Jeremiya 12 - Bhiblia Yo Sawuleka

Jeremiya a maha siwotiso ka Txizimu

¹ Wa kululama ngutu ngawe, Mkoma, hambi ni txo kanetisana ni nawe; hambi keto, ni na bhula ni nawe ngu malamulelo ako. Ngu kutxani va kubiha ve humelela kani? Va kateka ngu kutxani votshe va va nga mbi thembeka kani?

² Awe u va phayile ve zima mitwi; ve kula, ve ninga mihando. Awe u hafuhi ni sisofu sawe, aniko u kule ni timbilu tawe.

³ O Mkoma, awe wa ni ziva, wa ti wona, wa xola mbilu yangu ti taku yi zumbisa kutxani kwako. Va khumule nga tinvuta ti ti yiswako txitshindoni, va longisele ditshiku da kudawa.

⁴ Ina ditiko di na keta kala yihi mbimo kani? Mwasi wu txi oma txitingani, ngukonaho ka wubihi wa va va zumbako emo kani? Sihari ni sinyana sa lova, nguko va kha vona: Kha na mbi wona kugwitelwa kwathu.

⁵ Ngako u txi palisana ni vathu ngu kututuma, ve kusiya, ina u nga palisanisa kutxani ni mahantxhi kani? U si nga ni kuzumbiseka ditikoni ko thutha, u nga mahisa kutxani txigotoni ka Jordhani kani?

⁶ Nguko ni vona vananu ni nyumba ya tate wako va ku lundumisile; ve ku kulumela. U nga va tumele hambi va txo kugela mapswi o tshura.

Txizimu txi henyela vathu va txona

⁷ Ni tutumile Dithepele dangu, ni site thomba yangu; ni ningete txirandwa txangu manzani ka valala va txona.

⁸ Thomba yangu yi ni wukela ku nga ngonyamo amu txitingani; yi ni bongela, ngukonaho, ni swirekile ngu yona.

⁹ Ina thomba yangu yi kwangu nga txinyana txa matshakatshaka. Ti di ngeto, makoti a na va wukela ngu ka otshe madhawa. Tsulani mi txi ya mananisa sotshe sihari sa txitinga, si na yi khobweta.

¹⁰ Vadyisi votala vo onhetela txivhina txangu, va kandile thembweni kwangu; thembwe yangu yo tshura va yi mahile txiwula.

¹¹ Va di onhile, da dila kwangu nguko di mahisilwe dirumbi; ditiko dotshe di mahile dirumbi! Nguko kha ku na m'thu a di khatalelako.

¹² Vahasamuli va tile mimangoni kotshe ka txiwula, nguko ditxhari da Mkoma di xasela kukhukhela magwito kala kumwani magwito ka ditiko; kha ku na m'thu ni wammweyo a nova ni kuthutha.

¹³ Va phayile fulaho, va funyete mipa; va ti karatile walo. Mi na va ni tingana ngu mhaka ya kufunyela kwawe. Ni kuhisa ka txiviti txa Mkoma.

¹⁴ Ndongeto a wombako Mkoma ngu vaakelani vangu vo biha ava va wukelako thomba yi ni nga ninga vathu vangu va Israyeli. Ni na va dula ditikoni kwawe, ni nyumba ya ka Judha ni na yi dula hagari kwawe.

¹⁵ Aniko msana ka kuva ni ti va dute, ni na tshumela ni va pfela wusiwana, ni na va tshumeta, mmwani ni mmwani thombani kwakwe, mmwani ni mmwani e tshumelela ditikoni kwakwe.

¹⁶ Ngako va di gondile tinzila ta vathu vangu, ti taku va txi xambanya ditinani kwangu, va txi kha vona: Mkoma a hanyako; nga ku va nga gondisa vathu vangu kuxambanya ngu Bhahali, sekoko va na maneka hagari ka vathu vangu.

¹⁷ Aniko ngako va si engisi, ni na dula ditiko diya di txi lova, kuwomba Mkoma.