Jakobe 2 - Bhiblia Yo Sawuleka

Kuthumela vathu ngu kufana

¹ Vanathu, likholo lanu ka Mkoma wathu Jesu Kristu, wu a nga tala ngu wudhumo, li nga mahe mibhando hagari kwanu.

² Nguko, ngako a txi bwaka m'thu mtshanganoni kwanu, na a di ambate ringi ya nzalama litihoni kwakwe, na kambe a di ni syambalo sa kutshura; se ngu msana ku txi ta mmweyo wa txikulungu, na adi ambate sa nzambwa.

³ Se mi amukela kwati awule wa kubomba, mi txi khanu: “Awe khalahatsha hawa ka txikhalo txa masoni,” ngu msana mi txi khanu ka wule wa txikulungu: “Awe ema konaho” mwendo ku khanu: “Awe khalahatsha hahatshi ka txikandetelo txa mikondo yangu.”

⁴ Ina toneto hi nga kusawula mi ku mahako hagari kwanu, mi txi ti maha valamuli va mialakanyo ya kubiha, kani?

⁵ Engisani, vanathu vo randeka: Ina kasi Txizimu kha txa langa vathu va sisiwana ditikoni muwa, kufela kuve maha vanyatithombe mu ka likholo, ni vadyi va thomba ya Mfumo wu txona Txizimu txi nga wu thembisa ka vale va txi randako, kani?

⁶ Aniko, anu mi nyenyile txisiwana! Se ina hi nga vanyatithombe va mi tsotsorolako kani? Vonavo va mi ndindako ve mi yisa kuthethiswani kani?

⁷ Ina hi nga vonavo va ruketelako ditina da dinene, di mi nga phaxwa ngu dona kani?

⁸ Ngu toneto, ngako mi txi veketa mlayo wu i ku wa hombe ka yotshe, madingano ni Mibhalo yi yi ku kha yona: “U na randa muakelani nga ti u ti randisako tona,” eho mi maha ta tinene.

⁹ Aniko, ngako mi txi sawula madingano ni khohe ya m'thu, mi maha txionho, mi na abaniswa ngu mlayo, nga sindaka-milayo.

¹⁰ Kha ditshuri, awule a veketako sotshe sirumo sa mlayo, aniko a kanyisako txirumo tximwetxo txa mlayo, a maneka a di ni mnandu wa kueyisa wotshe mlayo.

¹¹ Nguko, awule a ku khene: “U nga mahe wugango,” a wombile kambe ku khene: “U nga daye.” Ngu toneto, ngako u si mahi wugango, kambe u txi daya m'thu, se u txindakamilayo.

¹² Ngu konaho, wombawombani mi txi thuma, nga vathu va va fanelako kulamulwa ngu mlayo wa wuthuseki.

¹³ Nguko kulamulwa kha ku na mbi va ni wumbilu, ka wule a ku si nga ni wumbilu; aniko wumbilu wa humelela kulamulani.

Kukholwa ni mithumo

¹⁴ Vanathu, ti vhuna txani, ngako m'thu a txi khene a ni likholo na nga ni mithumo kani? Kukholwa ko nga toneto ina ku nga mu hanyisa kani?

¹⁵ Ngako mwananu mwendo ndiyako a di ni wusakato, a txi pwata ni sakudya sa ditshiku ni ditshiku,

¹⁶ se mmweyo wanu a txi va gela a txi khene: “Tsulani ngu kuthutha, futumelani mi khura;” na mi si va ningi txilo txa ku va vhuna ngu txona mmidi wawe, mapswi anu ma vhuna txani kwawe kani?

¹⁷ Ngu toneto, likholo ni lona, ngako li si na mithumo li fite wutumbu wa lona.

¹⁸ Kambe mmwani a na khene: “Awe u ni likholo, se ani ni na ni mithumo. Ni kombe likholo lako lo mbi na mithumo, ani ni na kukomba likholo langu ngu mithumo yangu.”

¹⁹ Awe wa kholwa ti to txi ho Txizimu tximwetxo txokha, kani? Ndinene! Aniko alakanya ti to madhimoni ni ona ma kholwa, kambe ma dhudhumela.

²⁰ Awe m'thu wa txipumbu, wa ti lava kuwona ti to likholo li li ku si nga ni mithumo kha li vhuni txilo, kani?

²¹ Ina hi nga yona mithumo yi nga maha ti to tate wathu Abrahamu e va mlulami, ngukuwa a nga ningela mwanana wakwe Isaake ha txiluveloni kani?

²² Se, wa ti wona ti to likholo lakwe li thumisani ni mithumo, ni ti to likholo li ningilwe kuhetiseka ngu mithumo, kani?

²³ Ngu toneto, yi tatisekile mibhalo yi yi ku: “Abrahamu a khotwe ka Txizimu, se atiya ti mningile ku e maha kota mlulami, se ene a dhanwi ku i mngana wa Txizimu.”

²⁴ Ma ti wona ti to m'thu a mahwa wo lulama ngu mithumo i si nga ngu likholo dwe.

²⁵ Kufana ni toneto, nene Rahabhi, wa digelegele, ina kha mahwa mlulami ngu mithumo mbimo yi a nga amukela mitumi a txi yi tshumeta ngu yimwani nzila, kani?

²⁶ Nguko, kufana ni mmidi wu wu ku si nga ni moya wu wu balwako ti to wu fite, ngu toneto ni lona likholo li fite, ngako li si nga ni mithumo.