libhandi lo tshura, nga ti Mkoma a nga ni leletisa tona, ni sunga txiwununi kwangu.

³ Dipswi da Mkoma di tile kwangu ka wumbidi, di txi kha dona:

⁴ Teka libhandi li u nga xava, li ku txiwununi kwako, tsula Ewufrate u txi ya li sisa mu ka phako ya dirigwi.

⁵ Se ni to tsula ni txi ya tumbeta libhandi hafuhi ni Ewufrate, nga kule Mkoma a nga ni leleta.

⁶ Na ku di pindile masiku o tala, Mkoma a ti khene kwangu: Khukha uya Ewufrate, u ya teka libhandi lile ni nga ku ruma kuya li sisa.

⁷ Sekoko ni to tsula Ewufrate, ni txi ya kela, ni teka libhandi amu ni nga ti li sisile kona. Aniko libhandi li ti sinile, li si nge vhuna txilo.

⁸ Dipswi da Mkoma di tile kwangu, di txi khani:

⁹ Mkoma a khene: Nga toneto, ni na sinisa kutikulisa ka Judha, ni kutikulisa ka hombe ka Jerusalema.

¹⁰ Ditiko diya do biha, adi di si tumeliko kupfa mapswi angu, adi di tsimbilako ngu kubanga ka mbilu ya dona, di txi londetela simwani sizimu, di txi si thumela ni ku si khozela, di na fana ni libhandi li li si vhuniko txilo.

¹¹ Nga kule libhandi li namarelako ha txiwununi ka m'thu, ngu toneto ni mahile ti taku yotshe nyumba ya ka Israyeli ni yotshe nyumba ya ka Judha ti txi namarela kwangu, kuwomba Mkoma, kasi di txi maneka kwangu ditiko, ni ditina, ni wudhundo, ni wuhombe; aniko kha va tumela kuengisa.

Tifuko ta vhinya

¹² Ngu konaho, u na va gela mhaka yiya, u txi khawe: Mkoma, Txizimu txa Israyeli a khene: Fuko yimweyo ni yimwani yi na tatwa ngu vhinya. Vona va na kha vona kwako: Ina nathu kha hi ti zivi ti taku tifuko totshe ti na theletelwa vhinya ti txi tala kani?

¹³ Sekoko u na khawe kwawe: Mkoma a khene: Wonani tito, votshe va zumbako ka diya ditiko, ni vafumeli va va zumbako ha txikhaloni ka mfumo wa Dhavhidha, ni vaphaxeli ni vaprofeti, ni votshe va va zumbako Jerusalema, ni na va levisa.

¹⁴ Ni na va phwatisa ve gumulana, vatate ni vanana, kuwomba Mkoma. Kha ni na mbi va divalela, hambi ku va tsetsa. Kha ni na mbi va ni wumbilu ha ka ku ni si va lovisi.

Kutikulisa ni kutsayiswa

¹⁵ Riyani tinzeve mi txi engisa; mi nga ti kuliseni, nguko Mkoma a wombile.

¹⁶ Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

¹⁷ Aniko mi si engisi, ni na dila txihunjani ngu mhaka ya wugwili wanu, maso angu ma na dila ngutu, me humisa mirongo, nguko vathu va Mkoma va yiswa wukarawani.

¹⁸ Gela mfumeli ni mame wa mfumeli, u txi khawe: Ti namiseni, mi txi khalahatsha, nguko mbhoti wa wukoma wanu wu wite, i ku txona txiningo txanu txa mfumo.

¹⁹ Madhoropa a Wulambwe ma tsivilwe, khangaho a no ma tula; votshe va ka Judha va yisilwe wukhumbini, kha ka sala ni wammweyo.

²⁰ Guletani maso anu mi wona vale vatako ngu Wuphemba. Va hani vathu va u nga ti ningilwe vona, vathu vako vo dhundeka kani?

²¹ U na txani ngako a txi veka vakakwanu ku kufumela kani? Ngawe u nga va gondisa kuva vanyamne vako. Ina kha ti na mbi panda kwako nga wamsikati a lumwako kani?

²² Ngako u txi womba mbiluni kwako, u txi khawe: “Ti tisa kutxani kwangu ta ku nga tiya kani?” Ziva ti to u vhunungutwe syambalo sako, ngu mhaka ya kubiha kwako ka hombe, ni sizenende sako si pekilwe.

²³ Ina Muetiyopiya a nga txitxa mxowo wakwe kani? I di ku ngeto, nanu mi nga sikota kumaha tinene, anu mi nga tolovela kumaha kubiha.

²⁴ Ngu konaho, ni na va hangalasa kufana ni mthungu awu wu huhiswako ngu diphuho da mu txiwulani.

²⁵ Atxiya ngu txona txiningo txako, atxi ni ku dinganako, kuwomba Mkoma; nguko u ni divate, u themba makuhu.

²⁶ Ngu konaho, ni na guleta txiambalo txako kala khoheni kwako, ti taku ku txi woneka tingana tako.

²⁷ Ni wonile wugango wako, ni kudila ka kunavela kwako, wugango wako wo phindeletisa, amu mimangoni ni mu tithembweni. Dikhombo kwako Jerusalema! U na verela kala yihi mbimo na u si basiswi kani?