Jakobe 4 - Bhiblia Yo Sawuleka

Kuranda sa ha mafuni

¹ Ti ta ngu hani tiyimbi, mata ngu hani mazunga hagari kwanu, kani? Ina kha si mahwi ngu timbiti ta minavelo yo biha, ayi sihango sa mmidi wanu si lewako ngu yona, kani?

² Ma navela so maha, kambe kha mi si mani; se mi tutumela kudaya. Mi na ni wukhuxu, kambe kha mi koti txilo. Se ngu toneto, mi khata mazunga, nguko kha mi kombeli.

³ Hambi mi txi kombela, kha mi amukeli txilo, nguko kha mi kombeli ngu fanelo: Asi mi kombelako, mi kombela sa kutsakisa minavelo yo biha ya mmidi.

⁴ Vanyawugangonu, kha mi tizivi ti to wungana ni ditiko mbulala ka Txizimu, kani? Ngu toneto, awu a lavako wungana ni ditiko, i mlala wa Txizimu.

⁵ Mwendo mi pimisa ti to mibhalo yo womba walo ngako yi txi womba tito: “Moya wu wu zumbako kwathu, Txizimu txi wu randa ngu txiluse, kani?”

⁶ Txona Txizimu txa hi ninga tikateko ta tingi ngutu, madingano ni dipswi da mibhalo, adi di wombako tito: “Txizimu txi lambela ava va ti kulisako, aniko txi ninga tikateko ta txona ava va kutiveka hahatshi.”

⁷ Ngu konaho, ti vekeni hahatshi masoni ka Txizimu, kambe lambani ku ti ningela ka Sathani, se ene a na mi thava.

⁸ Tshuketani hafuhi ka Txizimu, kasi ni txona txi na tshuketela hafuhi kwanu. Basisani manza anu, vaonhi, mi txi basisa timbilu tanu, anu vathu va timbilu timbidi.

⁹ Zivani wusiwana wanu, salukani, mi txi dila; maseko anu ma na phinduke ma txi maha madila, litsako lanu li na phinduke li txi maha kupandiseka.

¹⁰ Ti vekeni hahatshi masoni ka Mkoma, se ene a na mi guleta.

Mi nga lamuleni

¹¹ Mi nga lenganeni, vanathu. Awu a lengako mkwawe, mwendo kulamula mkwawe, a lenga mlayo ni kulamula mlayo. Senikoko, ngako u txi lamula mlayo, khu ngadi mlondeteli wa wona, aniko u mlamuli wa wona.

¹² Mmahi wa mlayo ni mlamuli i mmweyo dwe, awu a sikotako kuhulukisa mwendo kulovisa. Aniko, u mani awe, u lamulako mkwanu, kani?

Thavani ku ti dhumisa

¹³ Sekoko, ni womba kwanu mi ku khanu: “Nyamsi, mwendo mangwana, hi na tsula ka didhoropa dokari, hi na ya fungala dilembe, hi txi xavisa, hi txi bhindula male,”

¹⁴ Anu, ni ka kudotho kha mi tizivi ti ti no maheka mangwana! Wutomi wanu nji txani, kani? Nguko anu mi hunguva yi yi humelelako mbimwanyana, yi txi hangalaka.

¹⁵ Hahanze ka kuwombisa ku khanu: “Ngako Mkoma a txi ti lava hi na hanya se hi na thuma tiya, mwendo tile.”

¹⁶ Kambe konkuwa, ma ti guleta ngu mapimo anu aku ti themba: Kasi kotshe kutiguleta ko nga tiya, ku bihile.

¹⁷ Ngu toneto, awule a zivako kumaha ta tinene, asi mahi, a ni txionho.