Isaya 66 - Bhiblia Yo Sawuleka

Wukhongeli wa makuhu wa solwa

¹ Mkoma a womba tiya: Nzuma njikhalo txangu txa wukoma, se mafu njikhigelo txa mikondo yangu. I nyumba muni mi no ni akela anu kani? Niku wukhalo wa kuhumula kwangu i ngava wuhi kani?

² Nguko dianza dangu di mahile sotshe simaho siya, se sotshe simaha siya si to mahwa, kuwomba Mkoma; aniko wonani awu ni no muwona: Ka txisiwana, ni wule wo xaniseka moyani, kambe a dhudhumelako masoni ka dipswi dangu.

³ A wule a dayako homu, a fana ni wule a dayako m'thu; awu a phaxako ngu txinvutana, a fana ni wule a dayako yimbwa; awu a ningelako sa thembweni a fana ni wule a ningelako mnoha wa khumba; awule a hisako dibaselo a fana ni wule a khozelako txithombe; ni vona vava va ti langela tinzila tawe vapune, se muhefemulo wawe wa tsaka ngu wubihi wawe.

⁴ Kambe ani ni va maha ve kanganyiseka, ni na tisa kuthava txitimwi kwawe, nguko ni dhani, aniko kha ka xamula ni wammweyo, ni wombawombile, aniko kha va engisa, kambe va mahile to biha masoni kwangu, se ve sawula ti ani ti nga si ni tsakisi.

Txitsayiso ni kuhanyisa

⁵ Engisani dipswi da Mkoma, anu mi dhudhumelako masoni ka dipswi dakwe. Vananu vale va mi nyenyako, kambe va mi tshotshako kule ngu kuranda ditina dangu, va kha vona: “Mkoma a na dhumiswe, kasi ku hi wona kutsaka kwanu!” Aniko vona va na wiswa tingana.

⁶ Dispwi da kudhinda ka hombe di nata ngu didhoropani, dipswi da dithepele, dipswi da Mkoma, di ningako hakhelo ka valala vakwe.

⁷ Na ma sanzi kuhoka masiku, ene a to hefemula; na asi se lumwa ene a to veleka mwanana wa mfana.

⁸ I mani a khalako kupfa mhaka yo nga eto kani? I mani wu a khalako kuwona to fana ni tiya kani? Ina ditiko di nga sikota kuvelekwa ngu ditshiku dimwedo kani? Ku ndi na tumbunuka mafu ngu diganda dimwedo kani? Kambe Siyoni a ti ti lumwa, se a velekile vanana vakwe.

⁹ Ina ni nga tula mrumbu wa mame se asi hefemuli, kuwomba Mkoma; ni ndi na hefemulisa, ni tshumela ni vhala msembe mame kani? Kuwomba Txizimu txako.

¹⁰ Tsakani ngutu ni Jerusalema, mi tsaka ngu ngene, anu motshenu mi mrandako; talani ngu ku mtsakela, anu motshenu mi nga m'dilela.

¹¹ Kasi ku mi na mama mi khura, ngu masi a kuthavelela kwakwe; kasi ku mi busa mi tsaka, ngu kuphatima ka wudhundo wakwe.

¹² Nguko Mkoma a womba tiya: Wonani ti to ni na ateta kudikha kufana ni mnambo, ni wudhumo wa matiko kufana ni txinambwana, txi txi thekelelako; sekoko mi na mama, va na mi gulwa, va txi mi khutarela.

¹³ Kufana ni m'thu wule a txhavelelwako ngu mwamwakwe, ngu toneto ani ni na mi thavelela, se kona Jerusalema, mi na ya thavelelwa.

¹⁴ Eto mi na ti wona, kambe timbilu tanu ti na tsaka, ni marambu anu ma na mana mtamo, kufana ni mwasi wa wuphya; sekoko dianza da Mkoma di na woneka ka sithumi sakwe, se ene a na henyela valala vakwe.

¹⁵ Nguko wonani taku Mkoma a nata ngu mndilo; se sikotxikani sakwe nga singulu, kasi kuhundulusa kuhenya kwakwe kumaha txiviti, ni kukawuka kwakwe ku na fana ni midhikila ya mndilo.

¹⁶ Nguko ngu mndilo ni ditxhari dakwe, Mkoma a na wulela e lamula votshe vathu; se vafi va Mkoma va na mbambamela.

¹⁷ Avale va ti sawulekisako ni ku tibasisa amu tithembweni vamwani ni vamwani, avale vadyako nyama ya khumba, ni kutinyenyezisa, ni dikonzo, va na loviswa kumweko, kuwomba Mkoma;

¹⁸ nguko na ziva mithumo yawe ni myalakanyo yawe! Mbimo yata, yile ni no sengeleta otshe matiko ni tidimi; va nata ve ta wona wudhumo wangu.

¹⁹ Se ni na veka txikombiso hagari kwawe, ni vale va no huluka ni na va rumela ka matiko, i ku Tarxixi, ni Puli, ni Ludhe, i ku vafuli, ni Tubhali, ni Javhani, kala ka sitondolo sa kule ngutu, si nga mbi pfa nduma yangu, kambe kha sa wona wudhumo wangu; se si na pfalisa wudhumo wangu hagari ka matiko.

²⁰ Se va na wuyisa votshe vananu, va hagari ka otshe matiko, kasi kumaha mningelo ka Mkoma, na va di txitimwi ka mahantxhi, ni mu ka sikotxikani, ni mu ka misingo, ni txitimwi ka mamula, ni txitimwi ka mibhedhu, mmangoni kwangu ko sawuleka, kona Jerusalema, kuwomba Mkoma, kufana ni kuva vanana va ka Israyeli va txi tisa miningelo yawe ngu ka siya so basa, Nyumbani ka Mkoma.

²¹ Kambe ka vona, mi na teka vokari, kasi kuve vaphaxeli, ni kuva Valevhi, kuwomba Mkoma.

²² Nguko, kufana ni nzuma ya yiphya ni mafu a maphya, sile ni no si va nga, si nova masoni kwangu, kuwomba Mkoma, ngu kumaha keto, li na zumbisa tona eto liveleko lanu ni ditina danu.

²³ Se ku na maheka taku, kukhukhela ka M'buso wa Kumeka ka Mtxima, kala ka wumwani, ni kukhukhela ka Sabbata kala ka yimwani, va nata votshe vathu, ve ta khozela masoni kwangu, kuwomba Mkoma.

²⁴ Se va na huma ve wona sirumbi sa vathu vale va nga ni tshuralela; nguko mbungu yawe kha yi na mbi fa, hambi mndilo wa kona kha wu na mbi timeka; se si na maha ti to votshe vathu ve thava.