Jakobe 3 - Bhiblia Yo Sawuleka

Ta lidimi

¹ Vanathu, mi nga laveni ku bhi motshenu ngu ku ti maha vagondisi, nguko ma tiziva ti to hi fanete kuya kuthethiswani ko karata.

² Nguko, hotshethu ha onha sikhati so tala. Awule asi onhiko amu ka kuwombawomba, ngu ditshuri i m'thu wo hetiseka, awu a sikotako kuvekela matomu wotshe mmidi wakwe.

³ Ngako hi txi veka matomu mkanani ka mahantxhi, kasiku ma txi hi engisa, ha sikota kutsimbitisa wotshe mmidi wa ona.

⁴ Wonani sitimela sa mati ni sona, hambiko i ku sa hombe, na si txi susumetwa ngu moya wa mtamo, aniko si kombwa nzila ngu lemu ya yidotho, si txi yiswa amuwa mtsimbitisi wa sona a lavako ku si txi ya kona.

⁵ Kufana ni toneto, lidimi ni lona, hambiko i ku txihango txa txidotho txa mmidi, la ti dhumisa ngu mithumo ya lona ya hombe. Wonani mndilo wa wudotho, wu hisa txitinga txa hombe ngutu.

⁶ Se lidimi ni lona i mndilo, nditiko do tala ngu wubihi; lidimi li vekilwe hagari ka sihango sathu, se li nyeta wotshe mmidi, li dhivela mndilo wu wu hisako wutomi wotshe wa vathu, mndilo wu bhatiswako ngu mndilo wa gehena.

⁷ Nguko, totshe tixaka ta sihari sa txitinga, ta sinyana, ta minyoka, ni ta sihari sa linene sa fuywa, si txi fuywa ngu m'thu.

⁸ Aniko lidimi, awalo a sikotako ku li fuma. Lona njilala txo mbi zumbiseka, kambe li tate ngu txhefu yo daya.

⁹ Hi dhumisa ngu lona Txizimu, Tate, kambe hi ruketela ngu lona vathu, va va nga vangwa ka txifananiso txa Txizimu.

¹⁰ Ngu toneto, txisofuni kumweko kuhuma kukatekisa ni kuruka. Vanathu, atiya kha ti faneli kumaheka.

¹¹ Ina txisima txi nga sikota kuhumisa mati o tshamba ni o bava ngu wukhalo wumwewo, kani?

¹² Vanathu, ina mkuwu wu nga sikota kuveleka mihamdo ya muolivha, mwendo mndonga wa m'vhinya wu nga sikota kuveleka makuwu, kani? Kufana ni toneto, txisima txa mati a m'nyu kha txi na kuhumisa mati o tshamba.

Wuzivi wu wu tako ngu txitimwi

¹³ I mani hagari kwanu a zivako, kambe na a di txharihile, kani? A na kombise ngu mahanyelo akwe a kutiveka hahatshi ni a wuzivi.

¹⁴ Aniko, ngako mi di ni wukhuxu wo bava ni moya wo ti randa mipune timbiluni kwanu, mi nga ti kuliseni, kambe mi nga wombeni makuhu o kaneta ditshuri,

¹⁵ nguko, wuzivi wo ngeto, kha wu ti ngu txitimwi, aniko mbuzivi wa ha mafuni; wa wuhari ni wa wusathane.

¹⁶ Nguko, ahawa ku ku ni wukhuxu ni mibhando, ku na tumbuluka mazunga ni totshe tixaka ta sionho.

¹⁷ Kasi wuzivi wu wu tako ngu txitimwi, kukhata wu basile, kambe wu ni lidikho, ni wunene, ni kuengisa, kuhonisela, ni mihando ya yinene, ku ambi kana-kana, ni ku ambi kanganyisa.

¹⁸ Mihando ya kululama yi phaywa kudikhani ngu va va hanyako ngu kudikha.